ຕອນບ່າຍ 13: 30 ໂມງ ຂອງວັນທີ 30 ຕຸລາ 2019 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ ນາງ Leow Siu Lin, ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈຳສປປ ລາວ ຄົນໃໝ່ ເນື່ອງໃນໂອກາດມາຮັບໜ້າທີ່ທາງການທູດປະຈໍາຢູ່ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 6 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ກໍ່ແດງຄວາມຍິນດີຕໍ່ ທ່ານ ນາງ Leow Siu Lin, ທີ່ໄດ້ມາດຳລົງຕຳແໜ່ງທາງການທູດ ຊຶ່ງຈະເຮັດໜ້າທີ່ດ້ານການທູດໃຫ້ແກ່ ສອງປະເທດລະຫວ່າງ ລາວ-ສິງກະໂປ, ທັງສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນຂະຫຍາຍສາຍພົວພັນທີ່ດີ ດ້ານການຮ່ວມມື, ດ້ານການເມືອງ, ການຄ້າ, ການລົງທຶນ ແລະ ການສຶກສາຂອງລາວ. ນອກນັ້ນຍັງໄດ້ປຶກສາຫາລືກັນໃນວຽກງານ ການໃຫ້ການຝຶກອົບຮົມແກ່ພະນັກງານລັດຖະກອນຂອງລາວ ຢູ່ສູນຝຶກອົບຮົມລາວ-ສິງກະໂປ ຫຼື ອາດຈັດຢູ່ຕ່າງແຂວງ ເພື່ອຈະໄດ້ຍົກລະດັບໃຫ້ແກ່ພະນັກງານຢູ່ຂັ້ນທ້ອງຖິ່ນໄປພ້ອມ ແລະ ທ່ານ ນາງ Leow Siu Lin ເອກອັກຄະລັດຖະທູດ ໄດ້ຕອບຮັບການສະເໜີໃນຕໍ່ໜ້າຈະໃຫ້ການຮ່ວມມື, ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ສປປ ລາວ ເປັນຕົ້ນຫົວຂໍ້ທີ່ມີຄວາມຕ້ອງການຝຶກອົບຮົມສະເພາະ ຂອງກະຊວງ ອຄ.
ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີ ຕໍ່ ທ່ານ ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈໍາລາວ ຄົນໃໝ່ ໃນການຮ່ວມມືເປັນຢ່າງດີ ແລະ ອວຍພອນໄຊໃຫ້ທ່ານເອກອັກຄະລັດຖະທູດ ຈົ່ງມີສິ່ງທີ່ດີທີ່ສຸດ ແລະ ທ່ານ ເອກອັກຄະລັດຖະທູດ ກໍ່ສະແດງຄວາມຂອບໃຈ ມາຍັງ ທ່ານລັດຖະມົນຕີ ກະຊວງ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບ.
ພາບ ແລະ ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
