ຕອນເຊົ້າ ເວລາ 9: 00 ໂມງ ຂອງວັນທີ 29 ພະຈິກ 2019 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ; ໄດ້ຈັດພິທີລະນຶກວັນສາກົນ ເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງຂຶ້ນ ພາຍໃຕ້ຫົວຂໍ້: “ຄວາມສະເໝີພາບຍຸກໃໝ່ ໂດຍບໍ່ປະໃຜໄວ້ຂ້າງຫຼັງ ແລະ ຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ” ມີຜູ້ຕາງໜ້າຈາກບັນດາກົມ, ຫ້ອງການ, ສະຖາບັນ ແລະ ບັນດາບໍລິສັດທີ່ຂຶ້ນກັບກະຊວງ ອຄ ເຂົ້າຮ່ວມປະມານ 90 ກວ່າທ່ານ.
ໃຫ້ກຽດເປັນປະທານ ໂດຍ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ກ່າວເປີດພິທີຢ່າງເປັນທາງການ ໂດຍອີງໃສ່ວັນສາກົນລຶບລ້າງການໃຊ້ຄວາມຮຸນແຮງຕໍ່ແມ່ຍິງ ຊຶ່ງໄດ້ເຜີຍແຜ່ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກເປັນຕົ້ນຕໍ.
ຂຶ້ນອ່ານຜ່ານກົດໝາຍ ວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ໂດຍ ທ່ານ ນາງ ວິໄລວັນ ບຸບຜານຸວົງ ຮອງຫົວໜ້າຫ້ອງການ ກອງເລຂາຄະນະກຳມະທິການແຫ່ງຊາດເພື່ອຄວາມກ້າວໜ້າແມ່ຍິງ ແລະ ແມ່-ເດັກ ພ້ອມທັງຍົກຫຼາຍບັນຫາໃນວຽກງານສະກັດກັ້ນ ການໃຊ້ ຄວາມຮຸນແຮງຕໍ່ແມ່ຍິງ ແລະ ເດັກ. ພ້ອມດຽວກັນນີ້ ທ່ານ ອຸດອນ ມະນີບຸນ ຮອງຫົວໜ້າກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ ໄດ້ຂຶ້ນເຜີຍແຜ່ “ການປ້ອງກັນຄວາມປອດໄພ ແລະ ສຸຂະພາບຂອງການໃຊ້ແຮງງານຕໍ່ແມ່ຍິງ ແລະ ຂໍ້ຈໍາກັດການໃຊ້ແຮງງານເພດຍິງ ແລະ ແຮງງານໄວໜຸ່ມ” ເພື່ອໃຫ້ທຸກພາກສ່ວນໄດ້ຮັບຊາບ ແລະ ເຂົ້າໃຈເຖິງການຈັດຕັ້ງປະຕິບັດໃນວຽກງານຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ໃນ ສປປ ລາວ ແລະ ເຊື່ອໝັ້ນວ່າບັນດາທ່ານຈະສືບຕໍ່ໃຫ້ການຮ່ວມມື ແລະ ພ້ອມກັນຈັດຕັ້ງປະຕິບັດໃນວຽກງານດັ່ງກ່າວໃຫ້ປະກົດຜົນເປັນຈິງ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
