ໃນລະຫວ່າງວັນທີ 28-29 ສິງຫາ 2017 ທີ່ຫ້ອງປະຊຸມພະແນກ ອຸດສາຫະກໍາ ແລະ ການຄ້າ ແຂວງຄໍາມ່ວນ ໄດ້ເປີດກອງປະຊຸມເຜີຍແຜ່ເອກະສານກ່ຽວກັບ ຂໍ້ຕົກລົງ ວ່າດ້ວຍການຮັບຮອງເອົາລາຍການ (ບັນຊີ) ຜະລິດຕະພັນໄມ້ເພື່ອສົ່ງອອກ ແລະ ຫ້າມສົ່ງອອກ ສະບັບເລກທີ 1833/ອຄ, ລົງວັນທີ 03 ຕຸລາ 2016 ໂດຍການໃຫ້ກຽດເຂາເຂົ້າຮ່ວມເປັນປະທານຂອງ ທ່ານ ຄໍາຜົງ ວົງພະຈັນ ຄະນະປະຈໍາພັກແຂວງ ປະທານກວດກາລັດແຂວງ ຄໍາມ່ວນ.
ກອງປະຊຸມດັ່ງກ່າວແມ່ນການຮ່ວມມືກັນລະຫວ່າງ ພະແນກ ອຸດສາຫະກໍາ ແລະ ການຄ້າແຂວງ ຄໍາມ່ວນ ແລະ ກົມອຸດສາຫະກໍາ-ຫັດຖະກໍາ ກະຊວງ ອຸດສາຫະກໍາ ແລະ ການຄ້າ ໂດຍໄດ້ຮັບທຶນການສະໜັບສະໜູນຈາກ: ສະຫະ ພາບ ເອີລົບ (EU) ແລະ ອົງການ WWF ປະຈໍາລາວ, ກອງປະຊຸມຄັ້ງນີ້ໄດ້ເຊີນບັນດາຂະແໜງການກ່ຽວຂ້ອງ, ເຈົ້າເມືອງ-ຮອງເຈົ້າເມືອງ, ຫົວໜ້າຫ້ອງການ ອຸດສາຫະກໍາ ແລະ ການຄ້າ ປະຈໍາເມືອງ ແລະ ພາກສ່ວນທຸລະກິດໃນທົ່ວແຂວງໄດ້ເຂົ້າຮ່ວມ, ຈໍານວນຄົນທີ່ເຂົ້າຮ່ວມທັງໝົດ 67 ທ່ານ ຍິງ 05 ທ່ານ.
ບັນດາເອກະສານທີ່ນໍາມາເຜີຍແຜ່ໃນກອງປະຊຸມຄັ້ງນີ້ ປະກອບມີ:
- ເອກະສານກ່ຽວກັບພາລະບົດບາດ, ໜ້າທີ່ຮັບຜິດຊອບ ແລະ ລະບົບການຄ້າໄມ້ທີ່ຖືກຕ້ອງ ແລະ ຍືນຍົງຂອງໂຄງການ FLEGT ປະຈໍາແຂວງ ຄໍາມ່ວນ.
- ນິຕິກໍາຕ່າງໆ ໃນການຄຸ້ມຄອງອຸດສາຫະກໍາ ປຸງແຕ່ງໄມ້ (ຜະລິດຕະພັນໄມ້).
- ຂໍ້ຕົກລົງ ສະບັບເລກທີ 1833/ອຄ, ລົງວັນທີ 03 ຕຸລາ 2016. ວ່າດ້ວຍການຮັບຮອງເອົາລາຍການ (ບັນຊີ) ຜະລິດຕະພັນໄມ້ເພື່ອສົ່ງອອກ ແລະ ຫ້າມສົ່ງອອກ
- ແຈ້ງການ ສະບັບເລກທີ 1161/ກອຫ.ມຖ, ລົງວັນທີ 30 ພະຈິກ 2016 ວ່າດ້ວຍ ແບບຟອມເອກະສານຢັ້ງຢືນ ຜະລິດຕະພັນໄມ້ທໍາມະຊາດ ແລະ ຜະລິດຕະພັນໄມ້ສວນປູກເພື່ອສົ່ງອອກ.
- ແນະນໍາ ຂັ້ນຕອນ, ວີທີການເກັບກໍາຂໍ້ມູນ ແລະ ອໍານວຍຄວາມສະດວກໃນການສົ່ງອອກຜະລິດຕະພັນໄມ້ ຂອງດ່ານພາສີເຂດ 3 (ດ່ານສາກົນ ນາເພົ້າຈໍຫຼໍ ແລະ ດ່ານສາກົນ ຂົວມິດຕະພາບ 3 ທ່າແຂກ-ນະຄອນພະນົມ).
ກອງປະຊຸມຄັ້ງນີ້ ນອກຈາກຮັບຟັງເຜີຍແຜ່ເອກະສານແລ້ວ ຍັງໄດ້ມີການປະກອບຄໍາຄິດເຫັນຈາກບັນດາຜູ້ແທນທີ່ເຂົ້າຮ່ວມກອງປະຊຸມ, ນອກຈາກນັ້ນຍັງໄດ້ລົງເຄື່ອນໄຫວຢ້ຽມຢາມໂຮງງານປຸງແຕ່ງໄມ້ ແລະ ເຟີນີເຈີ ໄມ້ຈໍາ ນວນ 04 ໂຮງງານຄື:
- ໂຮງງານປຸງແຕ່ງໄມ້ສໍາເລັດຮູບ ພອນສັກ ຕັ້ງຢູ່ບ້ານ ດອນເປືອຍ ເມືອງ ຍົມມະລາດ ແຂວງ ຄໍາມ່ວນ.
- ໂຮງງານເຟີນີເຈີໄມ້ ພາມີໂຊກ ຕັ້ງຢູ່ບ້ານ ຄໍາບຸ່ນ ເມືອງ ທ່າແຂກ ແຂວງ ຄໍາມ່ວນ.
- ໂຮງງານເຟີນີເຈີໄມ້ ຄໍາມ່ວນ ຕັ້ງຢູ່ບ້ານ ສີວິໄລ ເມືອງ ທ່າແຂກ ແຂວງ ຄໍາມ່ວນ.
- ໂຮງງານປຸງແຕ່ງໄມ້ສໍາເລັດຮູບ ເພັດດາວັນ ຕັ້ງຢູ່ບ້ານ ໜອງຜື ເມືອງ ຫີນບູນ ແຂວງ ຄໍາມ່ວນ.
[ຂ່າວຈາກ: ພະແນກ ອຄ ແຂວງຄໍາມ່ວນ]
[ຮຽບຮຽງໂດຍ: ຂະແໜງຂ່າວສານ]
