ໃນເວລາ 15:30 ໂມງຂອງວັນທີ 29 ພະຈິກ 2018 ທີ່ຫ້ອງຮັບແຂກ ຊັ້ນ 4 ຂອງກະຊວງອຸດສາຫະກໍາ ແລະ ການຄ້າ ໄດ້ຕ້ອນຮັບຄະນະຜູ້ແທນບໍລິສັດ ອ່ານຮຸ່ຍ ວິສະວະກຳດ້ານໂທລະຄົມມະນາຄົມ ຈໍາກັດ ແຫ່ງ ສປ ຈີນ ຊຶ່ງນຳພາໂດຍທ່ານ Xie Zhaokai ສະມາຊິກຂອງຄະນະກໍາມະການພັກ, ເລຂາທິການຄະນະກໍາມະການລະບຽບວິໄນ, ຮອງຜູ້ອໍານວຍການບໍລິສັດ ທີ່ເຂົ້າຢ້ຽມຂໍ່ານັບລັດຖະລັດມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໂດຍໄດ້ຮັບການຕ້ອນຮັບຈາກທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ພ້ອມດ້ວຍ ທ່ານຮອງຫົວໜ້າຫ້ອງການ, ທ່ານຮອງຫົວໜ້າກົມແຜນການ ແລະ ການຮ່ວມມື ແລະ ວິຊາການທີ່ກ່ຽວຂ້ອງ ຈາກຝ່າຍລາວ ແລະ ຝ່າຍຈີນ ຈໍານວນທັງໝົດ 13 ທ່ານ.
ຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ແມ່ນເພື່ອລາຍງານຫຍໍ້ສະພາບການເຮັດວຽກ ຂອງຄະນະຊ່ຽວຊານ IT ຝ່າຍຈີນທີ່ໄດ້ຮ່ວມເຮັດວຽກນຳຄະນະວິຊາການຝ່າຍລາວ ເປັນເວລາ 15 ວັນ ຢູ່ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ໃນໂຄງການລັດຖະບານ ກໍ່ຄືກະຊວງການຄ້າ ແຫ່ງສປ ຈີນ ໃຫ້ການຊ່ວຍເຫຼືອລາວ ໃນການປັບປຸງລະບົບ IT ຂອງກະຊວງ ອຄ ມູນຄ່າ 8 ລ້ານໂດລາສະຫະລັດ, ພ້ອມທັງປຶກສາຫາລື ຂັ້ນຕອນໃນການເຮັດວຽກຮ່ວມກັນດ້ານເຕັກນິກວິຊາການຕໍ່ໜ້າ ແລະ ສະເໜີຕໍ່ຝ່າຍຈີນສຶກສາຄວາມເປັນໄປໄດ້ໃນການຫຍໍ້ໄລຍະເວລາ ຂອງໂຄງການໃຫ້ກະທັດຮັດຕື່ມ ຊຶ່ງແຜນກໍານົດໄວ້ເບື້ອງຕົ້ນແມ່ນຈະສໍາເລັດໃນປີ 2021 ແລະ ພໍດີກົງກັບໂຄງການກໍ່ສ້າງທາງລົດໄຟ ລາວ-ຈີນ ຄາດກະຈະສໍາເລັດພາຍໃນປີນັ້ນເຊັ່ນກັນ;
ພ້ອມດຽວກັນນີ້, ທ່ານ Xie Zhaokai ພ້ອມຄະນະ ໄດ້ກ່າວຄຳຂອບໃຈມາຍັງທ່ານລັດຖະມົນຕີ ກະຊວງ ອຄ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ມອບເຄື່ອງທີ່ລະນຶກ ທີ່ເປັນເອກກະລັກຂອງແຂວງອ່ານຮຸ່ຍ ແລະ ກະຕ່າດອກໄມ້;
ຕອນທ້າຍ, ທ່ານ ລັດຖະມົນຕີກະຊວງ ອຄ ຍັງໄດ້ກ່າວຂອບໃຈ ຕໍ່ທ່ານ Xie Zhaokai ພ້ອມຄະນະທີ່ໄດ້ມາຮ່ວມເຮັດວຽກນໍາໂຄງການປັບປຸງລະບົບ IT ຂອງກະຊວງ ອຄ ແລະ ຄວາມເປັນມິດຕະພາບລະຫວ່າງ ລາວ-ຈີນ ຈະຄົງຢູ່ຕະຫຼອດໄປ.
ຂ່າວໂດຍ: ນ ຖື ແຫວນວົງສົດ
