ຕອນບ່າຍ ເວລາ 3: 00 ໂມງ ຂອງວັນທີ 28 ກຸມພາ 2018 ທີ່ຫ້ອງຮັບແຂກຊັ້ນ 4 ຂອງກະຊວງອຸດຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ ຕ້ອນຮັບການຢ້ຽມຂໍ່ານັບ ທ່ານ Shin Sungsoon ເອກອັກຄະລັດຖະທູດຜູ້ມີອຳນາດເຕັມແຫ່ງ ສ. ເກົາຫຼີ ຄົນໃໝ່ ປະຈໍາ ສປປ ລາວ; ໂດຍມີຜູ້ຕາງໜ້າຈາກທັງສອງຝ່າຍເຂົ້າຮ່ວມ, ຈໍານວນ ທ່ານ;
ການເຂົ້າຢ້ຽມຂໍ່ານັບໃນຄັ້ງນີ້ ເປັນການມາແຈ້ງທີ່ໄດ້ມາຮັບໜ້າທີ່ຕໍາແໜ່ງທາງການທູດຢູ່ ສປປ ລາວ ທັງເປັນການເສີມຂະຫຍາຍການພົວພັນ ລະຫວ່າງ ສປປ ລາວ – ສ. ເກົາຫຼີ ພ້ອມທັງປຶກສາຫາລືຄວາມເຂົ້າໃຈການຮ່ວມມືດ້ານ ການຄ້າ, ການລົງທຶນ ເປັນຕົ້ນແມ່ນການຄ້າສອງຝ່າຍ ທີ່ມີມູນເຊື້ອອັນດີງາມຕະຫຼອດມາ ນອກນີ້ ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະເໜີໃຫ້ ສ. ເກົາຫຼີ ສືບຕໍ່ໃຫ້ການຊ່ວຍເຫຼືອລາວ ໂດຍສະເພາະແມ່ນວຽກງານ ການດໍາເນີນທຸລະກິດ ພ້ອມທັງສະໜັບສະໜູນໃຫ້ນັກລົງທຶນຈາກ ສ. ເກົາຫຼີ ມາລົງທຶນຢູ່ ສປປ ລາວຫຼາຍຂຶ້ນ.
ຕອນທ້າຍ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ຍັງຂອບໃຈມາຍັງທ່ານເອກອັກຄະລັດຖະທູດ ສ. ເກົາຫຼີ ປະຈໍາ ສປປ ລາວ ຄົນໃໝ່ ທີ່ໄດ້ໃຫ້ການປຶກສາຫາລືເປັນຢ່າງດີ.
ຂ່າວໂດຍ: ໄພຄໍາອີ ວິໄລຄໍາ
