ຕອນບ່າຍຂອງວັນທີ 16 ກຸມພາ 2017 ທີ່ຫ້ອງສ່ອງແສງ ກະຊວງອຸດສາຫະກໍາ ແລະ ການຄ້າ ໄດ້ມີກອງ ປະຊຸມຂອງໜ່ວຍງານການຄ້າລາວ-ອີຍູ ຄັ້ງ ທີ 06 ຂຶ້ນ ຊຶ່ງໄດ້ຈັດຄຽງຄູ່ໄປກັບກອງປະຊຸມ ຄະນະກໍາມາທິການຮ່ວມ ມືລາວ-ອີຍູ ຄັ້ງທີ 8. ໂດຍພາຍໃຕ້ການເປັນປະທານຮ່ວມ ຂອງ ທ່ານ ພູວຽງ ພົງສາ, ຮອງຫົວຫນ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ ແລະ ທ່ານ Philipp Dupuis, ລັດຖະທີ່ປຶກສາ, ຫົວຫນ້າຂະແໜງການຄ້າ ໂດຍມີຜູ້ຕາງຫນ້າຈາກຂະແໜງການສອງຝ່າຍເຂົ້າຮ່ວມ.
ຈຸດປະສົງຂອງກອງປະຊຸມເພື່ອ ທົບທວນຄືນການຮ່ວມມື ລະຫວ່າງສອງຝ່າຍໃນປີທີ່ຜ່ານມາ ການຈັດຕັ້ງພັນ ທະຂອງ ສປປ ລາວ ພາຍຫລັງໄດ້ເຂົ້າເປັນສະມາຊິກຂອງອົງການການຄ້າໂລກ ໃນປີ 2013 ສະພາບແວດລ້ອມຂອງການລົງທຶນ ແລະ ການດໍາເນີນທຸລະກິດຢູ່ໃນ ສປປ ລາວ ແລະ ປະເດັນອື່ນໆ, ທັງສອງຝ່າຍໄດ້ປຶກສາຫາລືກັນກ່ຽວກັບການພົວພັນການຄ້າສອງຝ່າຍ ແລະ ທີ່ສໍາຄັນປີຜ່ານມາມູນຄ້າການຄ້າສອງຝ່າຍ ມີທ່າອ່ຽງຫລຸດລົງເນື່ອງຈາກສະພາບເສດຖະກິດຂອງໂລກມີການປ່ຽນແປງ, ອີ່ຍູໄດ້ຖືເອົາໂອກາດນີ້ແຈ້ງໃຫ້ຝ່າຍລາວຊາບກ່ຽວກັບການນໍາໃຊ້ສິດທິພິເສດການສົ່ງສິນຄ້າໄປອີຍູ (GSP) ແຕ່ປະຈຸບັນ ຮອດປີ 2023 ເມື່ອ ສປປ ລາວ ຫລຸດພົ້ນອອກຈາກ LDC ແລະ ຄວນພິຈາລະນານໍາໃຊ້ສິດທິພິເສດ ໃນຮູບແບບ GSP Plus ພາຍຫລັງປີ 2023.
ນອກນີ້ລາວຍັງໄດ້ລາຍງານໃຫ້ອີຍູຮັບຮູ້ສະພາບການເຊື່ອມໂຍງສະພາບເສດຖະກິດຂອງ ສປປ ລາວ ໃນຂອບເຂດຮ່ວມມືອາຊຽນ ແລະ ການຈັດຕັ້ງພັນທະຂອງ ສປປ ລາວ ພາຍຫລັງໄດ້ເຂົ້າເປັນສະມາຊິກຂອງອົງການການຄ້າໂລກ ໃນປີ 2013, ແລະ ໄດ້ລາຍງານກ່ຽວກັບການປັບປຸງກົດຫມາຍສົ່ງເສີມການລົງທຶນສະບັບໃໝ່ ເພື່ອເອື້ອອໍານວຍໃຫ້ແກ່ການດໍາເນີນທຸລະກິດຢູ່ໃນ ສປປ ລາວ ແລະ ປະຈຸບັນ ສປປ ລາວ ກໍາລັງດໍາເນີນການກະກຽມຈັດກອງປະຊຸມທຸລະກິດລາວ ຄັ້ງທີ 10 ທີ່ຈະຈັດຂຶ້ນໃນກາງເດືອນມີນາ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
