ໃນຕອນເຊົ້າເວລາ 9:00ໂມງ ຂອງວັນທີ 01 ກຸມພາ 2017 ທີ່ຫ້ອງປະຊຸມໃຫຍ່ກະຊວງອຸດສາຫະກໍາ ແລະ ການຄ້າ, ກົມຈັດຕັ້ງ ແລະ ພະນັກງານ ໄດ້ເປິດກອງປະຊຸມ ຜັນຂະຫຍາຍວຽກງານຈັດຕັ້ງທົ່ວປະເທດຄັ້ງທີ X ເພື່ອເປັນການສະຫລຸບຕີລາຄາການຈັດຕັ້ງປະຕິບັດວຽກງານຈັດຕັ້ງ ແລະ ພະນັກງານ ໃນໄລຍະ 5 ປີ ຜ່ານມາ ແລະ ທິດທາງ 5 ປີ ຕໍ່ຫນ້າ 2016-2020 ຂອງກະຊວງອຸດສາຫະກໍາ ແລະ ການຄ້າ ເປັນເວລາ 1 ວັນເຄິ່ງ (ວັນທີ 1-2 ກຸມພາ 2017) ໃນມື້ທໍາອິດຂອງກອງປະຊຸມໃຫ້ເປັນກຽດເປັນປະທານກອງປະຊຸມທ່ານ ນາງ ເຂັມມະນີ ພົນເສນາ ເລຂາຄະນະພັກກະຊວງ, ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ເປັນກຽດເປັນປະທານກອງປະຊຸມ ແລະ ປະທານ ຮວມມີ ທ່ານ ບຸນມີ ມະນີວົງ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ວັນໄຊ ທອງສະຫວັນຮອງຫົວຫນ້າຄະນະຈັດຕັ້ງ ສູນກາງພັກ ພ້ອມມີບັນດາຫົວໜ້າກົມ, ຮອງກົມ, ຫົວຫນ້າພະແນກ, ບັນດາໜ່ວຍພັກລັດວິສາຫະກິດ, ໜ່ວຍພັກບໍລິສັດຢາສູບ ແລະ ໜ່ວຍພັກບໍລິສັດເບຍລາວ ແຂກເຂົ້າຮ່ວມທັງຫມົດປະມານ 70 ກວ່າທ່ານ.
ດັ່ງຄໍາກ່າວຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກ່າວໃນກອງປະຊຸມວ່າ: ວຽກງານການຈັດຕັ້ງ-ພະນັກງານ ເປັນວຽກງານທີ່ສໍາຄັນຂອງພັກ ເຊິ່ງຍາມໃດພັກກໍ່ໄດ້ເອົາໃຈໃສ່ຊີ້ນໍາຢ່າງໃກ້ຊິດຕໍ່ວຽກງານຈັດຕັ້ງ ການປັບປຸງການຈັດຕັ້ງກໍ່ສ້າງບໍາລຸງຖັນແຖວພະນັກງານສະມາຊິກພັກເປັນວຽກປົກກະຕິຂອງຄະນະພັກທຸກຂັ້ນ, ການເຮັດວຽກຈັດຕັ້ງໄດ້ດີກໍ່ຈະເຮັດໃຫ້ຖັນແຖວພະນັກງານຂອງສະມາຊິກພັກມີຄຸນທາດທາງດ້ານການເມືອງໜັກແໜ້ນ ມີລະດັບຄວາມຮູ້ ຄວາມສາມາດ ໃນການປະຕິບັດໜ້າທີ່ການເມືອງຂອງຕົນມີຄວາມໂປ່ງໃສ ສະກັດກັ້ນ ປະກົດການຫຍໍ້ທໍ້ໃນພະນັກງານສະມາຊິກພັກ ພ້ອມທັງຍົກສູງບົດບາດການນໍາພາຂອງພັກ ແລະຜົນສັກສິດໃນການຄຸ້ມຄອງບໍລິຫານລັດ ໃນແຕ່ລະຂົງເຂດໃຫ້ມີປະສິດທິພາບ.
ນອກນີ້ທ່ານ ຫົວໜ້າກົມຈັດຕັ້ງ ແລະ ພະນັກງານ ຍັງໄດ້ລາຍງານໃນທີ່ປະຊຸມກ່ຽວກັບວຽກງານໃນໄລຍະ 5 ປີຜ່ານມາດ້ວຍຄວາມຮັບຜິດຊອບສູງ ຄະນະນໍາແຕ່ລະຂັ້ນຂອງກະຊວງອຸດສາຫະກໍາ ແລະ ການຄ້າໃນການປະຕິບັດໜ້າທີ່ການເມືອງຂອງຕົນ ເຮັດໃຫ້ການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ບັບປຸງກົງຈັກການຈັດຕັ້ງມີຜົນສໍາເລັດແຕ່ລະດ້ານຄື: ດ້ານການເມືງ ໄດ້ເອົາໃຈໃສ່ນໍາພາຈັດຕັ້ງຊເຊື່ອມຊຶມແນວທາງນະໂຍບາຍຂອງພັກ ມະຕິຂອງສູນກາງພັກເປັນຕົ້ນ ມະຕິກອງປະຊຸມໃຫຍ່ຄັ້ງທີ 9 ແລະ ຄັ້ງທີ 10.
ທີ່ສໍາຄັນຍັງໄດ້ເວົ້າເຖິງແຜນ 5 ປີໃນຕໍ່ໜ້າທີ່ຈະໄດ້ສືບຕໍ່ຢຶດຫມັ້ນຕາມ 5 ຫລັກການ 3 ທິດນໍາໃນການກໍ້ສ້າງພັກເພື່ອຮັບປະກັນທາດແທ້ຊົນຊັ້ນປະຕິວັດຂອງພັກ ສ້າງຖັນແຖວພະນັກງານສະມາຊິກພັກໃຫ້ມີຄວາມຮູ້ຄວາມສາມາດ ແລະ ຄຸນສົມບັດສິນທໍາປະຕິວັດ ກໍາແໜ້ນແນວທາງການເມືອງທີ່ໜັກແໜ້ນມີຄວາມຈົ່ງຮັກພັກດີຕໍ່ປະເທດຊາດ ແລະ ປັບປຸງກົງຈັກແຕ່ລະຂັ້ນໃຫ້ກະທັດຮັດໜັກແໜ້ນເຂັ້ມແຂງ ແລະ ມີຄວາມສັກສິດໃນການຄຸ້ມຄອງບໍລິຫານລັດ.
ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ
