ຕອນເຊົ້າ ເວລາ 11: 30 ໂມງ ຂອງວັນທີ 30 ກັນຍາ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບອໍາລາຂອງ ທ່ານ ກຽດຕິຄຸນ ຊາດປະເສີດ, ເອກອັກຄະຣາຊະທູດຜູ້ມີອໍານາດເຕັມ ແຫ່ງ ປະເທດໄທ ຊຶ່ງມີສໍານັກງານສະຖານທູດທີ່ຕັ້ງຢູ່ ສປປ ລາວ ໃນໂອກາດສໍາເລັດ ການປະຕິບັດໜ້າທີ່ທາງການທູດ ປະຈໍາ ຢູ່ ສປປ ລາວ ເປັນໄລຍະເວລາ 1 ປີ ກັບ 6 ເດືອນ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 10 ກວ່າທ່ານ.
ໃນໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ກຽດຕິຄຸນ ຊາດປະເສີດ , ທີ່ໄດ້ເຮັດໜ້າທີ່ທາງດ້ານການທູດ ໄດ້ຮັບຜົນສຳເລັດວຽກງານຫຼາຍດ້ານ ລະຫວ່າງ ລາວ-ໄທ ຊຶ່ງສອງປະເທດໄດ້ມີມູນເຊື້ອອັນດີງາມ ມີສາຍພົວພັນຮ່ວມມືທີ່ດີແບບພິເສດບ້ານໃກ້-ເຮືອນຄຽງ ພາສາປາກເວົ້າຄ້າຍຄືກັນ ນັບທາງການຄ້າຂາຍໄປມາຫາສູ່ກັນ ນັບມື້ແໜ້ນແຟ້ນຍິ່ງຂຶ້ນ ທ່ານ ລັດຖະມົນຕີຂອງລາວ ກໍ່ໄດ້ຕີລາຄາສູງຕໍ່ການຊ່ວຍເຫຼືອໃນຫຼາຍດ້ານໃຫ້ແກ່ລາວ ເປັນຕົ້ນການຮ່ວມມືທາງດ້ານການເມືອງ, ຮີດຄອງປະເພນີ ແລະ ວັດທະນາທຳ, ການຄ້າຂາຍ, ການລົງທຶນໃນໂຄງການໃຫຍ່ຫຼາຍບ່ອນ ລະຫວ່າງ ລາວ-ໄທ ເປັນຕົ້ນຂົວຂ້າມແມ່ນ້ຳຂອງຫຼາຍແຫ່ງ ທີ່ອຳນວຍຄວາມສະດວກການໄປມາຫາສູ່ຄ້າຂາຍຮ່ວມກັນລຽບຕາມຊາຍແດນແມ່ນ້ຳຂອງ ລາວ-ໄທ ແລະ ໂຄງການແລກປ່ຽນອື່ນໆ ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ນອກນັ້ນຍັງເປັນຄູ່ຮ່ວມມືທີ່ດີ. ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍຮັກສາມູນເຊື້ອອັນດີງາມໃຫ້ດີຂຶ້ນ ແລະ ວຽກງານອື່ນໃນຕໍ່ໜ້າຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ. ທ່ານ ກຽດຕິຄຸນ ຊາດປະເສີດ, ໄດ້ກ່າວວ່າ ຂ້າພະເຈົ້າຮູ້ສຶກພາກພູມໃຈ ທີ່ໄດ້ດໍາລົງຕໍາແໜ່ງເປັນ ເອກອັກຄະຣາຊະທູດ ແຫ່ງ ປະເທດໄທ ປະຈຳ ສປປ ລາວ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ກະຊວງອຸດສາຫະກຳຂອງລາວ ໃນໄລຍະຜ່ານມາທີ່ອໍານວຍຄວາມສະດວກໃຫ້ແກ່ວຽກງານຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ຍັງອວຍພອນໃຫ້ທ່ານເອກອັກຄະຣາຊະທູດ ຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດ ລາວ-ໄທ ໃຫ້ດີຂຶ້ນໄປເລື້ອຍໆ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
