ນະຄອນຫຼວງວຽງຈັນ, ວັນທີ 26 ກໍລະກົດ 2017 ກົມແຜນການ ແລະ ການຮ່ວມມື ກະຊວງອຸດສາຫະກຳ ແລະ ການຄ້າ ໄດ້ເປີດກອງປະຊຸມປະຈຳປີ 2017 ຂຶ້ນທີ່ຫ້ອງປະຊຸມໃຫຍ່ ກະຊວງ ອຄ ໂດຍການເປັນປະທານ ຂອງ ທ່ານ ສີລິສຳພັນ ວໍຣະຈິດ ຫົວໜ້າກົມແຜນການ ແລະ ການຮ່ວມມື ມີ ຜູ້ຕາງໜ້າຮອງຫົວໜ້າກົມ, ຫົວໜ້າພະແນກແຜນການ-ສັງລວມ, ວິຊາການ ຈາກບັນດາກົມ, ສະຖາບັນ, ຫ້ອງການກະຊວງ ແລະ ຫົວໜ້າພະແນກ/ຮອງຫົວໜ້າພະແນກ ອຄ ແຂວງ, ນະຄອນຫລວງ, ຫົວໜ້າຂະແໜງສະຖິຕິ-ແຜນການ ແລະ ວິຊາການ ຈາກທ້ອງຖິ່ນ ເຂົ້າຮ່ວມ ຈຳນວນ 130 ກວ່າທ່ານ.
ຈຸດປະສົງຂອງກອງປະຊຸມ ແມ່ນເພື່ອຕີລາຄາຄືນ ການຈັດຕັ້ງປະຕິບັດວຽກງານຂອງກົມ ໃນໄລຍະຜ່ານມາ ແລະ ເປັນເວທີສຳມະນາໄປໃນຕົວ ໃນວຽກງານວິຊາສະເພາະຂອງກົມ ຊຶ່ງກອງປະຊຸມຈະໄດ້ຮັບຟັງການສະເໜີໃນຫລາຍໆຫົວຂໍ້ ເຊັ່ນ: 1/ ຮ່າງແຜນຍຸດທະສາດການພັດທະນາຂອງກົມ ຜຮ ໄລຍະ 10ປີ (2017-2027).
2/ ເຜີຍແຜ່ພາລະບົດບາດໃໝ່ຂອງກົມ ຜຮ
3/ ນຳສະເໜີ ການນຳໃຊ້ລະບົບເອກະສານຂາເຂົ້າ-ຂາອອກ ແລະ ລະບົບແຈກຢາຍເອກະສານທີ່ສ້າງຂຶ້ນ ໂດຍກົມ ແຜນການ ແລະ ການຮ່ວມມື
4/ ນຳສະເໜີ ຮ່າງສະບັບປັບປຸງ ແຜນພັດທະນາ ອຄ 5 ປີ (2016-2020)
5/ ນຳສະເໜີ ແຜນຍຸດທະສາດ ວຽກງານຂ່າວສານຂອງກົມ
6/ ນຳສະເໜີ ຍຸດທະສາດ ICT ຂອງກະຊວງ ອຄ (2016-2020)
7/ ການຄຸ້ມຄອງການຈັດຕັ້ງປະຕິບັດໂຄງການ ການຊ່ວຍເຫລືອຂອງຕ່າງປະເທດ; ວຽກງານການຮ່ວມມືເສດຖະກິດການຄ້າ ແລະ ບັນຫາອື່ນໆ ທີ່ພົວພັນເຖິງພາລະບົດບາດຂອງກົມ.
ກອງປະຊຸມຈະດຳເນີນເປັນເວລາ 2 ວັນເຄິ່ງ ຈົນເຖິງວັນທີ 28 ກໍລະກົດຈຶ່ງສິ້ນສຸດ ພິເສດກອງປະຊຸມໄດ້ຮັບກຽດຈາກທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ໃຫ້ກຽດເປັນປະທານກ່າວເປີດ ແລະ ໂອ້ລົມໃນມື້ທຳອິດ ຊຶ່ງທ່ານໄດ້ຍົກຫລາຍບັນຫາສົມຄວນ ເພື່ອໃຫ້ກອງປະຊຸມຄົ້ນຄວ້າປຶກສາຫາລື ຮ່ວມກັນເປັນຕົ້ນ 3 ເສົາຄ້ຳທີ່ໄດ້ກຳນົດໃນແຜນພັດທະນາ ຂອງຂະແໜງ ອຄ, ເຮັດແນວໃດໃຫ້ເກີດຜົນເປັນຈິງ; ວຽກງານສະຖິຕິ ແລະ ຂໍ້ມູນຂ່າວສານ; ວຽກງານການລົງທຶນຂອງລັດ; ວຽກງານຄຸ້ມຄອງການຊ່ວຍເຫລືອ ຂອງຕ່າງປະເທດ ແລະ ວຽກງານຮ່ວມມືເສດຖະກິດການຄ້າ. ສໍາລັບມື້ ສຸດທ້າຍຂອງກອງປະຊຸມຍັງຈະໄດ້ຮັບກຽດຈາກ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ກໍຈະໃຫ້ກຽດເຂົ້າຮ່ວມໂອ້ລົມໃນເວລາປິດກອງປະຊຸມ.
ໃນວັນທີ 28 ກໍລະກົດ ທ່ານ ນ ເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກຳ ແລະ ການຄ້າ ເປັນກຽດເຂົ້າຮ່ວມໂອ້ລົມ ຕໍ່ກອງປະຊຸມຂອງ ກົມ ຜຮ ແລະ ຖ່າຍຮູບນຳຜູ້ເຂົ້າຮ່ວມທັງໝົດ
[ພາບ ແລະ ຂ່າວໂດຍ: ຂະແໜງຂ່າວສານ]
