ຕອນເຊົ້າເວລາ 8: 30 ໂມງ ຂອງວັນທີ 24 ມັງກອນ 2020 ທີ່ຫ້ອງປະຊຸມໃຫຍ່ ກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມໃຫຍ່ ຄັ້ງທີ II ຂອງໜ່ວຍພັກ ກົມແຜນການ ແລະ ການຮ່ວມມືຂຶ້ນ ໂດຍການເປັນປະທານ ຂອງທ່ານ ພູວຽງ ພົງສາ ເລຂາໜ່ວຍພັກກົມແຜນການ ແລະ ການຮ່ວມມື, ຫົວໜ້າກົມແຜນການ ແລະ ການຮ່ວມມື ແລະ ການປະທານຮ່ວມ ຂອງ ທ່ານນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງອຸດສາຫະກຳ ແລະ ການຄ້າ ມີຜູ້ເຂົ້າຮ່ວມ ສະຫາຍເລຂາ, ຮອງເລຂາ ຂອງບັນດາກົມ, ຫ້ອງການ ແລະ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ສະມາຊິກພັກສົມບູນ ແລະ ສຳຮອງ ແລະ ສະມາຊິກພັກ(ພະນັກງານບໍານານ) ຂອງໜ່ວຍພັກກົມ ຜຮ ພ້ອມທັງຕາງໜ້າໜ່ວຍພັກອ້ອມຂ້າງອົງຄະນະພັກກະຊວງ ອຄ, ຕາງໜ້າພະແນກພັກ-ອົງການຈັດຕັ້ງມະຫາຊົນ ກົມຈັດຕັ້ງ ແລະ ພະນັກງານ, ແລະ ສາມອົງການຈັດຕັ້ງມະຫາຊົນພາຍໃນກົມ ປະມານ 51 ກວ່າທ່ານ.
ກອງປະຊຸມຄັ້ງນີ້ ທ່ານ ພູວຽງ ພົງສາ ໄດ້ຂຶ້ນອ່ານຜ່ານບົດລາຍງານການເມືອງ ແລະ ການເຄື່ອນໄຫວຂອງໜ່ວຍພັກໄລຍະ 5 ປີ ຜ່ານມານັບແຕ່ 2014-2019 ແລະ ວາງທິດທາງລວມ ແລະ ໜ້າທີ່ຕົ້ນຕໍໃນການນໍາພາໃນ 5 ປີ ຕໍ່ໜ້າ(2019-2024) ຂອງໜ່ວຍພັກກົມແຜນການ ແລະ ການຮ່ວມມື ເຊິ່ງຈະເອົາໃຈໃສ່ປັບປຸງກໍ່ສ້າງ ແລະ ສຶກສາອົບຮົມທາງດ້ານການເມືອງແນວຄິດໃຫ້ແກ່ສະມາຊິກພັກ, ພະນັກງານຢ່າງເປັນປົກກະຕິ ເພື່ອໃຫ້ຮັບຮູ້ ແລະ ເຂົ້າໃຈຕໍ່ແນວທາງການເມືອງ ຍົກສູງຄວາມເປັນເອກະພາບກັບແນວທາງນະໂຍບາຍຂອງພັກໃຫ້ສະມາຊິກພັກ, ພະນັກງານມີທັດສະນະທີ່ຖືກຕ້ອງສອດຄ່ອງກັບແນວທາງປ່ຽນແປງໃໝ່ຂອງພັກປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ໃນຕໍ່ໜ້າໃນການເຊື່ອມໂຍງເສດຖະກິດກັບພາກພື້ນ ແລະ ສາກົນ ໂດຍສະເພາະອຳນວຍຄວາມສະດວກໃຫ້ນັກທຸລະກິດ ເພື່ອຮັບຮອງເອົາການແຂ່ງຂັນເພີ່ມຂຶ້ນໂດຍມີໂຄງການທຶນສົມທົບທົດແທນຄ່າໃຊ້ຈ່າຍ 50%ໃຫ້ພາກທຸລະກິດ ແລະ ສ້າງເປັນໂຄງການອື່ນໆ ເພື່ອສົ່ງເສີມຄວາມເຂັ້ມແຂງໃຫ້ແກ່ຫົວໜ່ວຍທຸລະກິດ.
ພ້ອມນັ້ນ, ກໍ່ໄດ້ເພີ່ມທະວີການຈັດຕັ້ງປະຕິບັດວຽກງານການລົງທຶນຂອງລັດ ໂດຍສາມາດສະແດງອອກຈາກຕົວເລກທີ່ໄດ້ຮັບອະນຸມັດໃນໄລຍະ 05 ປີ ຜ່ານມາ(2015-2019) ແມ່ນມີມູນຄ່າ 60 ຕື້ກີບ, ເພີ້ມຂຶ້ນ 30,61% ເມື່ອທຽບໃສ່ໄລຍະຜ່ານ(2010-2014) ແລະ ອັດຕາການເຊື່ອມໂຍງແມ່ນ 60%. ໜ່ວຍພັກກົມຜຮ ຍັງໄດ້ເອົາໃຈໃສ່ປະຕິບັດຕາມໜ້າທີ່ຄວາມຮັບຜິດຊອບໃນການນຳພາ ແລະ ຄຸ້ມຄອງວຽກງານສຳຄັນ ຂອງບັນດາພະແນກ ແລະ ສູນສະຖິຕິ ແລະ ຂໍ້ມູນຂ່າວສານຢ່າງຕັ້ງໜ້າ ແລະ ເປັນເຈົ້າການ; ໜ່ວຍພັກໄດ້ນໍາພາວຽກງານສາຍລັດ ໂດຍໄດ້ແບ່ງໃຫ້ຄະນະກົມລົງເລິກຊີ້ນໍາ ແລະ ຄຸ້ມຄອງແຕ່ລະພະແນກ. ຄະນະໜ່ວຍພັກໄດ້ ໃກ້ຊິດຕິດແທດກັບທຸກວຽກງານ ທີ່ໄດ້ຮັບການມອບໝາຍໃຫ້ພະນັກງານພາຍໃນກົມຮັບຜິດຊອບ; ເປັນເຈົ້າການເສີມຂະຫຍາຍແບບແຜນ ແລະ ວິທີການນໍາພາແບບກ້າຄິດກ້າເຮັດ ແລະ ກ້າຮັບຜິດຊອບປະກອບສ່ວນເຂົ້າໃນຂະບວນການຈັດຕັ້ງຜັນຂະຫຍາຍວຽກງານ 3 ສ້າງ, ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ, ກໍ່ຄືການປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ. ໃນ ກອງປະຊຸມຍັງໄດ້ດໍາເນີນການປ່ອນບັດຄັດເລືອກເອົາຄະນະໜ່ວຍພັກກົມກົມແຜນການ ແລະ ການຮ່ວມມືຊຸດໃໝ່ ເຊິ່ງໄດ້ເລືອກເອົາ ສະຫາຍ ພູວຽງ ພົງສາ ເປັນເລຂາໜ່ວຍພັກ, ສະຫາຍ ຄໍາສອນວັນ ພຸດດາວົງ ເປັນຮອງເລຂາ ແລະ ສະຫາຍ ແສງພະນົມຈອນ ອິນທະສານ ເປັນຄະນະທັງເປັນຜູ້ກວດກາໜ່ວຍພັກ ຊຸດໃໝ່.
ຕອນທ້າຍສະຫາຍ ນາງ ເຂັມມະນີ ພົນເສນາ ໄດ້ໂອ້ລົມ ແລະ ສະແດງຄວາມຊົມເຊີຍຕໍ່ຜົນງານຂອງກົມ ຜຮ ໃນໄລຍະ 5 ປີ ຜ່ານມາ ແລະ ໄດ້ເນັ້ນໜັກຄະນະໜ່ວຍພັກຊຸດໃໝ່ໃນ 5 ປີ ຕໍ່ໜ້າຕ້ອງເອົາໃຈໃສ່ສືບຕໍ່ເຕົ້າໂຮມຄວາມສາມັກຄີ ເພື່ອສ້າງໃຫ້ໜ່ວຍພັກກາຍເປັນໜ່ວຍພັກປອດໃສເຂັ້ມແຂງໜັກແໜ້ນພາຍໃນກົມຂອງຕົນ; ການປະຕິບັດແບບແຜນຕາມຫຼັກການວິທະຍາສາດ ແລະ ສອດຄ່ອງກັບສະພາບຕົວຈິງ, ເປັນແບບຢ່າງໃນການປະຕິບັດ 5 ຫຼັກການ 3 ທິດຊີ້ນໍາໃນການກໍ່ສ້າງພັກ 5 ບົດບາດຄຸ້ມຄອງມະຫາພາກ ແລະ 4 ຄາດໝາຍບຸກທະລຸ ໃຫ້ປະສົບຜົນສໍາເລັດຫຼາຍຂຶ້ນກວ່າເກົ່າ.
ຂ່າວໂດຍ: ໄພຄຳອີ ວິໄລຄຳ
ສູນສູຖິຕິ ແລະ ຂໍ້ມູນຂ່າວສານ
