ໃນລະຫວ່າງວັນທີ 28 ພຶດສະພາ ເຖີງ 15 ມີຖຸນາ 2016 ທີ່່ຜ່ານມາ ຫ້ອງການກະຊວງອຸດສະຫະກຳ ແລະ ການຄ້າ(ພະແນກສົ່ງເສີມຄວາມກ້າວໜ້າແມ່ຍິງ ແລະ ແມ່-ເດັກ) ໄດ້ປະສານງານຮ່ວມມືກັບ ໂຄງການຮ່ວມມືລາວສະຫະລັດອາເມ ລິກາເພື່ອການເຊື່ອມໂຍງສາກົນ ແລະ ອາຊຽນ (USAID LUNA II) ຈັດຕັ້ງຊຸດຝຶກອົບຮົມກ່ຽວກັບການຍ້ອມສີທຳມະຊາດ ແລະ ການຕະຫຼາດອອນລາຍ ໃຫ້ແກ່ຜູ້ປະກອບການຂະແໜງຫັດຖະກຳແຜ່ນແພຂອງ ແຂວງຊຽງຂວາງ ເປັນເວລາ 09 ວັນມີຜູ້ເຂົ້າຮ່ວມ 25 ທ່ານ, ແມ່ຍິງ 24 ທ່ານ, ຊາຍ 01 ທ່ານ ແລະ ແຂວງຫົວພັນ ເປັນເວລາ 09 ວັນ, ມີຜູ້ເຂົ້າຮ່ວມ 25 ທ່ານ, ຍິງ 22 ທ່ານ, ຊາຍ 03 ທ່ານ, ໂຄງການດັ່ງກ່າວໄດ້ຮັບການສະໜັບສະໜູນຈາກອົງການ USAID ໂດຍມີຈຸດ ປະສົງເພື່ອຍົກລະດັບຄວາມອາດສາມາດໃນການຜະລິດສິນຄ້າຫັດຖະກຳແຜ່ນແພຂອງທ້ອງຖິ່ນໃຫ້ມີຄຸນະພາບ ແລະ ສາ ມາດຂະຫຍາຍຕາໜ່າງການຕະຫຼາດໄປທົ່ວປະເທດ, ໄປສູ່ພາກພື້ນ ແລະ ສາກົນ, ເພື່ອສ້າງໂອກາດໃຫ້ແກ່ກຸ່ມຜູ້ປະກອບການຫັດຖະກຳແຜ່ນແພ ໄດ້ມີການແລກປ່ຽນບົດຮຽນ ແລະ ປະສົບການ ຊຶ່ງກັນ ແລະ ກັນ ກ່ຽວກັບການຜະລິດແຜ່ນແພຍ້ອມສີທຳມະຊາດໃນທ້ອງຖິ່ນ.
ການຝຶກອົບຮົມຄັ້ງນີ້ຄູຝຶກຈາກສູນພັດທະນາວິຊາຊີບຫ້ວຍຫົງສຳລັບແມ່ຍິງໄດ້ນຳເອົາຄວາມຮູ້ດ້ານເຕັກນິກວິຊາຊີບກ່ຽວກັບການຍ້ອມສີທຳມະຊາດແຕ່ລະຂັ້ນຕອນ ຖ່າຍຖອດໃຫ້ແກ່ຜູ້ເຂົ້າຮ່ວມດ້ວຍຄວາມເອົາໃຈໃສ່ໃນການປະຕິບັດຕົວຈິງເຊັ່ນ:
- ການກະກຽມວັດຖຸດິບ, ອຸປະກອນ ແລະ ຝ້າຍ, ໄໝ.
- ການຟອກ ຝ້າຍ ແລະ ໄໝ ໃຫ້ສະອາດກ່ອນການຍ້ອມ.
- ການຍ້ອມສີ ລວມທັງໝົດມີ 11 ສີ ໃນນີ້ມີສີປະສົມ 3 ສີ.
ການນຳໃຊ້ວັດຖຸດິບທີ່ນຳເອົາມາປຸງແຕ່ງເປັນສີແມ່ນສາມາດຫາໄດ້ງ່າຍຈາກທ້ອງຖິ່ນທົ່ວປະເທດ ຊຶ່ງປາສະຈາກການທຳລາຍສະພາບແວດລ້ອມ ແລະ ເປັນການນຳໃຊ້ພູມປັນຍາຂອງຄົນລາວ ເຂົ້າໃນການຜະລິດປຸງແຕ່ງໃຫ້ເປັນຜະລິດຕະພັນທີ່ມີມູນຄ່າ.
ນອກຈາກໄດ້ຮຽນຮູ້ການຍ້ອມສີທຳມະຊາດແລ້ວ ທິມງານຄູຝຶກການຕະຫຼາດອອນລາຍ ໄດ້ນຳເອົາຄວາມຮູ້ກ່ຽວກັບການຂາຍສິນຄ້າຜ່ານເອເລັກໂຕຼນິກເຊັ່ນ: ວ໋ອສແອັບ, ລາຍ, ເຟສບຸກ, ເພສ ແລະ ການສຳລະເງີນຊື້ສິນຄ້າທາງ BCEL One ໃຫ້ແກ່ຜູ້ເຂົ້າຮ່ວມດ້ວຍວິທີປະຕິບັດຕົວຈິງ, ຊຶ່ງບົດຮຽນດັ່ງກ່າວນີ້ກໍ່ເປັນທາງເລືອກໜຶ່ງທີ່ຊ່ວຍສ້າງຄວາມເຂັ້ມແຂງໃຫ້ແກ່ແມ່ຍິງຢູ່ເຂດຊົນນະບົດ ໄດ້ມີໂອກາດຊື້ຂາຍສິນຄ້າທ້ອງຖິ່ນຂອງຕົນ ຜ່ານສື່ອອນລາຍທີ່ທັນສະໄໝ ໃຫ້ສາມາດເຂົ້າເຖີງຕະຫຼາດພາຍໃນ ແລະ ຕ່າງປະເທດຢ່າງກ້ວາງຂວາງ ເພື່ອຊ່ວຍໃຫ້ການສ້າງເສດຖະກິດຄອບຄົວດີຂຶ້ນ ແລະ ພັດທະນາຊີວິດການເປັນຢູ່ໃຫ້ມີຄຸນນະພາບ ພ້ອມກັນຫຼຸດພົ້ນຈາກຄວາມທຸກຍາກເທື່ອລະກ້າວ.
ການຝຶກອົບຮົມໄດ້ສຳເລັດລົງຢ່າງເປັນທາງການ ໃນວັນທີ 15 ມີຖຸນາ 2018 ທ່ານ ນາງ ສົມໝາຍ ພົມມຸນີວົງ ຫົວໜ້າພະແນກສົ່ງເສີມຄວາມກ້າວໜ້າແມ່ຍິງ ແລະ ແມ່-ເດັກ, ຫ້ອງການກະຊວງອຸດສາຫະກຳ ແລະ ການຄ້າ ໃນນາມຜູ້ຮັບ ຜິດຊອບຈັດຕັ້ງປະຕິບັດກິດຈະກຳຂອງໂຄງການດັ່ງກ່າວໄດ້ຊີ້ແຈງໃຫ້ຊາບວ່າ: ພາຍຫຼັງສຳເລັດການຝຶກອົບຮົມແລ້ວຈະໄດ້ມີການສ້າງປຶ້ມຄູ່ມື ແລະ ແຜນດີວີດີ ກ່ຽວກັບການສາທິດວິທີຍ້ອມສີທຳມະຊາດ ເພື່ອເປັນການອານຸລັກ ພູມປັນຍາ ແລະ ວັດ ທະນະທຳ ຂອງຊາວລາວໄວ້ໃຫ້ແກ່ລຸ້ນສືບທອດໄດ້ນຳໃຊ້ຢ່າງມີປະສິດທິຜົນ ແລະ ມີຄວາມຍືນຍົງຕະຫຼອດໄປ.
ແຫຼ່ງຂໍ້ມູນໂດຍ: ທ່ານ ນາງ ສົມຫມາຍ ພົມມຸນີວົງ ຫົວໜ້າພະແນກສົ່ງເສີມຄວາມກ້າວໜ້າແມ່ຍິງ ແລະ ແມ່-ເດັກ, ຫ້ອງການກະຊວງອຸດສາຫະກໍາແລະ ການຄ້າ
ຂ່າວໂດຍ ພູຄໍາ ຫລວງສຸພົນ
