ຕອນເຊົ້າ 10: 30 ໂມງ ຂອງວັນທີ 25 ພະຈິກ 2019 ທີ່ສູນການຄ້າ ລາວ-ໄອເຕັກ ນະຄອນຫຼວງວຽງຈັນໄດ້ມີພິທີເປີດງານວາງສະແດງຂຶ້ນ ໄດ້ໃຫ້ກຽດເຂົ້າຮ່ວມເປັນປະທານຕັດແຖບຜ້າໂດຍ ທ່ານ ບຸນມີ ມະນີວົງ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ທ່ານ ນາງ ສື ຕົງຫຼີ ຮອງຫົວໜ້າກົມສົ່ງເສີມການຄ້າ ແລະ ການລົງທຶນ ສະພາສົ່ງເສີມການຄ້າສາກົນ ສປ ຈີນ ພ້ອມດ້ວຍຕາງໜ້າທັງສອງຝ່າຍຈາກພາກສ່ວນກ່ຽວຂ້ອງເຂົ້າຮ່ວມຫຼາຍກວ່າ 30 ທ່ານ.
ຂຶ້ນນຳສະເໜີບົດໂດຍ ທ່ານ ໄຊສົມເພັດ ນໍຣະສິງຫ໌ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ
ຈຸດປະສົງຫຼັກຂອງການຈັດງານຄັ້ງນີ້ ເພື່ອສືບຕໍ່ເສີມສ້າງສາຍພົວພັນການຮ່ວມມືດ້ານເສດຖະກິດຂອງບັນດາປະເທດໃນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ເວົ້າລວມ ເວົ້າສະເພາະກໍເພື່ອສົ່ງເສີມການຄ້າໃຫ້ຂະຫຍາຍຕົວ ຢ່າງຕໍ່ເນື່ອງຂອງ 2 ປະເທດ ລາວ-ຈີນ ພ້ອມທັງເປີດໂອກາດໃຫ້ກັບພາກທຸລະກິດ 2 ຝ່າຍມີສ່ວນຮ່ວມໄດ້ສືບຕໍ່ແລກປ່ຽນບົດຮຽນ ແລະ ຂໍ້ມູນ-ຂ່າວສານຕ່າງໆຊຶ່ງກັນ ແລະ ກັນ ທັງເປັນການຊຸກຍູ້ທາງດ້ານການຄ້າ, ການເຊື່ອມໂຍງ, ການຮ່ວມມືໃນປັດຈຸບັນກໍຄືອະນາຄົດໃຫ້ຂະຫຍາຍຕົວຍິ່ງໆຂຶ້ນ.
ເຄື່ອງນໍາມາວາງສະແດງຄັ້ງນີ້ ເປັນຂອງ ບໍລິສັດ ທີ່ມີຊື່ສຽງຂອງສປ ຈີນ ເຊັ່ນ: ດາວທຽມ, ການອອກແບບ-ຈັດສັນໂຄງຮ່າງພື້ນຖານ, ການຄົມມະນາຄົມ, ພະລັງງານ ໄຟຟ້າ, ເຄື່ອງກໍ່ສ້າງ ແລະ ອື່ນໆ.
ງານວາງສະແດງສິນຄ້າເລີ່ມແຕ່ວັນທີ 25-28 ພະຈິກ 2019 ທີ່ສູນການຄ້າລາວ-ໄອເຕັກ ຕຶກເກົ່າ ນະຄອນຫລວງວຽງຈັນ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
