ໃນວັນທີ 27 ພະຈິກ 2018 ເວລາ 10:30 ໂມງ ທີ່ຫ້ອງຮັບແຂກກະຊວງອຸດສາຫະກໍາ ແລະ ການຄ້າ ໄດ້ຕ້ອນ ຮັບຄະນະທ່ານ ລີຍົງຊົນ ເອກອັກຄະລັດຖະທູດ ສປປ ເກົາຫລີ ປະຈຳລາວ ຄົນໃໝ່ ໃນໂອກາດທີ່ມາຮັບຕໍາແໜ່ງໃໝ່ ຢູ່ ສປປ ລາວ ໂດຍໃຫ້ກຽດຕ້ອນຮັບ ຄະນະດັ່ງກ່າວທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ພ້ອມດ້ວຍບັນດາກົມທີ່ກ່ຽວຂ້ອງ.
ທ່ານ ລັດຖະມົນຕີ ແລະ ທ່ານ ເອກອັກຄະລັດຖະທູດ ສປປ ເກົາຫລີ ປະຈຳລາວ ຄົນໃໝ່ຍັງໄດ້ເວົ້າເຖິງການພົວ ພັນສອງຝ່າຍ ສປປ ລາວ ແລະ ສປປ ເກົາຫລີ ໃນໄລຍະຜ່ານມາ ໄດ້ລົງນາມໃນສັນຍາການຄ້ານຳກັນໃນວັນທີ 02 ພຶດສະພາ 1997. ສັນຍາດັ່ງກ່າວປະກອບມີ 09 ມາດຕາ ທີ່ເວົ້າເຖິງຄວາມມຸ່ງໝັ້ນຂອງຄູ່ສັນຍາທີ່ຈະສຸມທຸກຄວາມສາມາດໃນການເສີມຂະຫຍາຍສາຍພົວພັນທາງການຄ້າ, ອຳນວຍຄວາມສະດວກໃຫ້ແກ່ການນຳເຂົ້າ-ສົ່ງອອກສິນຄ້າ, ຫລັກການປະຕິບັດແບບຊາດທີ່ໄດ້ຮັບອະນຸເຄາະຍິ່ງ (MFN), ການກຳນົດວິທີການຊື້-ຂາຍ, ການເຂົ້າຮ່ວມງານວາງສະແດງສິນຄ້າ, ການດັດແກ້ສັນຍາ ແລະ ການມີຜົນບັງຄັບໃຊ້.
ກົນໄກການປະສານງານລະຫວ່າງສອງຟ່າຍແມ່ນຜ່ານກອງປະຊຸມຄະນະກຳມາທິການຮ່ວມມືໃນຂົງເຂດເສດຖະກິດ, ການຄ້າ ທະຍາສາດ ແລະ ເຕັກໂນໂລຊີ ລະຫວ່າງ ສປປ ລາວ – ສປປ ເກົາຫ ຊຶ່ງຄັ້ງຫຼ້າສຸດແມ່ນ ຄັ້ງທີ 03 ຈັດຂຶ້ນໃນເດືອນ ທັນວາ 2014 ທີ່ນະຄອນຫຼວງວຽງຈັນ, ສປປ ລາວ ຊຶ່ງສາມາດ ຕົກລົງກັນໄດ້ຫຼາຍປະເດັນ ໂດຍສະເພາະປະເດັນທີ່ກ່ຽວກັບ ເສດຖະກິດການຄ້າ (ກອງປະຊຸມຄັ້ງທີ 04 ແມ່ນຍັງບໍ່ສາມາດຈັດໄດ້ເທື່ອ ເນື່ອງຈາກ ສປປ ເກົາຫຼີ ຖືກຂ້ວມບາດຈາກນາໆຊາດ).
ດ້ານການລົງທຶນປີ 2008-ປະຈຸບັນ ມີນັກລົງທຶນຈາກ ສປປ ເກົາຫລີ ແຈ້ງຂຶ້ນທະບຽນວິສາຫະກິດ ຈໍານວນ 19 ຂະແໜງ ການ ມູນຄ່າທຶນຈົດທະບຽນທັງໝົດ ຈຳນວນ 448,215,200,000 ກີບ. ໃນນັ້ນຂະແໜງການຕົ້ນຕໍທີ່ ສປປ ເກົາຫລີ ມາລົງທຶນແມ່ນ ການສະໜອງໄຟຟ້າ, ອາຍແກ໋ດ, ອາຍຮ້ອນ ແລະ ອາກາດປັບແຕ່ງ; ກະສິກໍາ, ປ່າໄມ້ ແລະ ການປະມົງ; ອຸດສາຫະກຳປຸງແຕ່ງ, ການກໍ່ສ້າງ; ການຄ້າຂາຍຍົກ ແລະ ຂາຍຍ່ອຍ; ສ້ອມແປງລົດຍົນ ແລະ ກົນຈັກ; ອຸດສາຫະກຳປຸງແຕ່ງ; ການເຄື່ອນໄຫວໃຫ້ທີ່ພັກເຊົາ ແລະ ບໍລິການອາຫານ; ການເຄື່ອນໄຫວກ່ຽວກັບສຸຂະພາບມະນຸດ ແລະ ວຽກງານທາງສັງຄົມ ແລະ ຂະແໜງການອື່ນໆ
ສຸດທ້າຍ ທ່ານ ລີຍົງຊົນ ເອກອັກຄະລັດຖະທູດ ສປປ ເກົາຫລີ ປະຈຳລາວ ຄົນໃໝ່ ໄດ້ກ່າວຂອບໃຈນໍາທ່ານລັດຖະມົນຕີກະຊວງອຸດສາຫະກໍາ ແລະ ການຄ້າ ທີ່ໃຫ້ການຕ້ອນຮັບເປັນຢ່າງດີ ແລະ ທ່ານ ລັດຖະມົນຕີ ຍັງໄດ້ກ່າວຂອບໃຈນໍາທ່ານເອກອັກຄະລັດຖະທູດ ສປປ ເກົາຫລີ ປະຈຳລາວ ຄົນໃໝ່ ທີ່ໃຫ້ຄວາມສໍາຄັນວຽກການຄ້າການລົງທຶນໃນ ສປປ ລາວ.
ຂ່າວໂດຍ: ພູຄໍາ ຫຼວງສຸພົນ
