ກົົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ຮ່ວມກັບ ພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ຈັດກອງປະຊຸມວິຊາການ ກະກຽມແຜນຍຸດທະສາດພັດທະນາສິນຄ້າ ໜຶ່ງເມືອງ ໜຶ່ງຜະລິດຕະພັນ ແຫ່ງຊາດ ແລະ ສິນຄ້າທ່າແຮງ ຂຶ້ນລະຫວ່າງ ວັນທີ 26-28 ມີນາ 2019 ທີ່ຫ້ອງປະຊຸມພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ.
ໂດຍໃຫ້ກຽດເປັນປະທານ ທ່ານ ພັນທອງ ພິດທຸມມາ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ມີ ທ່ານ ຄຳຕັນ ສົມພັນວິໄລ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງຫຼວງພະບາງ, ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ພ້ອມດ້ວຍຜູ້ຕາງໜ້າພະແນກອຸດສາຫະກຳ ແລະ ການຄ້າ 9 ແຂວງ ແລະ ນະຄອນຫຼວງວຽງຈັນ ມີບັນດາຫົວໜ່ວຍ ໂອດັອບ (ODOP) ໄດ້ນຳເອົາສິນຄ້າໂອດັອບ ມາວາງສະແດງ ແລະ ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ, ແຂກເຂົ້້າຮ່ວມທັງໝົດ 41 ທ່ານ.
ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອປຶກສາຫາລືແລກປ່ຽນຂໍ້ມູນຂ່າວສານກ່ຽວກັບຜະລິດຕະພັນໂອດັອບ ພ້ອມທັງເຜີຍແຜ່ນິຕິກຳໂອດັອບແຫ່ງຊາດ, ຍຸດທະສາດການພັດທະນາສິນຄ້າ, ຜົນການລົງປະເມີນຫົວໜ່ວຍໂອດັອບແຫ່ງຊາດ ແລະ ແຜນການຈັດຕັ້ງປະຕິບັດໃນຕໍ່ໜ້າ, ການພັດທະນາສິນຄ້າ, ການຫຸ້ມຫໍ່, ການອອກແບບ ແລະ ການຕິດສະຫຼາກສິນຄ້າ, ການພັດທະນາສິນຄ້າໃຫ້ເຂົ້າຕະຫຼາດຜ່ານອີເລັກໂຕນິກ (ຕະຫຼາດອອນລາຍ) ແລະນະໂຍບາຍການເຂົ້າຫາແຫຼ່ງທຶນ. ນອກຈາກນີ້ ຍັງມີການສົນທະນາຖາມ-ຕອບ ແລະ ນຳສະເໜີຜົນຂອງການເຮັດວຽກເປັນກຸ່ມ ຂອງຜູ້ເຂົ້າຮ່ວມ ຊຶ່ງກອງປະຊຸມຈະດຳເນີນເປັນເວລາ 3 ວັນ.
ພາຍຫຼັງ ສິ້ນສຸດກອງປະຊຸມໃນມື້ທໍາອິດ ທ່ານພັນທອງ ພິດທຸມມາ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ພ້ອມດ້ວຍຜູ້ເຂົ້າຮ່ວມກອງປະຊຸມ ໄດ້ຢ້ຽມຊົມສິນຄ້າ ໂອດັອບ ແລະ ສິນຄ້າທ່າແຮງ ຂອງ 7 ແຂວງພາກເໜືອທີ່ນໍາມາວາງສະແດງ ຢູ່ພະແນກ ອຄ ແຂວງຫຼວງພະບາງ.
ພາບ ແລະ ຂ່າວໂດຍ: ທ ແສງວິລັດ ຍົດສະຫວັດ ພະແນກ ອຄ ຫຼວງພະບາງ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
