ກົມສົ່ງເສີມການຄ້າ ຮ່ວມກັບອົງການ ສົ່ງເສີມການຄ້າຍີ່ປຸ່ນ, ຈັດກອງປະຊຸມສົ່ງເສີມການຄ້າຂອງບັນດາປະເທດອາຊີຂຶ້ນ ຄັ້ງທຳອິດໃນ ສປປ ລາວ ລະຫວ່າງ ວັນທີ 19-21 ພະຈິກ 2018 ທີ່ ນະຄອນຫຼວງວຽງຈັນ. ກ່ອນພິທີ ເປີດກອງປະຊຸມສົ່ງເສີມການຄ້າ ລະດັບຜູ້ບໍລິຫານ ຄັ້ງທີ່ 31, ທ່ານ ອາກາໂຫຊິ, ຮອງຫົວໜ້າອົງການ ເຈໂທຼ ໄດ້ເຂົ້າພົບປະຢ້ຽມຢາມ ທ່ານ ນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກໍາ ແລະ ການຄ້າ ໃນເວລາ 13:00, ວັນທີ 19 ພະຈິກ 2018. ທັງສອງຝ່າຍໄດ້ແລກປ່ຽນແນວທາງການຮ່ວມມືໃນວຽກງານສົ່ງເສີມການຄ້າລະຫວ່າງ ຍີ່ປຸ່ນ ແລະ ລາວ ໃຫ້ຫຼາຍຂຶ້ນໃນຕໍ່ໜ້າ ເພື່ອເປັນການສືບຕໍ່ເສີມຂະຫຍາຍໝາກຜົນການເຮັດວຽກຢ່າງຕັ້ງໜ້າຂອງສອງປະເທດ.
ທ່ານ ພັນທອງ ພິດທຸມມາ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ໃຫ້ກຽດກ່າວພິທີເປີດ ກອງປະຊຸມ. ເຂົ້າຮ່ວມງານຄັ້ງນີ້, ມີຜູ້ບໍລິຫານລະດັບສູງ ຈາກສະມາຊິກອົງການສົ່ງເສີມການຄ້າແຫ່ງທະວີບ ອາຊີ ແລະ ໂອເຊອານີ ທັງໝົດ 46 ທ່ານ ຈາກ 19 ປະເທດສະມາຊິກ.
ໃນຊ່ວງກ່າວພິທີເປີດກອງປະຊຸມ, ທ່ານ ພັນທອງ ພິດທຸມມາ, ຮອງລັດຖະມົນຕີ, ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ “ວຽກງານສົ່ງເສີມການຄ້າລາວ ມີຄວາມສຳຄັນຫຼາຍຕໍ່ການພັດທະນາເສດຖະກິດ ແລະ ສັງຄົມ. ວຽກງານຫຼັກຂອງອົງການດັ່ງກ່າວແມ່ນສົ່ງເສີມໃຫ້ຄົນພາຍໃນປະເທດ ມີຫົວຄິດປະດິດສ້າງໃນການຜະລິດສິນຄ້າ ເພື່ອຕະຫຼາດພາຍໃນ ແລະ ສົ່ງອອກ. ຕໍ່ກັບໜ້າທີ່ອັນສຳຄັນດັ່ງກ່າວ, ໄດ້ຜັກດັນແນວທາງນະໂຍບາຍການຫຼຸດຜ່ອນຄວາມທຸກຍາກ ແລະ ການສ້າງວຽກເຮັດງານທຳແກ່ປະຊາຊົນລາວ”
ນອກນີ້, ທ່ານ ໄຊສົມເພັດ ນໍຣະສິງຫ໌, ຮັກສາການຫົວໜ້າກົມສົ່ງເສີມການຄ້າລາວ, ທັງເປັນປະທານກອງປະຊຸມ ໄດ້ຂຶ້ນກ່າວ ໃນຫົວຂໍ້ “ ການຄ້າ ແລະ ເປົ້າໝາຍການພັດທະນາແບບຍືນຍົງ – ໃນກອບການພັດທະນາ ຂອງ ປະເທດລາວ – Trade and Sustainable Economic Development Goals – In the context of Laos” ຜ່ານບົດສະເໜີ, ໄດ້ລວມເອົາຍຸດທະສາດການພັດທະນາເສດຖະກິດໃຫ້ຕິດພັນກັບເປົ້າໝາຍການພັດທະນາແບບຍືນຍົງ, ວຽກງານຫຼັກຂອງກົມສົ່ງເສີມການຄ້າ ທີ່ຊຸກຍູ້ເປົ້າໝາຍ ການພັດທະນາແບບຍືນຍົງ ແລະ ຂົງເຂດທີ່ຍັງຕ້ອງໄດ້ປັບປຸງໃນຕໍ່ໜ້າ.
ທ່ານ ອາກາໂຫຊິ, ຮອງຫົວໜ້າອົງການ ອົງການສົ່ງເສີມການຄ້າຍີ່ປຸ່ນ, ໄດ້ເປັນປະທານຮ່ວມກອງປະຊຸມ ໄດ້ຂຶ້ນກ່າວໃນຫົວຂໍ້ “ຄວາມຮັບຜິດຊອບຂອງອົງການສົ່ງເສີມການຄ້າ ໃນຍຸກແຫ່ງການພັດທະນາແບບຍືນຍົງ – TPOs’ Responsibility in SDGs Era” ອົງການ ເຈໂທຼ, ໄດ້ສະແດງທັດສະນະສະໜັບສະໜູນວຽກງານ ການພັດທະນາແບບຍືນຍົງ. ໂດຍຖືເອົາການພັດທະນາຕະຫຼາດຮອງຮັບສິນຄ້າ ແລະ ການບໍລິການ ເປັນເສົາຫຼັກໃນການຂັບເຄື່ອນເສດຖະກິດ ໄປຕາມເປົ້າໝາຍຂອງການພັດທະນາແບບຍືນຍົງ. ທາງອົງການໄດ້ມີຫຼາຍກິດຈະກຳ ການພັດທະນາ ເປັນ ຕົ້ນຜັກດັນນະວັດຕະກຳໃໝ່, ຮ່ວມກັບອົງການສົ່ງເສີມການຄ້າທີ່ມີໃນແຕ່ລະປະເທດ ຄົ້ນຄວ້າຕະຫຼາດທ່າແຮງ, ກົດໝາຍ ແລະ ດຳລັດ. ໄດ້ເຮັດວຽກງານການຈັດພົບປະທຸລະກິດ, ທົດສອບຕະຫຼາດໃໝ່, ແລະ ຊອກຫາຄູ່ຄ້າທ່າແຮງທີ່ຕ່າງປະເທດ. ໃນອະນາຄົດຕໍ່ໜ້າ, ທາງອົງການ ເຈໂທຼ ຈະມີການຮ່ວມມືກັບບັນດາປະເທດສົ່ງເສີມການຄ້າ ໃນການສ້າງນະວັດຕະກຳໃໝ່ ເພື່ອໃຫ້ບັນລຸເປົ້າໝາຍການພັດທະນາແບບຍືນຍົງ ໃນປີ 2030.
ໃນວັນທີ 20 ພະຈິກ 2018, ຈະໄດ້ນຳພາຄະນະເຂົ້າຊົມຫ້ອງພິພິດຕະພັນ ແພງໃໝ, ເພື່ອເບິ່ງຮູບແບບການຜະລິດ ຫັດຖະກຳ ສີມືຄົນລາວ. ນອກນັ້ນ ບັນດາແຂກການນຳອົງການສົ່ງເສີມການຄ້າ ຈະໄດ້ເຂົ້າຊົມສະຖານ ທີ່ທາງວັດ ຖະນະທຳຄື: ວັດ ສີສະເກດ ແລະ ຫໍພະແກ້ວ ເພື່ອເປັນການສຶກສາປະຫວັດຄວາມເປັນມາຂອງວັດທະນະທຳລາວ ແລະ ຮູບແບບຫົວຄິດປະດິດສ້າງຄົນລາວໃນຍຸກໂບຮານ.
ວຽກງານສົ່ງເສີມການຄ້າ ຖືວ່າມີຄວາມສຳຄັນຫຼາຍ ແກ່ເສດຖະກິດຂອງຊາດ. ໃນລະດັບວິຊາການ, ກອງປະຊຸມຄັ້ງນີ້ຖືເປັນໂອກາດທີ່ດີໃຫ້ພະນັກງານສົ່ງເສີມການຄ້າ ໄດ້ມີໂອກາດ ແລກປ່ຽນປະສົບການສູງ ແລະ ຮຽນຮູ້ ນຳບັນດາ ອົງການສົ່ງເສີມການຄ້າທີ່ມີປະສົບການ. ລວມເອົາການສ້າງວຽກເຮັດງານທຳ, ສົ່ງເສີມໃຫ້ຄົນມີຫົວຄິດປະດິດສ້າງ ໃນວຽກງານການຜະ ລິດເພື່ອຕະຫຼາດ ແລະ ສົ່ງອອກ. ການຈັດກອງປະຊຸມຄັ້ງນີ້ ເປັນໂອກາດອັນດີ ໃຫ້ແກ່ ສປປ ລາວ ເຜີຍແຜ່ນະໂຍບາຍກ່ຽວກັບການພັດທະນາເສດຖະກິດສັງຄົມ, ວັດທະນະທຳ, ການຄ້າ, ການລົງທຶນ ແລະ ທ່ອງທ່ຽວ. ກໍ່ຄືນະໂຍບາຍສົ່ງເສີມການຄ້າແລກປ່ຽນກັບບັນດາປະເທດສະມາຊິກ ຕະຫຼອດເຖິງການສະແດງສາຍພົວພັນການຮ່ວມມື ໃນດ້ານວຽກງານສົ່ງເສີມການຄ້າ ກັບບັນດາປະເທດໃນອາຊີໃຫ້ຫຼາຍຂຶ້ນກວ່າເກົ່າໃນອະນາຄົດ.
ແຫຼ່ງຂ່າວໂດຍ: ກົມສົງເສີມການຄ້າ.
ຮຽບຮຽງຂ່າວໂດຍ: ພູຄໍາ ຫຼວງສຸພົນ
