ຕອນເຊົ້າ ເວລາ 8: 30 ໂມງ ຂອງວັນທີ 26 ກັນຍາ 2019 ພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ ໄດ້ເປັນເຈົ້າພາບຈັດກອງປະຊຸມແຜນການຮ່ວມມືດ້ານການຄ້າ ການຄ້າຊາຍແດນ ລາວ-ຫວຽດນາມ ລະຫວ່າງ ພະແນກອຸດສາຫະກຳ ແລະ ການຄ້າແຂວງ (ຫຼວງພະບາງ, ອຸດົມໄຊ, ຫຼວງນ້ຳທາ, ໄຊຍະບູລີ, ບໍ່ແກ້ວ, ຜົ້ງສາລີ) ແຫ່ງ ສປປ ລາວ ກັບ ພະແນກອຸດສາຫະກຳ ແລະ ການຄ້າ ແຂວງດຽນບຽນ ສສ ຫວຽດນາມ ຂຶ້ນທີ່ພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ ຊຶ່ງຝ່າຍລາວນຳໂດຍ ທ່ານ ສົມສັກ ບຸນມາເພັດ, ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ສປປ ລາວ ແລະ ຝ່າຍຫວຽດນາມ ນຳໂດຍ ທ່ານ ຫງຽນ ວັ່ນ ເຕື໋ອງ ກໍາມະການພັກແຂວງ, ຫົວໜ້າພະແນກອຸດສາຫະກໍາ ແລະ ການຄ້າແຂວງ ດຽນບຽນ ແຫ່ງ ສສ ຫວຽດນາມພ້ອມດ້ວຍຄະນະ ແລະ ມີຜູ້ຕາງໜ້າຄະນະທັງສອງຝ່າຍ ເຂົ້າຮ່ວມປະມານ 50 ກວ່າທ່ານ.
ຈຸດປະສົງກອງປະຊຸມໃນຄັ້ງນີ້ ໄດ້ຜັນຂະຫຍາຍການປະຕິບັດບັນດາເນື້ອໃນ ທີ່ໄດ້ເຊັນກັນ ແລະ ໄດ້ຮັບຜົນສຳເລັດ ຢ່າງຕັ້ງໜ້າ ສືບຕໍ່ຮັກສາສາຍພົວພັນຮ່ວມມືມິດຕະພາບ ແລະ ພັດທະນາດ້ານອຸດສາຫະກຳ ແລະ ການຄ້າ ລະຫວ່າງພະແນກ ອຸດສາຫະກຳ ແລະ ການຄ້າແຂວງດຽນບຽນ ແລະ ພະແນກອຸດສາຫະກຳ ແລະ ການຄ້າ 6 ແຂວງພາກເໜືອຂອງ ສປປ ລາວ ໂດຍໄດ້ປະຕິບັດຖືກຕ້ອງຕາມແນວທາງຂອງພັກ, ກົດໝາຍຂອງລັດ ແລະ ຜັນຂະຫຍາຍປະຕິບັດເນື້ອໃນຮ່ວມມືທີ່ກະຊວງອຸດສາຫະກຳ ແລະ ການຄ້າ ຂອງສອງຝ່າຍ ທີ່ໄດ້ປະຕິບັດຮ່ວມກັນ ໃນປີ 2017.
ໃນກອງປະຊຸມ ທ່ານ ສົມສັກ ບຸນມາເພັດ, ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ຕາງໜ້າຝ່າຍລາວ ໄດ້ລາຍງານຕໍ່ກອງປະຊຸມວ່າ: ໄລຍະ 2 ປີ ຜ່ານມາ ແຕ່ເດືອນ 06/2017- 06/2019 ລວມຍອດມູນຄ່າການຄ້າ 2 ຝ່າຍ ລະຫວ່າງແຂວງ 6 ແຂວງພາກເໜືອຂອງ ສປປ ລາວ ແລະ ແຂວງ ດຽນບຽນ ສສ ຫວຽດນາມ ປະຕິບັດໄດ້ 105,25 ລ້ານ ໂດລາ, ໃນນັ້ນການສົ່ງອອກ 6 ແຂວງພາກເໜືອແມ່ນ 38 ລ້ານ ໂດລາ ແລະ ນໍາເຂົ້າຈາກແຂວງດຽນບຽນແມ່ນ 71,4 ລ້ານ ໂດລາ; ໃນນີ້, ມູນຄ່າການຄ້າແຕ່ລະແຂວງມີຄື: ຜົ້ງສາລີ 30,1 ລ້ານ ໂດລາ, ອຸດົມໄຊ 35,1 ລ້ານ ໂດລາ, ຫຼວງພະບາງ 34,15 ລ້ານ ໂດລາ, ຫຼວງນໍ້າທາ 5,9 ລ້ານ ໂດລາ, ໄຊຍະບູລີ 570.952 ໂດລາ. ການສົ່ງອອກສິນຄ້າຂອງແຕ່ລະແຂວງໄປດຽນບຽນສ່ວນຫຼາຍແມ່ນ: ສາລີ, ເຂົ້າເປືອກໜຽວ, ຜົນຜະລິດກະສິກໍາ ແລະ ເຄື່ອງປ່າຂອງດົງ, ໄມ້ສັກສໍາເລັດຮູບ ແລະ ເຄິ່ງສໍາເລັດຮູບ ແລະ ການນໍາເຂົ້າສິນຄ້າຈາກດຽນບຽນແມ່ນ: ຊີມັງ, ເຫຼັກເສັ້ນ, ເຄື່ອງໃຊ້ໄຟຟ້າ, ເຄື່ອງອຸປະໂພກ-ບໍລິໂພກ, ອຸປະກອນກໍ່ສ້າງ, ຝູ່ນປຸ໋ຍ.
ການສົ່ງເສີມພັດທະນາສິນຄ້າ ຕະຫຼາດສິນຄ້າທັງສອງຝ່າຍລະຫວ່າງແຂວງ ດຽນບຽນ ແລະ 6 ແຂວງພາກເໜືອຂອງ ສປປ ລາວ ໂດຍນໍາໃຊ້ກົນໄກປຸກລະດົມໃຫ້ທຸລະກິດພາຍໃນແຂວງຂອງຕົນ ໄປເຂົ້າຮ່ວມງານຕະຫຼາດນັດໃນງານວັນບູນສໍາຄັນຕ່າງໆ ຂອງສອງຝ່າຍ ລາວ-ຫວຽດນາມເຊັ່ນ: ຕະຫຼາດນັດການຄ້າສາກົນພາກເໜືອ ຢູ່ນະຄອນດຽນບຽນຟູ, ຕະຫຼາດນັດເທດສະການດອກງິ້ວປ່າ ທີ່ເມືອງຕົ້ນເຜິ້ງ ແຂວງບໍ່ແກ້ວ, ຕະຫຼາດນັດການຄ້າແຂວງອຸດົມໄຊ, ຕະຫຼາດນັດຊາຍແດນເມືອງຍ໋າ – ເມືອງໂພນທອງ ລະຫວ່າງແຂວງ ຫຼວງພະບາງ – ດຽນບຽນ, ຕະຫຼາດນັດຊາຍແດນເມືອງນໍ້າໂພລະຫວ່າງແຂວງ ຜົ້ງສາລີ-ດຽນບຽນ, ຕະຫຼາດນັດວາງສະແດງສິນຄ້າ ໜຶ່ງເມືອງ ໜຶ່ງຜະລິດຕະພັນ ທີ່ແຂວງຫຼວງນໍ້າທາ ແລະ ແຂວງ ຫຼວງພະບາງ.
ນອກນີ້ໃນໄລຍະຜ່ານມາ ສອງຝ່າຍໄດ້ຮ່ວມກັນເຮັດສໍາເລັດຫຼາຍວຽກງານ ເຊິ່ງມີອັນພົ້ນເດັ່ນຫຼາຍດ້ານຄື: 1./ ທັງສອງຝ່າຍ ລາວ-ຫວຽດນາມ ປະສານສົມທົບກັບເຈົ້າໜ້າທີ່ດ່ານໃນການສ້າງເງື່ອນໄຂເອື້ອອໍານວຍໃຫ້ ວິສາຫະກິດ, ພໍ່ຄ້າແມ່ຄ້າຂາຍຍ່ອຍຊາຍແດນ, ປະຊາຊົນເຂດຊາຍແດນ, ປະຊາຊົນອາໃສຢູ່ລຽບຕາມຊາຍແດນ ລາວ-ຫວຽດນາມ ມີຄວາມສະດວກໃນການໄປມາຫາສູ່ຜ່ານດ່ານຊາຍແດນ, ຄ້າຂາຍຊາຍແດນ, ການຄ້າສິນຄ້າຜ່ານແດນ, ການອໍານວຍຄວາມສະດວກໃຫ້ແກ່ຄົນ, ພາຫະນະຂົນສົ່ງສິນຄ້າ ຕາມຂໍ້ຕົກລົງຮ່າໂນ້ຍ 2007; ອໍານວຍຄວາມສະດວກໃຫ້ວິສາຫະກິດທັງສອງຝ່າຍ ໄດ້ຊອກຮູ້ໃນການລົງທຶນຮ່ວມກັນ, ຊອກຮູ້ດ້ານການຕະຫຼາດຈໍາໜ່າຍສິນຄ້າ ແລະ ສ້າງຕັ້ງຕົວແທນຈໍາໜ່າຍສິນຄ້າຢູ່ໃນເທດສະບານຂອງ 6 ແຂວງພາກເໜືອ ສປປ ລາວ. 2./ ກົນໄກການປະສານສົມທົບທັງສອງຝ່າຍ ລະຫວ່າງພະແນກອຸດສາຫະກໍາ ແລະ ການຄ້າແຂວງ 6 ແຂວງພາກເໜືອ ກັບພະແນກອຸດສາຫະກໍາ ແລະ ການຄ້າແຂວງດຽນບຽນ ໄດ້ສະໜອງຂໍ້ມູນຂ່າວສານ ດ້ານນະໂຍບາຍການຄ້າສອງຝ່າຍ, ລະບຽບການທາງດ້ານພາສີ, ດ້ານສະຖິຕິສິນຄ້າ, ແຈ້ງໃຫ້ກັນຊາບກ່ຽວກັບວິສາຫະກິດ ແລະ ເພີ່ມທະວີໃນການແກ້ໄຂບັນດາພໍ່ຄ້າແມ່ຄ້າຂາຍຍ່ອຍ ທີ່ເຄື່ອນໄຫວທຸລະກິດບໍ່ຖືກຕາມຈຸດປະສົງ ແລະ ບໍ່ສອດຄອງກັບລະບຽບຢູ່ພາຍໃນ 6 ແຂວງພາກເໜືອຂອງ ສປປ ລາວ.
ຄຽງຄູ່ກັບຜົນສໍາເລັດທີ່ຍາດມາໄດ້ ພວກເຮົາກໍຍັງມີຫຼາຍບັນຫາທີ່ສອງຝ່າຍຕ້ອງໄດ້ເອົາໃຈໃສ່ຕື່ມຄື: 1. / ເສັ້ນທາງຄົມມະນາຄົມ ລະຫວ່າງແຂວງຫຼວງພະບາງ-ແຂວງ
ດຽນບຽນ ມີຄວາມຫຍຸ້ງຍາກ, ເງື່ອນໄຂທີ່ຕັ້ງໄລຍະທາງ ລະຫວ່າງ ແຂວງໄຊຍະບູລີ, ແຂວງບໍ່ແກ້ວ ຫ່າງໄກຈາກດຽນບຽນເຮັດໃຫ້ການພັດທະນາການຄ້າ, ການຄ້າຊາຍແດນ ຍັງບໍ່ທັນຂະຫຍາຍຕົວຫຼາຍ, ມູນຄ່າການຄ້າມີໜ້ອຍ. 2./ ການຄຸ້ມຄອງຊາວຕ່າງດ້າວພາຍໃນ 6 ແຂວງຍັງພົບຄວາມຫຍຸ້ງຍາກ ເນື່ອງຈາກ, ການເຂົ້າມາເຄື່ອນໄຫວສ່ວນຫຼາຍບໍ່ສອດຄ່ອງ ແລະ ຖືກຕາມຈຸດປະສົງເປົ້າໝາຍໃນການດໍາເນີນທຸລະກິດ. 3./ ການຜັນຂະຫຍາຍເນື້ອໃນບົດບັນທຶກ ສອງຝ່າຍຂັ້ນກະຊວງ, ແຂວງ ແລະ ພະແນກຍັງບໍ່ທັນໄດ້ດີ, ການປະສານສົມທົບກັບຂະແໜງການຕ່າງໆ ທີ່ກ່ຽວກັບກັບວຽກງານການຄ້າ, ການຄ້າຊາຍແດນ, ຕະຫຼາດຊາຍແດນຍັງບໍ່ທັນໄດ້ດີ.
ເພື່ອເຮັດໃຫ້ສາຍພົວພັນຮ່ວມມື ລະຫວ່າງ ຂະແໜງການອຸດສາຫະກຳ ແລະ ການຄ້າ ສືບຕໍ່ພັດທະນາ ແລະ ຂະຫຍາຍຕົວໃນຕໍ່ໜ້າ ທັງສອງຝ່າຍໄດ້ເຮັດບົດບັນທຶກຮ່ວມກັນ ດັ່ງນີ້: 1. / ພະແນກອຸດສາຫະກຳ ແລະ ການຄ້າ ແຂວງຫຼວງພະບາງ, ອຸດົມໄຊ, ຜົ້ງສາລີ, ຫຼວງນ້ຳທາ, ບໍ່ແກ້ວ, ໄຊຍະບູລີ ຂອງ ສປປ ລາວ ແລະ ພະແນກອຸດສາຫະກຳ ແລະ ການຄ້າ ແຂວງດຽນບຽນ ສສ ຫວຽດນາມ ມີໜ້າທີ່ລາຍງານໃຫ້ການນຳພັກ, ລັດແຂວງ ກ່ຽວກັບເນື້ອໃນບົດບັນທຶກຮ່ວມມືໄລຍະ 2019-2021 ແລະ ປະຕິບັດຢ່າງມີປະສິດທິຜົນ. ແຕ່ລະໄຕມາດແຈ້ງໃຫ້ກັນຊາບ ກ່ຽວກັບຜົນການປະຕິບັດບັນດາເນື້ອໃນທີ່ໄດ້ເຊັນກັນ ດ້ວຍລາຍລັກອັກສອນ. ແຕ່ລະປີຈະແຕ່ງຕັ້ງຄະນະທີມງານມາຢ້ຽມຢາມ ແລະ ຈັດຕັ້ງການຕີລາຄາຜົນບັນລຸໄດ້ ແລະ ປັບປຸງບັນດາເນື້ອໃນໃໝ່ທີ່ກຳເນີດເກີດຂຶ້ນໃໝ່. 2./ ສອງຝ່າຍເຫັນດີ ເປັນເອກະພາບກັນ ປ່ຽນກັນເປັນເຈົ້າພາບ ຈັດກອງປະຊຸມເຊັນບົດບັນທຶກຮ່ວມມື ສອງປີຕໍ່ຄັ້ງ; ກອງປະຊຸມພົບປະເຊັນບົດບັນທຶກ ຮ່ວມມືໄລຍະ 2021-2023 ຈະໄດ້ໄຂຂຶ້ນໃນປີ 2021 ຢູ່ທີ່ແຂວງດຽນບຽນ ແຫ່ງ ສສ ຫວຽດນາມ. ພະແນກອຸດສາຫະກຳ ແລະ ການຄ້າແຂວງດຽນບຽນ ເປັນເຈົ້າພາບ ຈະເອກະພາບ ພະແນກອຸດສາຫະກຳ ແລະ ການຄ້າ 6 ແຂວງພາກເໜືອຂອງລາວ ກ່ຽວກັບວັນເວລາ ແລະ ເນື້ອໃນຮ່ວມມືທີ່ຈະໄດ້ເຊັນກັນ. 3./ ສອງຝ່າຍເຫັນດີເປັນເອກະພາບກັນ ມອບໃຫ້ຫົວໜ້າຂະແໜງ ນໍາເຂົ້າ – ສົ່ງອອກຂອງແຕ່ລະຝ່າຍ ແລະ ບັນຂະແໜງທີ່ກ່ຽວຂ້ອງ ເປັນເສນາທິການຜັນຂະຫຍາຍປະຕິບັດ ແລະ ສັງລວມບັນດາຂໍ້ມູນ ແລະ ຕີລາຄາຜົນການປະຕິບັດບັນດາເນື້ອໃນຮ່ວມມືທີ່ໄດ້ເຊັນກັນ. 4./ຫ້ອງການຕົວແທນອຸດສາຫະກຳ ແລະ ການຄ້າແຂວງດຽນບຽນ ທີ່ປະຈຳຢູ່ແຂວງຫຼວງພະບາງ ແລະ ຫ້ອງການ ຕົວແທນອຸດສາຫະກຳ ແລະ ການຄ້າ ແລະ ທ່ອງທ່ຽວແຂວງຫຼວງພະບາງ ທີ່ປະຈຳຢູ່ແຂວງດຽນບຽນ ຈະເປັນຂົວຕໍ່ໃຫ້ບັນດາທຸລະກິດ ຂອງສອງຝ່າຍບັນດາແຂວງພາກເໜືອຂອງລາວ ແລະ ແຂວງດຽນບຽນມີການພົວພັນ ຮ່ວມມືກັນ; ເປັນຂົວຕໍ່ໃຫ້ບັນດາທຸລະກິດຂອງສອງຝ່າຍເພີ່ມທະວີ ການສົ່ງເສີມການຄ້າ, ໂຄສະນາ, ລະດົມໃຫ້ບັນດາທຸລະກິດ ຍູ້ແຮງການຄ້າຂາຍ ແລະ ການແລກປ່ຽນການຄ້າຜ່ານຊາຍແດນ.
ໃນໂອກາດນີ້ ທ່ານ ຫງຽນ ວັ່ນ ເຕື໋ອງ ກໍາມະການພັກແຂວງ, ຫົວໜ້າພະແນກອຸດສາຫະກໍາ ແລະ ການຄ້າແຂວງ ດຽນບຽນ ແຫ່ງ ສສ ຫວຽດນາມ ກໍ່ໄດ້ເປັນເອກະພາບ ນໍາການຕີລາຄາ ແລະ ໄດ້ຕອບຮັບຂໍ້ສະເໜີ ຂອງພະແນກອຸດສາຫະກໍາ ແລະ ການຄ້າ 6 ແຂວງພາກເໜືອ ຂອງ ສປປ ລາວ ພ້ອມທັງຍັງໄດ້ສະເໜີວິທີການ ແລະ ມາດຕະການໃນການແກ້ໄຂບັນຫາຄົງຄ້າງຕ່າງໆ ແລະ ຕອນທ້າຍກອງປະຊຸມ ທັງສອງຝ່າຍໄດ້ເຊັນບົດບັນທຶກຮ່ວມກັນ ຫຼາຍສະບັບ.
ຂ່າວ: ແສງວິລັດ ຍົດສະຫວັດ ພະແນກ ອຄ ຜົ້ງສາລີ
ພາບ: ອະທິເດດ ຈິດຕຼານົນ ພະແນກ ອຄ ຫຼວງພະບາງ
ຮຽບຮຽງ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
