ໃນວັນທີ 13 ກໍລະກົດ 2017 ພະແນກອຸດສາຫະກຳ ແລະ ການຄ້າແຂວງຄຳມ່ວນ ນຳໂດຍ ທ່ານ ທອງໄຊ ມັງໜໍ່ເມກ ຫົວໜ້າພະແນກອຸດສາຫະກຳ ແລະ ການຄ້າແຂວງ ໄດ້ຮ່ວມກັບບັນດາພະແນກການກ່ຽວຂ້ອງລົງຊຸກຍູ້ຕິດຕາມກວດກາບັນດາປ້າຍລາຄາສິນຄ້າຕາມທ້ອງຕະຫລາດພາຍໃນເທດສະບານເມືອງທ່າແຂກຄື : ຕະຫລາດສຸກສົມບູນ ( ຫລັກ 03 ), ຕະຫລາດຫລັກ 02 ແລະ ຕະຫລາດນາໂບ.
ຈຸດປະສົງເພື່ອຄຸ້ມຄອງປະເພດລາຄາສິນຄ້າຕ່າງໆ ໂດຍສະເພາະລາຄາເຂົ້າ, ຊີ້ນສັດ, ປາ, ຊິງຊັ່ງ ໃຫ້ມີຄວາມຊັດເຈນຂຶ້ນ, ມີການຕິດປ້າຍລາຄາສິນຄ້າເປັນປົກກະຕິ ທັງເປັນການປະຕິບັດຕາມດຳລັດຂອງນາຍົກລັດຖະມົນຕີ ວ່າດ້ວຍການຄຸ້ມຄອງລາຄາສິນຄ້າ ພ້ອມທັງນິຕິກຳໃນການຄຸ້ມຄອງຜູ້ຊົມໃຊ້ ເພື່ອຕິດຕາມກວດກາບັນດາສິນຄ້າກະສິກຳ, ການປູກການ ລ້ຽງ, ສິນຄ້າປະເພດຊີ້ນ, ປາ ແລະ ອື່ນໆ ທີ່ມາຈຳໜ່າຍໃນທ້ອງຕະຫລາດ. ເຊິ່ງພາຍຫລັງທີ່ເຈົ໊າໜ້າທີ່ກວດກາການຄ້າໄດ້ສົມທົບກັບພາກສ່ວນກ່ຽວຂ້ອງ ລົງເກັບກຳຂໍ້ມູນໃນໄລຍະຜ່ານມາ ຈິ່ງໄດ້ກຳນົດລາຄາອີງໃສ່ສະພາບຄວາມເປັນຈິງຂອງທ້ອງຖິ່ນແມ່ນໄດ້ກຳນົດ : ລາຄາເຂົ້າສານໜຽວປະເພດ 01 ແມ່ນ 6.000 ກີບ/ໂລ, ປະເພດ 02 : 5.000 ກີບ/ໂລ, ເຂົ້າສານຈ້າວປະເພດ 01 : 8.000 ກີບ/ໂລ, ເຂົ້າສານຈ້າວປະເພດ 02 : 7.000 ກີບ/ໂລ, ລາຄາຊີ້ນງົວ ແລະ ຄວາຍປະເພດ 01 : 70.000 ກີບ/ໂລ ຊີ້ນງົວ ແລະ ຄວາຍປະເພດ 02 : 50.000 ກີບ, ລາຄາຊິ້ນໝູພັນປະເພດ 01 : 35.000 ກີບ/ໂລ, ປະເພດ 02 : 30.000 ກີບ/ໂລ, ລາຄາປາກະຊັງ 20.000 ກີບ/ໂລ, ປາດຸກພັນ 18.000 ກີບ. ມາຮອດປະຈຸບັນທັງສາມຕະຫລາດແມ່ນໄດ້ສຳເລັດການຕິດປ້າຍລາຄາລວມ, ປ້າຍລາຄາເຂົ້າ, ລາຄາປາ, ລາຄາຊີ້ນລວມທັງໝົດມີ 12 ຈຸດ, ຊິງກາງ 9 ຈຸດ ຕາມຈຸດການຊື້-ຂາຍສິນຄ້າດັ່ງກ່າວ ເພື່ອຕິດຕາມສະພາບການເໜັງຕີງຂອງລາຄາສິນຄ້າໃນແຕ່ລະໄລຍະໄດ້ມີການຄວບຄຸມໃນລະດັບທີ່ຜູ້ຊື້ – ຜູ້ຂາຍ ສາມາດຈໍລະຈອນສິນຄ້າໄດ້ໃນລະດັບລາຄາຍຸຕິທຳ, ລະດັບທີ່ຄວບຄຸມເໝາະສົມ. ໃນການຕິດປ້າຍລາຄາສິນຄ້ານີ້ ນາງ ອ່ອນ ແມ່ຄ້າຂາຍເຂົ້າປະຈຳຕະຫລາດຫລັກ 03 ໄດ້ສະແດງຄວາມຮູ້ສຶກຕໍ່ນັກຂ່າວພວກເຮົາວ່າ : ຂ້າພະເຈົ້າເຫັນດີແລ້ວທີ່ທາງພາກສ່ວນກ່ຽວຂ້ອງ ໄດ້ມີການຕິດປ້າຍລາຄານີ້ເພາະເປັນຄວາມພໍໃຈຂອງແມ່ຄ້າ ແລະ ທາງເຈົ້າໜ້າທີ່ທີ່ໄດ້ຕົກລົງກັນຂາຍໃນລາຄາລະດັບທີ່ທາງລັດຖະບານຄວບຄຸມ ແລະ ກໍ່ຍິນດີຂາຍຕາມລາຄາທີ່ເພິ່ນກຳນົດໃຫ້ ແລະ ນາງນ້ອຍແມ່ຄ້າຂາຍປາປະຈຳຕະຫລາດຫລັກ 02 ກໍ່ກ່າວເຊັ່ນດຽວກັນ. ໃນໂອກາດດຽວກັນ ທ່ານຫົວໜ້າພະແນກອຸດສາຫະກຳ ແລະ ການຄ້າ ຍັງໄດ້ຮຽກຮ້ອງມາຍັງພໍ່ຄ້າຊາວຂາຍໃຫ້ປະຕິບັດຕາມລະບຽບການ, ຕາມປ້າຍທີ່ພວກເຮົາໄດ້ຕິດຕັ້ງຕາມຈຸດຕ່າງໆນັ້ນ ຕໍ່ຜູ້ທີ່ລະເມີດແມ່ນຈະຖືກປັບໄໝ ແລະ ຖ້າຫາກບັນດາຜູ້ທີ່ເຂົ້າມາໃຊ້ບໍລິການຕາມທ້ອງຕະຫລາດຫາກພົບເຫັນການຂາຍເກີນລາຄາແມ່ນໃຫ້ແຈ້ງເຈົ້າໜ້າທີ່ພວກເຮົາໄດ້ ຕາມໝາຍເລກ 030 5784040. ທັງນີ້ກໍ່ເພື່ອໃຫ້ສອດຄ່ອງກັບຊີວິດການເປັນຢູ່ຂອງພໍ່ແມ່ປະຊາຊົນ ຫລີກເວັ້ນບໍ່ໃຫ້ມີການເອົາລັດເອົາປຽບເຊິ່ງກັນ ແລະ ກັນ ລະຫວ່າງຜູ້ຊື້ ແລະ ຜູ້ຂາຍ.
ຂ່າວ : ມະນີວັນ
[ຮຽບຮຽງໂດຍ: ຂະແໜງຂ່າວສານ]
