ໃນເວລາ 09:00ໂມງ ຂອງວັນທີ 17 ກຸມພາ 2017 ທີ່ຫ້ອງປະຊຸມໃຫຍ່ກະຊວງອຸດສາຫະກໍາ ແລະ ການຄ້າ ໄດ້ມີພະນັກງານ-ລັດຖະກອນ ມາຕໍ່ແຖວກັນຂຽນປະຫວັດເພື່ອບໍລິຈາກເລືອດໃຫ້ທະນາຄານເລືອດ (ສະພາກາແດງລາວ) ຢ່າງເປັນຂະບວນການຟົດຟື້ນຍ້ອນການຊີ້ນໍາ-ນໍາພາອັນສະຫລາດສອງໃສຂອງຄະນະນໍາກະຊວງທີ່ຍາມໃດກໍ່ຢາກໃຫ້ພະນັກງານມີຄວາມເສຍສະຫລະສ່ວນຕົວເພື່ອຜົນປະໂຫບດສ່ວນລວມ ແລະ ມີຄວາມສາມັກຄີພາຍໃນ ແລະ ຮັກຊາດ ບ້ານເກີດເມືອງນອນ ຈິ່ງໄດ້ປຸກລະດົມຈິດໃຈ ພະນັກງານ-ລັດຖະກອນ ພາຍໃນກະຊວງອຸດສາຫະກໍາ ແລະ ການຄ້າ ໃຫ້ມີຈິດໃຈເອື້ອເຟື້ອເພື່ອແຜ່ ຕໍ່ເພື່ອນມະນຸດດ້ວຍກັນ.
ສະນັ້ນການບໍລິຈາກເລືອດໃນຄັ້ງນີ້ ຈິ່ງເປັນຂະບວນການຂອງຊາວຫນຸ່ມ, ກໍາມະບານ, ແມ່ຍິງ ທີ່ມີຄວາມມຸງຫມັ້ນໃນການເຮັດຄວາມດີ ກໍ່ຄືການບໍລິຈາກເລືອດ ເພື່ອໄປຊ່ວຍຄົນເຈັບ, ພວກທີ່ເກີດອຸບັດຕິເຫດເສຍເລືອດຫລາຍ (ຄົນທີ່ຕ້ອງການເລືອດ) ປິ່ນປົວໃຫ້ທັນເວລາ; ການບໍລິຈາກເລືອດໃນຊຸດນີ້: ຫ້ອງການກະຊວງອຸດສາຫະກໍາ ແລະ ການຄ້າ, ເປັນເຈົ້າການໃນການຈັດຕັ້ງປະຕິບັດ ແລະ ສິ່ງທີ່ສໍາຄັນທີ່ສຸດ ກໍ່ແມ່ນຄວາມສາມັກຄີ ການຕື່ນຕົວຂອງພະນັກງານລັດຖະກອນຜູ້ມີນໍ້າໃຈຮັກຊາດ, ຮັກເພື່ອນມະນຸດດ້ວຍກັນພາຍໃນກະຊວງ; ດັ່ງຄໍາເວົ້າທີ່ວ່າ: ບໍລິຈາກເລືອດຊ່ວຍຊີວິດຄົນ ອັນດີກວ່າສ້າງເຈດີ7 ຊັ້ນ; ສະນັ້ນຜູ້ທີ່ບໍລິຈາກເລືອດຄັ້ງນີ້ປຽບເຫມືອນທ່ານໄດ້ຊ່ວຍຊີວິດຄົນ ແລະ ບຸນກຸສົນໃຫ້ແກ່ຕົນເອງ. ຂໍຊົມເຊີຍ
[ພາບ ແລະ ຂ່າວ: ສູນສະຖິຕິ ແລະ ຂໍ້ມູນຂ່າວສານ]
