ຕອນເຊົ້າ ເວລາ 10: 00 ໂມງ ຂອງວັນທີ 4 ກໍລະກົດ 2018 ທີ່ຫ້ອງຮັບແຂກຊັ້ນ 4 ຂອງກະຊວງອຸດຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຕ້ອນຮັບການຢ້ຽມຂໍ່ານັບ ທ່ານ H.E. Mr. Kiattikhun Charprse, ເອກອັກຄະລັດຖະທູດຜູ້ມີອຳນາດເຕັມ ແຫ່ງຣາຊະອານາຈັກໄທ ຄົນໃໝ່ ປະຈໍາ ສປປ ລາວ; ໂດຍມີຜູ້ຕາງໜ້າຈາກທັງສອງຝ່າຍເຂົ້າຮ່ວມ, ຈໍານວນ 8 ທ່ານ;
ການເຂົ້າຢ້ຽມຂໍ່ານັບໃນຄັ້ງນີ້ ເປັນການມາແຈ້ງທີ່ທ່ານໄດ້ມາຮັບໜ້າທີ່ຕໍາແໜ່ງທາງການທູດຢູ່ ສປປ ລາວ ທັງເປັນການເສີມຂະຫຍາຍການພົວພັນ ລະຫວ່າງ ສປປ ລາວ – ກັບ ແຫ່ງ ຣາຊະອານາຈັກໄທ ພ້ອມທັງປຶກສາຫາລືຄວາມເຂົ້າໃຈການຮ່ວມມືດ້ານການຄ້າ, ການລົງທຶນ ເປັນຕົ້ນແມ່ນການຄ້າສອງຝ່າຍ ທີ່ມີມູນເຊື້ອອັນດີງາມຕະຫຼອດມາ.
ນອກນີ້ ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະເໜີໃຫ້ທ່ານເອກອັກຄະລັດຖະທູດ ແຫ່ງ ຣາຊະອານາຈັກໄທ ສືບຕໍ່ໃຫ້ການຊ່ວຍເຫຼືອລາວ ໂດຍສະເພາະແມ່ນວຽກງານ ການດໍາເນີນທຸລະກິດ ພ້ອມທັງສະໜັບສະໜູນໃຫ້ນັກລົງທຶນຈາກ ແຫ່ງ ຣາຊະອານາຈັກໄທ ມາລົງທຶນຢູ່ ສປປ ລາວ ຫຼາຍຂຶ້ນ.
ຕອນທ້າຍ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ຍັງຂອບໃຈມາຍັງທ່ານເອກອັກຄະລັດຖະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ຄົນໃໝ່ ທີ່ໄດ້ໃຫ້ການປຶກສາຫາລືເປັນຢ່າງດີ.
ຂ່າວໂດຍ: ໄພຄໍາອີ ວິໄລຄໍາ
