ຕອນບ່າຍ ເວລາ 14:30ມ ຂອງວັນທີ 05 ພະຈິກ 2019, ຢູ່ຫ້ອງຮັບແຂກຊັ້ນ 4 ຂອງກະຊວງ ອຄ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Zhu Ning ອະດີດຮອງປະທານຄະນະກໍາມະການວຽກງານງົບປະມານ ສະພາຜູ້ແທນທົ່ວປະເທດ, ອະດີດປະທານ China UnionPay ພ້ອມດ້ວຍຄະນະຊ່ຽວຊານທາງດ້ານການເງິນ-ການທະນາຄານ ຂອງຈີນ ໃນໂອກາດທີ່ ໄດ້ເດີນທາງມາເຮັດວຽກຢູ່ ສປປ ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 25 ກວ່າທ່ານ.
ທ່ານ Zhu Ning ໄດ້ສະເໜີຈຸດປະສົງ ໃນການມາເຮັດວຽກຄັ້ງນີ້ ແມ່ນນອນໃນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືຢ່າງຮອບດ້ານ ດ້ານການເງິນ ລະຫວ່າງ ສປປ ລາວ ແລະ ສປ ຈີນ, ສະບັບລົງວັນທີ 30 ເມສາ 2019; ແລະ ທັງເປັນການສືບຕໍ່ຜັນຂະຫຍາຍຜົນການມາເຮັດວຽກຂອງຄະນະທ່ານ Zhou Xiaochuan ຢູ່ສປປ ລາວ ລະຫວ່າງວັນທີ 9-12 ກັນຍາ 2019 ຜ່ານມາ; ພ້ອມກັນນີ້, ກໍ່ໄດ້ມີຄໍາຖາມ 16 ຂໍ້ ທີ່ໄດ້ສົ່ງໃຫ້ທາງກະຊວງ ອຄ ຄົ້ນຄວ້າພິຈາລະນາຕອບ ເພື່ອຈະໄດ້ປະກອບເປັນຂໍ້ມູນໃນການວິເຄາະສະພາບທາງດ້ານການເງິນ-ການທະນາຄານຂອງ ສປປ ລາວ;
ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຊົມເຊີຍຕໍ່ຜົນການມາເຮັດວຽກ ຂອງຄະນະທ່ານ Zhu Ning ພ້ອມທັງສະເໜີສະພາບການເຄື່ອນໄຫວວຽກງານຂອງ ຂະແໜງ ອຄ ໂດຍຫຍໍ້ໃນໄລຍະຜ່ານມາ ຈົນເຖິງປະຈຸບັນ ໂດຍສະເພາະການຂະຫຍາຍຕົວທາງດ້ານການຄ້າຕ່າງປະເທດ ແລະ ແຜນພັດທະນາອຸດສາຫະກໍາປຸງແຕ່ງ ແລະ ການຄ້າ 5 ປີຄັ້ງທີ 8 (2016-2020) ແລະ ຫວັງວ່າຈະມີການແລກປ່ຽນບົດຮຽນດ້ານວິຊາການຊຶ່ງກັນ ແລະ ກັນ ໃຫ້ເລິກເຊິ່ງ ແລະ ຫຼາຍຂຶ້ນ ໃນເວລາ 15:00ມ ຢູ່ຫ້ອງປະຊຸມຊັ້ນ 3 ຂອງກະຊວງ ອຄ.
ຕອນທ້າຍ, ທ່ານ Zhu Ning ພ້ອມຄະນະ ຂໍຂອບໃຈຕໍ່ການຕ້ອນຮັບຢ່າງອົບອຸ່ນ ຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດຽວກັນນີ້ ທ່ານ ຮລມຕ ໄດ້ອວຍພອນໄຊໃຫ້ທ່ານ Zhu Ning ຈົ່ງປະສົບຜົນສໍາເລັດໃນໜ້າທີ່ການງານ ແລະ ກັບຄືນປະເທດດ້ວຍຄວາມສະຫວັດດີພາບ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
