ລະຫວ່າງວັນທີ 13-14 ພະຈິກ 2019 ທີ່ຜ່ານມາ, ທີ່ໂຮງແຮມ ຊະນະແກ້ວ ບູຕິກ, ແຂວງຫຼວງພະບາງ ກົມນະໂຍບາຍການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມທາບທາມ (ຮ່າງ) ດໍາລັດວ່າດ້ວຍການຄ້າທາງເອເລັກໂຕຣນິກ (E-commerce) ຂອງ ສປປ ລາວ.  ຊຶ່ງໃຫ້ກຽດເປັນປະທານໂດຍ ທ່ານ ບຸນມີ ມະນີວົງ, ຮອງລັດຖະມົນຕີກະຊວງ ອຸດສາຫະກໍາ ແລະ ການຄ້າ ທັງເປັນຫົວໜ້າຄະນະຮັບຜິດຊອບຮ່າງດໍາລັດດັ່ງກ່າວ ແລະ ປະທານຮ່ວມ ທ່ານ ສຸກັນ ບຸນຍົງ ຮອງເຈົ້າແຂວງ ແຂວງຫຼວງພະບາງ. ມີຫົວໜ້າກົມ, ຮອງຫົວໜ້າຫ້ອງການ, ຫົວໜ້າພະແນກ, ຮອງຫົວໜ້າພະແນກ, ບັນດາແຂກທີ່ຖືກເຊີນຈາກບັນດາກະຊວງ, ພະແນກການທີ່ກ່ຽວຂ້ອງ ແລະ ຕົວແທນຈາກສະພາການຄ້າ ແລະ ອຸດສາຫະກຳ 8 ແຂວງພາກເໜືອ ແລະ 2 ແຂວງພາກກາງ ເຂົ້າຮ່ວມຈຳນວນ 75 ທ່ານ.

          ກອງປະຊຸມຄັ້ງນີ້ມີຈຸດປະສົງຫຼັກແມ່ນ ເພື່ອຄົ້ນຄວ້າ, ປຶກສາຫາລື ແລກປ່ຽນຄໍາຄິດຄໍາເຫັນຂອງຜູ້ເຂົ້າຮ່ວມກອງປະຊຸມຕໍ່ເນື້ອໃນຮ່າງດຳລັດ ວ່າດ້ວຍການຄ້າທາງເອເລັກໂຕຣນິກ (E-commerce) ຂອງ ສປປ ລາວ. ຈາກນັ້ັ້ນ, ທ່ານ ບຸນມີ ມະນີວົງ ຮອງລັດຖະມົນຕີກະຊວງ ອຸດສາຫະກໍາ ແລະ ການຄ້າ ກໍ່ໄດ້ມີຄຳເຫັນ ແລະ ເນັ້ນໜັກຕໍ່ກອງປະຊຸມໃນຄັ້ງນີ້, ຊຶ່ງທ່ານໄດ້ສະເໜີ ແລະ ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມ ຈົ່ງພ້ອມກັນຄົ້ນຄວ້າ, ປຶກສາຫາລື ແລະ ນໍາເອົາບັນດາຄໍາຄິດຄໍາເຫັນທີ່ຫຼາຍພາກສ່ວນ ໄດ້ປະກອບຄໍາຄິດຄໍາເຫັນໃນກອງປະຊຸມຄັ້ງນີ້ ເພື່ອໃຫ້ມີຄວາມເປັນເອກະພາບ, ຖືກຕ້ອງ , ຊັດເຈນ ແລະ ໄປປັບປຸງເນື້ອໃນຂອງຮ່າງດໍາລັດນີ້ ໃຫ້ມີຄວາມສົມບູນ.

          ຫຼັງຈາກນັ້ນ, ຜູ້ເຂົ້າຮ່ວມກໍ່ໄດ້ພ້ອມກັນຄົ້ນຄວ້າ,  ປຶກສາຫາລື, ສັບຊ້ອນຮຽບຮຽງຄໍາສັບຕ່າງໆ ແລະ ໄດ້ປະກອບຄໍາຄິດຄໍາເຫັນຢ່າງກົງໄປກົງມາ ພ້ອມນັ້ນ, ຍັງສັງລວມບົດຮຽນທີ່ຖອດຖອນໄດ້ຈາກຕ່າງປະເທດ ລວມທັງຜົນການສຶກສາຄົ້ນຄ້ວາກ່ຽວກັບຄວາມພ້ອມເພື່ອພັດທະນາ ການຄ້າທາງເອເລັກໂຕຣນິກ (E-commerce)  ຂອງ ສປປ ລາວ;ເພື່ອເຮັດໃຫ້ ກອງປະຊຸມທາບທາມ (ຮ່າງ) ດໍາລັດວ່າດ້ວຍການຄ້າທາງເອເລັກໂຕຣນິກ (E-commerce) ຂອງ ສປປ ລາວ ມີຄວາມເປັນເອກະພາບ, ຈະແຈ້ງ, ຊັດເຈນ, ສອດຄ່ອງກັບສະພາບຄວາມເປັນຈິງ ແລະ ສາມາດນໍາໄປຈັດຕັ້ງປະຕິບັດໃຫ້ໄດ້ຮັບໝາກຜົນຕົວຈິງ.

ຂ່າວ-ພາບໂດຍ: ແສງວິລັດ ຍົດສະຫວັດ ພະແນກອຸດສາຫະກຳ ແລະ ການຄ້າ ແຂວງຜົ້ງສາລີ

ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ