ໃນວັນທີ 17 ຕຸລາ 2018, ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກໍາ ແລະ ການຄ້າ ຮ່ວມກັບບໍລິສັດທີ່ປຶກສາກະສິກໍາ ແລະ ການເງິນ ແລະ ສູນບໍລິການ SME ໄດ້ຈັດຊຸດຝຶກອົບຮົມ ເພື່ອສ້າງຄວາມເຂັ້ມແຂງໃຫ້ແກ່ທະນາຄານ ພາຍໃຕ້ຂອບຂອງໂຄງການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ໃນຫົວຂໍ້ “ການປະເມີນຕະຫຼາດ SME, ການພັດທະນາຜະລິດຕະພັນການເງິນ, ການວິເຄາະຜູ້ກູ້ຢືມ ແລະ ຄວາມສ່ຽງສິນເຊື່ອ, ການບໍລິຫານຄວາມສ່ຽງສິນເຊື່ອ ແລະ ການຫລຸດຜ່ອນຄວາມສ່ຽງໜີ້ຊັກຊ້າ”. ພິທີເປີດການຝຶກອົບຮົມດໍາເນີນໄປ ໂດຍການເປັນປະທານຂອງທ່ານ ສົມດີ ອິນມີໄຊ, ຜູ້ຊ່ວຍວຽກງານຄະນະນຳກະຊວງ, ຜູ້ອຳນວຍ ການກອງທຶນສົ່ງເສີມ SME, ກະຊວງອຸດສາຫະກຳ ແລະ ການຄ້າ ມີຜູ້ເຂົ້າຮ່ວມທັງໝົດ 23 ທ່ານ ທີ່ມາຈາກ 5 ທະນາຄານຄື: ທະນາຄານລາວຈີນ, ທະນາຄານເອັສທີ, ທະນາຄານຊາຄອມແບັງລາວ, ທະນາຄານຮ່ວມທຸລະກິດລາວຫວຽດ ແລະ ທະນາຄານແຄນນາເດຍລາວ. ຊຸດຝຶກອົບຮົມໃນຄັ້ງນີ້ໄດ້ດຳເນີນໄປເປັນເວລາ 3 ວັນ ແລະ ປິດລົງໃນວັນທີ 19 ຕຸລາ 2018.
ສໍາລັບການຈັດຊຸດຝຶກອົບຮົມຄັ້ງນີ້ແມ່ນເປັນຄັ້ງທີ 5 ແລ້ວ ເຊິ່ງຊຸດ 1-3 ທີ່ຜ່ານມາແມ່ນຝຶກອົບຮົມໃຫ້ແກ່ບັນດາທະນາຄານທີ່ເຂົ້າຮ່ວມໂຄງການເຊັ່ນ: ທະນາຄານລາວຈີນ, ທະນາຄານເອັສທີ, ທະນາຄານຊາຄອມແບັງ ລາວ ແລະ ທະນາຄານຮ່ວມທຸລະກິດລາວຫວຽດ ແລະ ຄັ້ງທີ 4 ແມ່ນຝຶກໃຫ້ບັນດາທະນາຄານທີ່ຍັງບໍ່ໄດ້ເຂົ້າຮ່ວມໂຄງການ.
ຂາວໂດຍ: ກົມສົ່ງເສີມວິສາຫະກິດຂະໜາດນ້ອຍ ແລະ ກາງ
