ຕອນເຊົ້າຂອງວັນທີ 11 ມິຖຸນາ 2019, ທີ່ໂຮງແຮມ ເມືອງແທ່ງ, ນະຄອນຫລວງວຽງຈັນ ໄດ້ຈັດກອງປະຊຸມຄັ້ງປະຖົມມະລຶກ ຄະນະກໍາມະການຄວບຄຸມການແຂ່ງຂັນທາງທຸລະກິດ (ຄຂທ) ຂຶ້ນ, ພາຍໃຕ້ການເປັນປະທານຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ຊຶ່ງປະກອບດ້ວຍບັນດາຜູ້ຕາງໜ້າຈາກພາກສ່ວນກ່ຽວຂ້ອງ ທີ່ຖືກແຕ່ງຕັ້ງເປັນສະມາຊິກຄະນະກຳມະການຄວບຄຸມການແຂ່ງຂັນທາງທຸລະກິດຂອງ ສປປ ລາວ ຈຳນວນ 11 ທ່ານ ແລະ ພະນັກງານວິຊາການທີ່ຖືກແຕ່ງຕັ້ງເປັນຈຸດປະສານງານວຽກງານແຂ່ງຂັນທາງທຸລະກິດ ຈາກຂະແໜງການຕ່າງໆ ລວມທັງໝົດຈຳນວນ 35 ທ່ານ. ກອງປະຊຸມດັ່ງກ່າວ ແມ່ນໄດ້ຮັບການສະໜັບສະໜູນຈາກອົງການ GIZ.
ກອງປະຊຸມຄັ້ງປະຖົມມະລຶກ ແມ່ນເປັນເວທີໃນການພົບປະ ແລະ ແລກປ່ຽນຄວາມຄິດເຫັນລະຫວ່າງ ຄຂທ ດ້ວຍກັນ ພ້ອມທັງໄດ້ຜ່ານ 03 ເອກະສານພື້ນຖານ ຄື:
- ຮ່າງຂໍ້ຕົກລົງວ່າດ້ວຍພາລະບົດບາດ, ສິດ ແລະ ໜ້າທີ່ຂອງ ຄຂທ
- ຮ່າງຂໍ້ຕົກລົງວ່າດ້ວຍຫ້ອງການກອງເລຂາຂອງ ຄຂທ
- ແຜນການຈັດຕັ້ງປະຕິບັດວຽກງານແຂ່ງຂັນທາງທຸລະກິດຂອງ ຄຂທ ປີ 2019
ບັນດາເອກະສານດັ່ງກ່າວ ແມ່ນຈະເປັນເອກະສານພື້ນຖານທີ່ສໍາຄັນໃນການຈັດຕັ້ງປະຕິບັດວຽກງານແຂ່ງ ຂັນທາງທຸລະກິດໃນຕໍ່ໜ້າ. ນອກນັ້ນຜູ້ເຂົ້າຮ່ວມໄດ້ພ້ອມກັນຮັບຟັງການບັນຍາຍ ກ່ຽວກັບສະພາບການພັດທະນາວຽກງານແຂ່ງຂັນທາງທຸລະກິດໃນລາວ.
ໃນກອງປະຊຸມ ທ່ານ ຂັວນໃຈ ອ່ຽມສຸທິ, ຮອງຫົວໜ້າກົມການຄ້າພາຍໃນ, ກະຊວງອຸດສາຫະກຳ ແລະ ການຄ້າ ໄດ້ລາຍງານຄວາມຄືບໜ້າ ວຽກງານແຂ່ງຂັນທາງທຸລະກິດ ຂອງ ສປປ ລາວ ແລະ ນຳສະເໜີບາງບັນຫາທີ່ເປັນສິ່ງທ້າທາຍ ເພື່ອແລກປ່ຽນຄຳຄິດເຫັນໃນທີ່ປະຊຸມ ພ້ອມທັງໄດ້ຮັບຟັງການບັນຍາຍຈາກ ທ່ານ ສີຟອງ ສຸໂມນທາ, ຮອງຫົວໜ້າພະແນກຄຸ້ມຄອງການແຂ່ງຂັນທາງທຸລະກິດ ໂດຍໄດ້ລົງເລິກກ່ຽວກັບການກຳນົດລາຄາ, ການຕົກລົງກັນເພື່ອຊະນະການປະມູນ. ນອກຈາກນີ້, ກອງປະຊຸມຍັງໄດ້ຮັບຟັງການບັນຍາຍຂອງຊ່ຽວຊານອົງການ GIZ ຊຶ່ງເພິ່ນໄດ້ມາແລກປ່ຽນບົດຮຽນກ່ຽວກັບວຽກງານແຂ່ງຂັນທາງທຸລະກິດ ແລະ ນຳສະເໜີກ່ຽວກັບໂຄງການ Complete ທີ່ກໍາລັງຈັດຕັ້ງປະຕິບັດໃນປະຈຸບັນ ແລະ ໃນຕໍ່ໜ້າ. ຈາກນັ້ນ ຜູ້ເຂົ້າຮ່ວມກໍໄດ້ມີການແລກປ່ຽນບົດຮຽນຄວາມເຂົ້າໃຈໃນວຽກງານແຂ່ງຂັນທາງທຸລະກິດຢ່າງມີບັນຍາກາດຟົດຟື້ນ ເນື່ອງຈາກວຽກງານນີ້ ເປັນວຽກທີ່ໃໝ່ ແລະ ມີຄວາມສັບສົນສົມຄວນ ຊຶ່ງຕິດພັນກັບການນຳໃຊ້ກົດໝາຍ ແລະ ຫຼັກເສດຖະສາດ ເພື່ອມາຊ່ວຍຮັບປະກັນການແຂ່ງຂັນທີ່ເປັນທຳ ໃຫ້ກັບການເຄື່ອນໄຫວຂອງຫົວໜ່ວຍທຸລະກິດໃນທຸກຂົງເຂດ.
ຈາກການແລກປ່ຽນຄວາມຄິດເຫັນ ຂອງບັນດາທ່ານໃນກອງປະຊຸມ ໃສ່ບັນດາເອກະສານຕ່າງໆ ເຫັນວ່າ ວຽກງານແຂ່ງຂັນທາງທຸລະກິດ ມີຄວາມຈໍາເປັນ ແລະ ສໍາຄັນ ຕໍ່ການພັດທະນາເສດຖະກິດ ໂດຍສະເພາະການສົ່ງເສີມການດຳເນີນທຸລະກິດ ໃນ ສປປ ລາວ, ແຕ່ກໍ່ມີສິ່ງທ້າທາຍຫຼາຍຢ່າງທີ່ຈະຕ້ອງໄດ້ກຽມພ້ອມ ໃນການຈັດຕັ້ງປະຕິບັດບັນດາກິດຈະກໍາ ແລະ ແຜນວຽກໃນຕໍ່ໜ້າ.
ແຫຼ່ງຂ່າວໂດຍ: ກົມການຄ້າພາຍໃນ
ຮຽບຮຽງໂດຍ: ພູຄໍາ ຫລວງສຸພົນ
