ຕອນບ່າຍ ເວລາ 13:00 ມ ຂອງວັນທີ 20 ກຸມພາ 2018, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ພົບປະ ກັບ ທ່ານ Yuichi Aida ຮອງປະທານສະມາຄົມມິດຕະພາບ ໄຊຕະມະຍີ່ປຸ່ນ ປະຈໍາ ສປປ ລາວ ພ້ອມຄະນະ ແລະ ເຂົ້າຮ່ວມຕ້ອນຮັບມີຄະນະວິຊາການຝ່າຍລາວ ຈໍານວນໜຶ່ງ;
ທ່ານ Yuichi Aida ໄດ້ກ່າວວ່າ: ຂ້າພະເຈົ້າຮູ້ສຶກເປັນກຽດ ແລະ ມີຄວາມດີອົກດີໃຈຫລາຍທີ່ໄດ້ມາຢ້ຽມຢາມ ສປປ ລາວ ທາງດ້ານລັດຖະບານ ລາວ ກໍ່ໃຫ້ການຕ້ອນຮັບຢ່າງອົບອຸ່ນເວົ້າລວມ ເວົ້າສະເພາະກໍຄືການນຳຂອງກະຊວງ ອຄ ຊຶ່ງການມາຢ້ຽມຢາມຂອງສະມາຄົມໃນປີນີ້ຖືວ່າທາງປະທານສະມາຄົມໄດ້ສົ່ງຕົວແທນຄື: ຂ້າພະເຈົ້າມາ ເນື່ອງຈາກປະທານໃຫຍ່ແມ່ນມີບັນຫາເລື່ອງສຸຂະພາບ. ແນວໃດກໍ່ຕາມ ການຢ້ຽມຢາມ ສປປ ລາວ ຂອງສະມາຄົມຄັ້ງນີ້ຖືວ່າເປັນຄັ້ງທີ 22 ແລ້ວ ໂດຍການມາໃນຄັ້ງນີ້ທາງສະມາຄົມກໍ່ຈະມີການມອບທຶນຊ່ວຍເຫຼືອເຮັດກິດຈະກຳບານເຕະ ແລະ ມອບທຶນການສຶກສາຈຳນວນໜຶ່ງໃຫ້ແກ່ລັດຖະບານລາວ. ພ້ອມດຽວກັນນັ້ນ, ທາງສະມາຄົມຍັງມີແຜນຢາກຊຸກຍູ້ສົ່ງເສີມເອົາແຮງງານລາວໄປເຮັດວຽກຢູ່ຍີ່ປຸ່ນເພື່ອເຮັດໃຫ້ເຂົາເຈົ້າມີທັກສະ ແລະ ປະສົບການໃນການເຮັດວຽກຢູ່ຍີ່ປຸ່ນ ເພື່ອທີ່ຈະໄດ້ກັບເອົາມາພັດທະນາປະເທດຊາດຂອງຕົນ. ນອກຈາກນັ້ນ, ທ່ານຍັງໄດ້ສະແດງຄວາມຮູ້ບຸນຄຸນ ແລະ ຂອບໃຈທາງລັດຖະບານລາວກໍ່ຄືກະຊວງ ອຄ ທີ່ໄດ້ອຳນວຍຄວາມສະດວກໃຫ້ແກ່ການດຳເນີນທຸລະກິດຂອງຍີ່ປຸ່ນໄລຍະຜ່ານມາໃນ ສປປ ລາວ ພ້ອມທັງ ອວຍພອນໃຫ້ສາຍພົວພັນລະຫວ່າງ ສອງປະເທດຍືນຍົງຕະຫຼອດໄປ.
ທ່ານ ນາງ ເຂັມມະນີ ພົນເສນາ ຊົມເຊີຍຕໍ່ຜົນສໍາເລັດ ຂອງວຽກງານການຮ່ວມມືຂອງສອງຝ່າຍຜ່ານມາ ແລະ ຫວັງວ່າວຽກງານທີ່ທາງ ສະມາຄົມມິດຕະພາບ ໄຊຕະມະ ໄດ້ຕັ້ງເປົ້າໝາຍໄວ້ ຈະປະສົບຜົນສໍາເລັດໃນອານະຄົດ; ພ້ອມທັງ ສະແດງຄວາມດີໃຈທີ່ທາງສະມາຄົມໄຊຕະມະ ມາຢ້ຽມຢາມ ສປປ ລາວ ເທື່ອໃດກໍ່ໄດ້ມີການແວະວຽນຢ້ຽມຢາມກະຊວງ ອຄຂອງພວກເຮົາ ແລະ ຂອບໃຈທີ່ທາງສະມາຄົມກໍ່ຄືທາງລັດຖະ ບານຂອງຍີ່ປຸ່ນ ທີ່ໃຫ້ການຊ່ວຍເຫຼືອ ສປປ ລາວ ຖືເປັນປະເທດອັນດັບຕົ້ນໆ. ນອກຈາກນີ້, ຍີ່ປຸ່ນຍັງເປັນປະເທດທີີ່ມີການລົງທຶນໃນ ສປປ ລາວ ມີຈຳນວນຫຼາຍໂຄງການ, ຫຼາຍບໍລິສັດ ຊຶ່ງສະແດງອອກໃນມູນຄ່າການຄ້າປີ 2017 ເຫັນວ່າເພີ່ມຂຶ້ນ 10% ໂດຍມີບໍລິສັດຈາກຍີ່ປຸ່ນໄດ້ເຂົ້າລົງທຶນໃນເຂດເສດຖະກິດພິເສດຢູ່ແຂວງ ຈຳປາສັກ ເປັນຕົ້ນ. ພ້ອມດຽວກັນນີ້, ທ່ານລັດຖະມົນຕີ ຍັງໄດ້ກ່າວໃຫ້ສະມາຄົມໄຊຕະມະ ເປັນຂົວຕໍ່ຊັກຊວນເອົານັກທຸລະກິດເຂົ້າມາລົງ ທຶນໃນ ສປປ ລາວ ໃຫ້ນັບມື້ນັບເພີ່ມຂຶ້ນ.
ຕອນທ້າຍ, ຄະນະວິຊາການຝ່າຍຍີ່ປຸ່ນຍັງມີຄວາມສົນໃຈ ໃນການສ້າງຕັ້ງສະພາການຄ້າ ຍີ່ປຸ່ນ ປະຈຳລາວ ທ່ານ ລັດຖະມົນຕີ ໄດ້ແນະນຳໃຫ້ຝ່າຍຍີ່ປຸ່ນຕິດຕໍ່ພົວພັນ ກັບກົມກ່ຽວຂ້ອງເຊັ່ນ: ກົມການຄ້າພາຍໃນ ກະຊວງ ອຄ.
[ຂ່າວໂດຍ: ນາງ ຖື ]
