ກອງປະຊຸມຄັດເລືອກຄະນະບໍລິຫານງານຊຸດໃໝ່ຂອງສະມາຄົມນໍ້າມັນເຊື້ອໄຟ ແລະ ອາຍແກັສ ແຂວງຄຳມ່ວນ ໄດ້ຈັດຂຶ້ນໃນວັນທີ 12 ທັນວາ 2018 ຢູ່ທີ່ພະແນກອຸດສາຫະກຳ ແລະ ການຄ້າແຂວງ ໂດຍການເປັນປະທານຂອງ ທ່ານ ບຸນໂຮມ ມຸກດາສັກ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງ, ມີຕາງໜ້າສະພາອຸດສາ ຫະກຳ ແລະ ການຄ້າ ຕະຫລອດຮອດວິສາຫະກິດທີ່ກ່ຽວຂ້ອງເຂົ້າຮ່ວມ.
ທ່ານ ວົງສອນ ພິມມະວົງສາ ຫົວໜ້າລັດວິສາຫະກິດນໍ້າມັນເຊຶ້ອໄຟລາວສາຂາແຂວງຄຳມ່ວນໄດ້ຜ່ານບົດລາຍງານການເຄື່ອນໄຫວວຽກງານຂອງສະມາຄົມນໍ້າມັນເຊື້ອໄຟ ແລະ ອາຍແກັສ ໃນໄລຍະຜ່ານມາ ໂດຍສະເພາະແມ່ນສະພາບລວມທົ່ວໄປ, ດ້ານການຈັດຕັ້ງ ແລະ ການຄຸ້ມຄອງບໍລິຫານ, ການດຳເນີນທຸລະກິດຂອງສະມາຊິກພາຍໃນກຸ່ມ, ດ້ານການຄຸ້ມຄອງ ແລະ ການດຳເນີນທຸລະກິດ, ຂໍ້ສະດວກ – ຂໍ້ຫຍຸ້ງຍາກ ແລະ ວຽກອື່ນໆ . ສະເພາະປີ 2018 ມີຜູ້ປະກອບການທຸລະກິດນໍ້າມັນເຊື້ອໄຟທີ່ນຳເຂົ້າມາຈຳໜ່າຍພາຍໃນແຂວງມີທັງໝົດ 5 ບໍລິສັດ ຄື: ບໍລິສັດເຊື້ອໄຟລາວ, ເປໂຕຣຫວຽດນາມອອຍ, ເອເຊຍ, ລ້ານຊ້າງ ແລະ ເມືອງຫລວງ, ມີປໍ້າຕົວແທນຈຳໜ່າຍທັງໝົດ 101 ປ້ຳ. ພ້ອມນັ້ນກອງປະຊຸມຍັງໄດ້ປຶກສາຫາລື ປະກອບຄຳຄິດເຫັນເພື່ອຄວາມເປັນເອກະພາບກັນໃນຕໍ່ໜ້າ ແລະ ພ້ອມທັງຄັດເລືອກເອົາຄະນະບໍລິຫານງານຊຸດໃໝ່, ເຊິ່ງມີຜູ້ລົງສະໝັກຈຳນວນ 10 ທ່ານ, ກອງປະຊຸມເຫັນດີເປັນເອກະພາບຄັດເລືອກເອົາ 7 ທ່ານມີຄື : ທ່ານ ວົງສອນ ພິມມະວົງສາ ຫົວໜ້າລັດວິສາຫະກິດນໍ້າມັນເຊື້ອໄຟລາວສາຂາຄຳມ່ວນເປັນປະທານ, ທ່ານ ບຸນດີ ຈັນທະວົງ ຫົວໜ້າສາຂາບໍລິສັດນໍ້າມັນເຊຶ້ອໄຟເປໂຕຣຫວຽດນາມອອຍລາວ, ທ່ານ ນາງ ເພັດສະໜອນ ພົມມະໄຊສີ ຜູ້ອຳນວຍການໂຮງງານອຸດສາຫະກຳແກັສຄຳມ່ວນ ແລະ ທ່ານ ນາງ ສິມມະລີ ວົງໄຊ ຫົວໜ້າສາຂາບໍລິສັດນໍ້າມັນເຊື້ອໄຟເອເຊຍຈຳກັດ ເປັນຮອງ. ທ່ານ ໄຊອຳພອນ ພິມມະຈັກ, ທ່ານ ນາງ ຄຳສຸທະ ແສງດາລາ ແລະ ທ່ານນາງ ພອນທິບ ຊາພູວົງ ເປັນຄະນະຊຸດໃໝ່. ທັງນີ້ກໍ່ເພື່ອແນໃສ່ສ້າງຄວາມເຂັ້ມແຂງຮອບດ້ານ ແລະ ສະດວກໃນການຄຸ້ມຄອງຊີ້ນຳໆພາການເຄື່ອນໄຫວວຽກງານຂອງສະມາຄົມຕະຫລອດເຖິງສະມາຊິກໃຫ້ມີຄວາມເຂັ້ມແຂງຮອບດ້ານ ແລະ ດີຂຶ້ນເລື້ອຍໆ.
ຂ່າວ : ມະນີວັນ
ຮຽບຮຽງໂດຍ: ນ ຖື ແຫວນວົງສົດ
