ຕອນເຊົ້າ ເວລາ 11: 00 ໂມງ ຂອງວັນທີ 22 ຕຸລາ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Staffan Herrstrom, ເອກອັກຄະລັດຖະທູດປະເທດ ສະວິດເດັນ ພ້ອມດ້ວຍຄະນະນັກທຸລະກິດ ທີ່ມີສໍານັກງານສະຖານທູດຕັ້ງຢູ່ບາງກອກປະເທດໄທ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 10 ກວ່າທ່ານ.
ໂອກາດນີ້ ທ່ານ ສົມຈິດ ອິນທະມິດ ກໍ່ແດງຄວາມຍິນດີຕ້ອນຮັບ ທ່ານ Staffan Herrstrom, ທີ່ໄດ້ມາຮ່ວມກອງປະຊຸມສໍາມະນາການພັດທະນາປ່າໄມ້ ແບບຍືນຍົງຢູ່ລາວຕອນເຊົ້າ ແລະ ຖືໂອກາດມາຢ້ຽມຂໍ່ານັບ ແລະ ປຶກສາຫາລື ຄວາມເຂົ້າໃຈຮ່ວມກັນດ້ານຂະແໜງການປ່າໄມ້ ເປັນຕົ້ນ ການຊອກຄູ່ຮ່ວມທຸລະກິດ, ການຄ້າ, ໂຮງງານປຸງແຕ່ງຜະລິດຕະພັນໄມ້, ເຄື່ອງເຟີນິເຈີ້ ແລະ ການລົງທຶນໃສ່ເຄື່ອງກົນຈັກທີ່ທັນສະໄໝ ເພື່ອຊຸກຍູ້ການສົ່ງອອກຜະລິດຕະພັນໄມ້ ຂອງລາວ. ພ້ອມດຽວກັນນີ້, ທ່ານ ຮອງລັດຖະມົນຕີໄດ້ສະເໜີສະພາບການພັດທະນາຂະແໜງປ່າໄມ້ໃນລາວໂດຍຫຍໍ້ ເປັນຕົ້ນ ການຈັດຕັ້ງປະຕິບັດຄໍາສັ່ງຂອງນາຍົກລັດຖະມົນຕີ ເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາ ການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ທີ່ທາງກະຊວງ ອຄ ໄດ້ມີການສັ່ງໂຈະບາງໂຮງງານໄມ້ຂະໜາດນ້ອຍປະມານ 1.000 ກວ່າຫົວໜ່ວຍ ແລະ ອົງການ SIDA ໄດ້ໃຫ້ການຊ່ວຍເຫຼືອໃນການພັດທະນາປ່າໄມ້ ໂດຍອີງຕາມແຜນການພັດທະນາເສດຖະກິດ-ສັງຄົມ 5 ປີຄັ້ງທີ 8 ທີ່ລັດຖະບານລາວວາງອອກ ໃຫ້ຮັກສາປ່າໄມ້ກວມເອົາ 70%ຂອງເນື້ອທີ່ ແລະ ການປູກໄມ້ ໂດຍນໍາເອົາໄມ້ທີ່ປູກໄປປຸງແຕ່ງເປັນຜະລິດຕະພັນ ເພື່ອສົ່ງອອກ ຊຶ່ງໃນປະຈຸບັນກໍ່ມີ ບໍລິສັດບົວລະພາ ໄດ້ດໍາເນີນການປູກໄມ້ ເພື່ອສົ່ງອອກ, ໃນນີ້ ທ່ານ Staffan Herrstrom ເອກອັກຄະລັດຖະທູດ ໄດ້ສະເໜີໃນຕໍ່ໜ້າຈະໃຫ້ການຮ່ວມມື ທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ໃຫ້ຄຳປຶກສາໃນການພັດທະນາວຽກງານປ່າໄມ້ ໂດຍອີງຕາມແຜນຍຸດທະສາດການເຕີບໂຕສີຂຽວ ຂອງສປປ ລາວ.
ໃນຕອນທ້າຍ ທ່ານ ສົມຈິດ ອິນທະມິດ ສະແດງຄວາມຍິນດີ ຕໍ່ທ່ານ ເອກອັກຄະລັດຖະທູດ ປະເທດສະວິດເດັນ ທີ່ຈະໃຫ້ການຮ່ວມມື ແລະ ພັດທະນາຂະແໜງການປ່າໄມ້ຂອງລາວ ໃຫ້ຂະຫຍາຍຕົວ ແລະ ທ່ານ ເອກອັກຄະລັດຖະທູດ ກໍ່ສະແດງຄວາມຂອບໃຈ ມາຍັງທ່ານຮອງລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບ.
ພາບ ແລະ ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
