ໂດຍຕອບສະໜອງ ການເຊື້ອເຊີນ ຂອງ ຝ່າຍລາວ, ຄະນະຜູ້ແທນ ຄະນະພັດທະນາ ແລະປະຕິຮູບ ແຫ່ງຊາດຈີນ ນຳໂດຍ ທ່ານ ຫນິງ ຈີເຈີ ( Ning Jizhe ) ຮອງປະທານ ຄະນະພັດທະນາ ແລະ ປະຕິຮູບ ແຫ່ງຊາດ ຈີນ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ແຕ່ວັນທີ 18-21 ກຸມພາ 2019. ຄະນະຜູ້ແທນ ສປ ຈີນ ເດີນທາງມາເຮັດວຽກຢູ່ນະຄອນຫຼວງວຽງຈັນ ໃນຄັ້ງນີ້ປະກອບມີ ຄະນະພັດທະນາ ແລະ ປະຕິຮູບ ແຫ່ງຊາດຈີນ, ສູນແລກປ່ຽນເສດຖະກິດສາກົນ ສປ ຈີນ, ບໍລິສັດທາງລົດໄຟ ແຫ່ງຊາດຈີນ, ທະນາຄານຂາອອກ-ຂາເຂົ້າ ແຫ່ງຊາດຈີນ, ຄະນະພັດທະນາ ແລະ ປະຕິຮູບແຂວງຢູນນານ ແລະ ກຸ່ມບໍລິສັດວິສາວະກຳກໍ່ສ້າງ ລົງທຶນ ຢູນນານ ສປ ຈີນ.

      ຈຸດປະສົງການມາຢ້ຽມຢາມ ແລະ ເຮັດວຽກ ຄັ້ງນີ້ ຕົ້ນຕໍແມ່ນເພື່ອປຶກສາຫາລື ກັບ ຝ່າຍລາວ ກ່ຽວກັບ ແຜນແມ່ບົດການຮ່ວມມືແລວທາງເສດຖະກິດ ລາວ-ຈີນ, ສັນຍາຄວາມອາດສາມາດການຜະລິດ ແລະ ການລົງທຶນ, ຕິດຕາມຊຸກຍູ້ໂຄງການທາງລົດໄຟ ລາວ-ຈີນ ແລະ ວຽກງານຮ່ວມມືດ້ານເສດຖະກິດ, ການຄ້າ-ເຕັກນິກອື່ນໆ. ໃນຄັ້ງນີ້: ແມ່ນເພື່ອມາພົບປະເຮັດວຽກ ກັບ ກະຊວງກ່ຽວຂ້ອງຄື: ກະຊວງແຜນການ ແລະ ການລົງທຶນ, ກະຊວງ ໂຍທາທິການ ແລະ ຂົນສົ່ງ ແລະ ພົບປະກັບ ຄະນະກຳມະການຮ່ວມມື ລາວ-ຈີນ.

     ຕອນເຊົ້າ ຂອງວັນທີ 19 ກຸມພາ 2019 ຄະນະຜູ້ແທນຈີນ ໄດ້ເຂົ້າພົບປະເຮັດວຽກ ກັບ ທ່ານ ປອ ສຸພັນ ແກ້ວມີໄຊ ລັດຖະມົນຕີ ກະຊວງ ແຜນການ ແລະ ການລົງທຶນ ກ່ຽວກັບ ແຜນຮ່ວມມືແລວທາງເສດຖະກິດ ລາວ-ຈີນ, ສັນຍາຄວາມອາດສາມາດການຜະລິດ ແລະ ການລົງທຶນ ແລະ ປຶກສາຫາລືການຮ່ວມມື ລະຫວ່າງ ກະຊວງ ແຜນການ ແລະ ການລົງທຶນ ສປປ ລາວ ກັບ ຄະນະພັດທະນາ ແລະ ປະຕິຮູບ ແຫ່ງຊາດ ສປ ຈີນ.

     ຕອນບ່າຍ ຂອງວັນດຽວກັນ ຄະນະຜູ້ແທນ ໄດ້ເຂົ້າພົບປະເຮັດວຽກ ທ່ານຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ກ່ຽວກັບ ການຕິດຕາມ ແລະ ຊຸກຍູ້ໂຄງການກໍ່ສ້າງທາງລົດໄຟລາວ-ຈີນ ແລະ ວຽກງານສໍາຄັນອື່ນໆໃນຂົງເຂດກ່ຽວຂ້ອງ.

      ຄະນະໄດ້ເຂົ້າພົບປະ ແລະ ເຮັດວຽກກັບ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ, ປະທານ ຄະນະກຳມະການຮ່ວມມືລາວ-ຈີນ ເພື່ອປຶກສາຫາລື ການກະຕຸກຊຸກຍູ້ການຮ່ວມມືດ້ານເສດຖະກິດ, ການຄ້າ ແລະ ເຕັກນິກ ລະຫວ່າງ ສອງປະເທດ. ໄປພ້ອມກັນນັ້ນ ຄະນະຜູ້ແທນ ໄດ້ເດີນທາງໄປຢ້ຽມຢາມ ຫ້ອງການ ພາກສະໜາມ ໂຄງການທາງດ່ວນ ນະຄອນຫຼວງວຽງຈັນ-ວັງວຽງ ແລະ ໄປຢ້ຽມຢາມໂຄງການທາງລົດໄຟລາວ-ຈີນ; ໂດຍໄດ້ຢ້ຽມຢາມສໍານັກງານໃຫຍ່-ໂຮງງານຜະລິດຄານທາງລົດໄຟ ແລະ ຈຸດກໍ່ສ້າງທີ່ສໍາຄັນຈໍານວນໜຶ່ງຂອງໂຄງການ. 

     ຄະນະໄດ້ເຂົ້າຢ້ຽມຂໍ່ານັບກັບ ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ.

     ສຸດທ້າຍຄະນະຝ່າຍຈີນ ໄດ້ເຂົ້າຢ້ຽມຂໍ່ານັບ ທ່ານ ທອງລຸນ ສີສຸລິດ ນາຍົກລັດຖະມົນຕີ, ໃນໂອກາດນີ້ ທ່ານ ຫນິງ ຈີເຈີ ກໍ່ໄດ້ລາຍງານ ຜົນການປຶກສາຫາລື ກ່ຽວກັບແຜນແມ່ບົດການຮ່ວມມືແລວທາງເສດຖະກິດ ລາວ-ຈີນ, ສັນຍາຄວາມອາດສາມາດການຜະລິດ ແລະ ການລົງທຶນ, ຕິດຕາມຊຸກຍູ້ໂຄງການທາງລົດໄຟ ລາວ-ຈີນ ແລະ ວຽກງານຮ່ວມມືດ້ານເສດຖະກິດ, ການຄ້າ-ເຕັກນິກອື່ນໆ ແລະ ທ່ານ ນາຍົກລັດຖະມົນຕີກໍ່ເຫັນດີຕໍ່ຜົນການປຶກສາຫາລືດັ່ງກ່າວ.

ຂ່າວໂດຍ: ນ ບົວແກ້ວ ວົງສາ

ຮູບພາບ ແລະ ຮຽບຮຽງໂດຍ: ນ ຖື ແຫວນວົງສົດ