ໃນວັນທີ 16 ກຸມພາ 2017 ເວລາ 9:00ໂມງ ທີ່ ສະຖາບັນຄົ້ນຄວ້າ ເສດຖະກິດອຸດສາຫະກຳ ແລະ ການຄ້າ (ສສອຄ) ໄດ້ຈັດກອງປະຊຸມ ການຄ້າລະຫວ່າງປະເທດ ແລະ ການແຂ່ງຂັນການຄ້າ ຕິດພັນກັບວຽກງານອຸດສາຫະກຳ ແລະ ການຄ້າ ໃຫ້ແກ່ພະນັກງານອຸດສາຫະກຳ ແລະ ການຄ້າ ຂັ້ນເມືອງຂື້ນເປັນຄັ້ງທີ VIII, ໂດຍການເປັນປະທານ ທ່ານ ສັນຕິສຸກ ວິໄລຈະເລີນ ຫົວຫນ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ
ດັ່ງທີ່ພວກເຮົາໄດ້ຮັບຊາບກັນແລ້ວວ່າ, ປະຈຸບັນ, ປະເທດເຮົາໄດ້ມີການພົວພັນຮ່ວມມືຢ່າງກວ້າງຂວາງ ກັບພາກພື້ນ ແລະ ສາກົນ, ມີການແຂ່ງຂັນໃນເຄືອຂາຍການຜະລິດ ແລະ ສາມາດເຂົ້າຮ່ວມໃນການເຊື່ອມໂຍງດ້ານເສດຖະກິດຂອງພາກພື້ນ ແລະ ສາກົນຢ່າງຕັ້ງໜ້າ, ແຕ່ຖ້າຫາກທຽບໃສ່ການເຕີບໂຕເສດຖະກິດໃນປະຈຸບັນ ແມ່ນຍັງໜັກໄປທາງດ້ານປະລິມານ, ບໍ່ຮັບປະກັນທາງດ້ານຄຸນນະພາບເທົ່າທີ່ຄວນ; ສິນຄ້າທີ່ພວກເຮົາສົ່ງອອກ ແມ່ນມີມູນຄ່າຕ່ຳ ແລະ ບໍ່ມີຄວາມ ຫຼາກຫຼາຍ ເຮັດໃຫ້ຄວາມສາມາດໃນການແຂ່ງຂັ້ນທາງດ້ານການຄ້າ ບໍ່ວ່າຈະຢູ່ໃນພາກພື້ນກໍຄືໃນສາກົນແມ່ນບໍ່ທັນສູງ. ດັ່ງນັ້ນ, ການຈັດກອງປະຊຸມສຳມະນາຄັ້ງນີ້ ແມ່ນເພື່ອເຮັດໃຫ້ພະນັກງານອຸດສາຫະກໍາ ການຄ້າເມືອງ
1. ຮັບຮູ້ບັນດານະໂຍບາຍ, ລະບຽບການ ແລະ ຫລັກທິດສະດີກ່ຽວກັບການຄ້າລະຫວ່າງປະເທດ;
2. ຮູ້ໄດ້ເຖິງຜົນປະໂຫຍດ ແລະ ສິ່ງທ້າທາຍຂອງການຄ້າລະຫວ່າງປະເທດໃນການເຊື່ອມໂຍງເຂົ້າສາກົນໃນປັດຈຸບັນ;
3. ເພື່ອປຶກສາຫາລື ແລະ ແລກປ່ຽນປະສົບການໃນການຈັດຕັ້ງປະຕິບັດວຽກງານອຸດສາຫະກຳ ແລະ ການຄ້າ ລະຫວ່າງພະນັກງານຫຼັກແຫຼ່ງໃນຂະແໜງອຸດສາຫະກຳ ແລະການຄ້າຂັ້ນເມືອງ (ເມືອງສາມສ້າງ) ແລະ ຂັ້ນສູນກາງ; ແລະ
4. ເພື່ອເປັນການປຶກສາຫາລືກ່ຽວກັບຂອບເຂດ ແລະ ຫົວຂໍ້ຂອງການຝຶກອົບຮົມຍົກລະດັບໃຫ້ແກ່ພະນັກງານອຸດສາຫະກໍາ ແລະ ການຄ້າເມືອງ ໃນຊຸດທີ 9. ສຳລັບກອງປະຊຸມສຳມະນາ ຂອງພວກເຮົາໃນເທື່ອນີ້ໄດ້ຈັດຂຶ້ນ 02 ວັນເຕັມ ຄື:
ມື້ທໍາອິດແມ່ນຈະໄດ້ ຮັບຟັງການບັນຍາຍ ແລະ ສົນທະນາປຶກສາຫາລືໃນຫົວຂໍ້ດັ່ງນີ້:
1. ແຜນຍຸດທະສາດວຽກງານອຸດສາຫະກຳ ແລະ ການຄ້າ 2025 ແລະ ວິໄສທັດ ປີ 2030;
2. ບົດບາດຂອງການຄ້າເອເລັກໂຕນິກ ໃນສະພາບປັດຈຸບັນ ແລະ ແນວໂນ້ມໃນອະນາຄົດ;
3. ການເຊື່ອມໂຍງເສດຖະກິດ-ການຄ້າ ແລະ ການໃຊ້ປະໂຫຍດຈາກປະຊາຄົມເສດຖະກິດອາຊຽນ ຫຼື AEC ຂອງ ສປປ ລາວ;
4. ນະໂຍບາຍການສົ່ງເສີມການສົ່ງອອກສິນຄ້າໄປຕ່າງປະເທດ ແລະ ການອຳນວຍຄວາມສະດວກທາງດ້ານການຄ້າ.
ສຳລັບມື້ວັນທີ 2, ວັນທີ 17 ກຸມພາ 2017 ແມ່ນໄດ້ຮັບຟັງການບັນຍາຍ ແລະ ສົນທະນາປຶກສາຫາລືໃນ ຫຼາຍຫົວຂໍ້ຕ່າງໆເຊັ່ນ: ນະໂຍບາຍສົ່ງເສີມ, ບັນຫາ ແລະ ສິ່ງທ້າທາຍຂອງວຽກງານຄຸ້ມຄອງວຽກບຽນວິສາຫະກິດຢູ່ຂັ້ນສູນກາງ; ການສົ່ງເສີມວິສາຫະກິດຂະໜາດນ້ອຍ ແລະ ກາງ ຂອງ ສປປ ລາວ ແລະ ການເຂົ້າຫາແຫຼ່ງທຶນຂອງວິສາຫະກິດ; ນະໂຍບາຍສົ່ງເສີມອຸດສາຫະກຳປຸງແຕ່ງ ແລະ ການຄຸ້ມຄອງອຸດສາຫະກຳ ຢູ່ ສປປ ລາວ ແລະ ແບບສອບຖາມເພື່ອສຶກສາຄວາມຕ້ອງການຝຶກອົບຮົມຍົກລະດັບໃຫ້ແກ່ພະນັກງານອຸດສາຫະກໍາ ແລະ ການຄ້າຂັ້ນເມືອງ, ເວົ້າລວມແລ້ວກອງປະຊຸມຂອງພວກເຮົາເທື່ອນີ້ ແມ່ນມີຄວາມໝາຍ ຄວາມສຳຄັນຫຼາຍຕໍ່ພະນັກງານທົ່ວຂະແໜງອຸດສາຫະກຳ ແລະ ການຄ້າຂອງພວກເຮົາທີ່ຈະໄດ້ສົນທະນາ, ຄົ້ນຄວ້າ, ປຶກສາຫາລື ແລະ ແລກປ່ຽນດ້ານວິຊາການຈາກກົມວິຊາການທີ່ຮັບຜິດຊອບແຕ່ລະຂົງເຂດ ແລະ ທີ່ສໍາຄັນທີ່ສຸດແມ່ນໄດ້ຮັບຄວາມຮ່ວມມືນໍານັກສໍາມະນາກອນທຸກໆທ່ານ ທີ່ເອົາໃຈໃສ່ເປັນພິເສດ ໃນການຖອດຖອນບົດ ຮຽນ ແລກປ່ຽນຄວາມຄິດເຫັນ ໃນການສົ່ງຄວາມຮູ້ເຊິ່ງກັນ ແລະ ກັນ.
ມີນັກສຳມະນາກອນເຂົ້າຮ່ວມຕາງໜ້າຈາກບັນດາຫ້ອງການ ອຸດສາຫະກໍາ ແລະ ການຄ້າເມືອງ ສາມສ້າງ ໃນແຕ່ລະແຂວງ 17 ແຂວງພ້ອມກັບຕາງໜ້າຫ້ອງການອຸດສາຫະກໍາ ແລະ ການຄ້າ 9 ຕົວເມືອງຂອງນະຄອນຫຼວງ, ວິທະຍາກອນແມ່ນມາຈາກສະຖາບັນຄົ້ນຄວ້າເສດຖະກິດ ແລະ ການຄ້າ, ກົມການຄ້າພາຍໃນ, ກົມແຜນການ ແລະ ການຮ່ວມມື, ກົມທະບຽນ ແລະ ຄຸ້ມຄອງວິສາຫະກິດ, ກົມການນຳເຂົ້າ ແລະ ສົ່ງອອກ, ກົມອຸດສາຫະກຳ ແລະ ຫັດຖະກໍາ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ກົມນະໂຍບາຍການຄ້າຕ່າງປະເທດ.
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
