ຕອນບ່າຍ ເວລາ 3: 30 ໂມງ ຂອງວັນທີ 15 ສິງຫາ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ; ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບອໍາລາຂອງ ທ່ານ Mikhail Baranov, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສະຫະພັນຣັດເຊຍ ມີສໍານັກງານສະຖານທູດທີ່ຕັ້ງຢູ່ ສປປ ລາວ ໃນໂອກາດທ່ານສໍາເລັດການປະຕິບັດໜ້າທີ່ທາງການທູດປະຈໍາຢູ່ ສປປ ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 8 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Mikhail Baranov, ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດໃຫ້ແກ່ສອງປະເທດ ລາວ-ຣັດເຊຍ ທີ່ມີສາຍພົວພັນຮ່ວມມືທີ່ດີນັບມື້ນັບແໜ້ນແຟ້ນຍິ່ງຂຶ້ນຫຼາຍດ້ານ ແລະ ຕີລາຄາສູງຕໍ່ການຊ່ວຍເຫຼືອໃຫ້ແກ່ລາວເປັນຕົ້ນດ້ານການສຶກສາ ແລະ ຝຶກແອບດ້ານການທະຫານໃຫ້ແກ່ລາວ ສະແດງອອກຫຼາຍທ່ານທີ່ເປັນການນຳລາວ ໃນປັດຈຸບັນນີ້ກໍ່ໄດ້ຮຽນຈົບການສຶກສາຈາກຣັດເຊຍ ແລະ ການຮ່ວມມືທາງດ້ານການຄ້າ ການລົງທຶນໃຫ້ແກ່ເສດຖະກິດຂອງລາວ, ນອກນັ້ນຍັງເປັນຄູ່ຄ້າຮ່ວມກັນ ເປັນຕົ້ນສິນຄ້າການນຳເຂົ້າ-ສົ່ງອອກ ແຕ່ຕົວເລກທາງດ້ານສະຖິຕິການຄ້າຮ່ວມກັນຍັງຕໍ່າ ຂໍສະເໜີໃນຕໍ່ໜ້າໃຫ້ມີການຄ້າຮ່ວມກັນຫຼາຍຂຶ້ນ, ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ນອກນັ້ນຍັງເປັນຄູ່ຮ່ວມມືທີ່ດີໃນໄລຍະຜ່ານ. ທັງສອງຝ່າຍສືບຕໍ່ຮ່ວມມືພັດທະນາເສດຖະກິດ-ສັງຄົມ ວຽກງານປ້ອງກັນຊາດປ້ອງກັນຄວາມສະຫງົບ ແລະ ວຽກງານອື່ນໆໃນຕໍ່ໜ້າໃຫ້ດີຂຶ້ນກ່ວາເກົ່າ.
ທ່ານ Mikhail Baranov, ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈທີ່ໄດ້ດໍາລົງຕໍາແໜ່ງເປັນເອກອັກຄະລັດຖະທູດຜູ້ມີອໍານາດເຕັມແຫ່ງ ຣັດເຊຍ ປະຈໍາ ສປປ ລາວ ແລະ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ໃນໄລຍະຜ່ານມາທີ່ອໍານວຍຄວາມສະດວກໃຫ້ແກ່ຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ຍັງອວຍພອນໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນກ່ວາເກົ່າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
