ຕອນເຊົ້າ ຂອງວັນທີ 04 ກໍລະກົດ 2017, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ພົບປະກັບຄະນະນັກທຸລະກິດ ເມືອງໄທ້ອ່ານ ແຂວງຊ່ານຕົ່ງ ສປ ຈີນ ຊຶ່ງຄະນະດັ່ງກ່າວເປັນຕົວແທນຈາກບໍລິສັດ ບໍລິຫານ ແລະ ພັດທະນາສວນສາກົນຈີ່ນໄທ້ ຈຳກັດ ມີທຸລະກິດຫລັກ: ເຂດການຄ້າເສລີ ແລະ ການວາງແຜນ, ການກໍ່ສ້າງ, ການບໍລິຫານຈັດການ ການດໍາເນີນງານການຜະລິດຂອງບໍລິການໂອນປະກອບການໃນປະເທດເປັນເຂດການຄ້າເສລີ ແລະ ບໍລິການເຂດທຸລະກິດການຄ້າ ເຂດການຄ້າເສລີ ແລະ ການລົງທຶນ, ການຈັດຫາເງິນທຶນຂອງອົງກອນພັດທະນາເຂດບໍລິການ; ມີຈຸດປະສົງມາສໍາຫລວດເຂດເສດຖະກິດພິເສດ, ເຂດອຸດສາຫະກຳ ຂອງ ສປປ ລາວ ເພື່ອຊອກຫາກາລະໂອກາດ ແລະ ສຶກສານະໂຍບາຍ ກ່ຽວກັບການລົງທຶນຢູ່ ສປປ ລາວ; ທ່ານ ລັດຖະມົນຕີ ໄດ້ແນະນຳໃຫ້ຄະນະດັ່ງກ່າວໄປພົບກັບພາກສ່ວນກ່ຽວຂ້ອງເປັນຕົ້ນ ຄະນະຄຸ້ມຄອງເຂດໄຊເສດຖາກວມລວມ, ເຂດອຸດສາຫະກຳ ຫລັກ 21 VITA Park, ຄະນະຄຸ້ມຄອງຕະຫລາດຫລັກຊັບ ແລະ ສຶກສາກົດໝາຍຂອງ ສປປ ລາວ ໃນຂະແໜງການທີ່ກ່ຽວຂ້ອງ ເພື່ອເປັນຊ່ອງທາງທີ່ເໝາະສົມສຳລັບການລົງທຶນຂອງເຂົາເຈົ້າ. ຕອນທ້າຍ, ທ່ານ ນາງ ເຂັມມະນີ ພົນເສນາ ໄດ້ມອບເຄື່ອງທີ່ລະນຶກ ຊຶ່ງເປັນການໂຄສະນາສິນຄ້າຂອງລາວ ໃຫ້ແກ່ຄະນະນັກທຸລະກິດຈີນ ໄດ້ຮັບຮູ້ກ່ຽວກັບສິນຄ້າທ່າແຮງທີ່ສາມາດສົ່ງອອກໄປຕ່າງປະເທດໄດ້ເປັນຕົ້ນ ເຂົ້າສານຫຸ້ມຫໍ່ເປັນຜະລິດຕະພັນ, ກາເຟ ແລະ ຊາສຳເລັດຮູບ.
[ພາບ ແລະ ຂ່າວ: ຂະແໜງຂ່າວສານ]
