ຕອນເຊົ້າ ເວລາ 9: 30 ໂມງ ຂອງວັນທີ 27 ພະຈິກ 2018 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ໄດ້ມີການຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Xu Xiangping, ຫົວໜ້າພະແນກການຄ້າ ແຂວງ Hu nan ສປ ຈີນ ພ້ອມດ້ວຍນັກທຸລະກິດ ເນື່ອງໃນໂອກາດທີ່ເດີນທາງຢ້ຽມຢາມ ສປປ ລາວ ແລະ ຖືໂອກາດນີ້ເຂົ້າຢ້ຽມຂໍ່ານັບ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ. ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 25 ທ່ານ.
ໃນໂອກາດນີ້ ສອງຝ່າຍໄດ້ປຶກສາຫາລື ແລະ ມີຄວາມເຂົ້າໃຈຮ່ວມກັນຫຼາຍດ້ານ ຄື: ດ້ານການຄ້າ, ການຮ່ວມມື, ການລົງທຶນ ແລະ ບັນດາໂຄງການທີ່ຢາກຈະມາລົງທຶນຢູ່ ສປປ ລາວ ແລະ ສ້າງຄວາມເຂົ້າໃຈ ລະຫ່ວາງ ສປປ ລາວ ກັບ ແຂວງ Hu nan, ນອກນັ້ນຍັງໄດ້ປຶກສາຫາລືຄວາມເປັນໄປໄດ້ຕໍ່ກັບນັກທຸລະກິດ ແຂວງ Hu nan, ທີ່ຈະມາລົງທຶນເຮັດທຸລະກິດຢູ່ ລາວ ໃນວຽກງານຫຼາຍດ້ານທີ່ປິ່ນອ້ອມເປັນພື້ນຖານໂຄງລ່າງ.
ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີ ຕໍ່ທ່ານ ຫົວໜ້າພະແນກການຄ້າ ແລະ ນັກທຸລະກິດ ແຂວງ Hu nan, ໃນການໃຫ້ຄວາມຮ່ວມມືເປັນຢ່າງດີ ແລະ ທ່ານ Xu Xiangping ກໍ່ສະແດງຄວາມຂອບໃຈມາຍັງ ທ່ານ ລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ດ້ວຍໄມຕີຈິດມິດຕະພາບແລະ ພ້ອມທັງໃຫ້ຄວາມສະດວກແກ່ຄະນະຝ່າຍຈີນ.
ຂ່າວໂດຍ: ໄພຄໍາອີ ວິໄລຄໍາ
