ຕອນເຊົ້າ ເວລາ 10: 00 ໂມງ ຂອງວັນທີ 5 ກຸມພາ 2020 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ, ໄດ້ຈັດພິທີປະກາດ ໃຫ້ພະນັກງານການນໍາຂັ້ນສູນກາງຄຸ້ມຄອງອອກພັກການ-ຮັບອຸດໜູນບໍານານ ໂດຍການເປັນປະທານ ຂອງ ທ່ານ ນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ມີຜູ້ເຂົ້າຮ່ວມເປັນສັກຂີພິຍານເປັນຕົ້ນ ບັນດາທ່ານຮອງລັດຖະມົນຕີ, ບັນດາທ່ານ ຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ, ຫົວໜ້າສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ, ຮອງຫົວໜ້າສະຖາບັນ ແລະ ບັນດາຫົວໜ້າພະແນກ – ຮອງຫົວໜ້າພະແນກ ທີ່ສັງກັດບັນດາກົມ, ຫ້ອງການ ແລະ ສະຖາບັນ ປະມານ 50 ກວ່າທ່ານ.
ໂອກາດນີ້ ທ່ານ ນາງ ຈັນສຸກ ແສງພະຈັນ ຄະນະບໍລິຫານງານພັກກະຊວງ ຫົວໜ້າກົມຈັດຕັ້ງ ແລະ ພະນັກງານ ກະຊວງອຸດສາຫະກໍາ ແລະ ການຄ້າ ຂຶ້ນອ່ານຜ່ານ ດຳລັດ ຂອງນາຍົກລັດຖະມົນຕີ ວ່າດ້ວຍການອະນຸມັດ ໃຫ້ພະນັກງານອອກພັກການ-ຮັບອຸດໜູນບໍານານ, ສະບັບເລກທີ 20 ແລະ 21/ນຍ, ລົງວັນທີ 15/01/2020, ຊຶ່ງຂັ້ນເທິງໄດ້ຕົກລົງໃຫ້ 02 ທ່ານ ພະນັກງານການນໍາຂັ້ນສູນກາງຄຸ້ມຄອງ ດັ່ງນີ້:
- ທ່ານ ບຸນມີ ມະນີວົງ ຮອງເລຂາຄະນະພັກກະຊວງ, ປະທານຄະນະກວດກາພັກ, ຮອງລັດຖະມົນຕີ.
- ທ່ານ ພັນທອງ ພິດທຸມມາ ກຳມະການປະຈຳພັກກະຊວງ, ຮອງລັດຖະມົນຕີ. ຂໍ້ຕົກລົງ ຂອງທ່ານລັດຖະມົນຕີ ກະຊວງ ອຄ ວ່າດ້ວຍການອະນຸມັດໃຫ້ພະນັກງານ ອອກພັກການ-ຮັບອຸດໜູນບໍານານ ໄດ້ຕົກລົງ 02 ທ່ານ ຂັ້ນກົມ ແລະ 02 ທ່ານຂັ້ນພະແນກມີດັ່ງນີ້:
- ທ່ານ ນາງ ວັນນີ ແສນມະນີຈັນ ຮອງຫົວໜ້າກົມຈັດຕັ້ງ ແລະ ພະນັກງານ.
- ທ່ານ ຫຸມແພງ ຄຳພາສິດ ຮອງຫົວໜ້າກົມທະບຽນ ແລະ ຄຸ້ມຄອງວິສາຫະກິດ.
- ທ່ານທອງຂັນ ວົງພຣະຈັນ ຮອງປະທານສະພາບໍລິຫານເຂດ ນິຄົມອຸດສາຫະກໍາ ແລະ ການຄ້າ (VITA Park)
- ທ່ານ ນາງ ຈັນສີ ມະນີຈັນ ຫົວໜ້າພະແນກຄົ້ນຄວ້າ, ວິໄຈ ແລະ ພະຍາກອນ, ກົມການຄ້າພາຍໃນ.
ຕອນທ້າຍ ທ່ານ ນາງ ເຂັມມະນີ ພົນເສນາ ໄດ້ໃຫ້ການໂອ້ລົມ ຕໍ່ພິທີດັ່ງກ່າວ ຊຶ່ງເປັນໄປຕາມເງື່ອນໄຂອາຍຸກະສຽນ ຂອງພະນັກງານເຂົ້າຮັບອຸດໜູນບຳນານ ໂດຍອີງຕາມ , ດຳລັດ,ຂໍ້ຕົກລົງ ແລະ ລະບຽບກົດໝາຍ ຂອງສປປ ລາວ. ພ້ອມທັງ, ເນັ້ນໜັກໃຫ້ເອົາໃຈໃສ່ການຈັດຕັ້ງປະຕິບັດວຽກງານຂອງ ຂະແໜງການ ອຄ ເປັນຕົ້ນ ວຽກງານການຄຸ້ມຄອງລາຄາໂດຍສະເພາະລາຄາຊີ້ນໝູ ທີ່ຜູ້ຂາຍຕາມຕະຫຼາດຂາຍເກີນລາຄາທີ່ທາງການກໍານົດໄວ້; ວຽກງານຄຸ້ມຄອງນໍ້າມັນເຊື້ອໄຟ; ສະພາບໄວຣັສໂຄໂລນ້າລະບາດ ໃຫ້ມີສະຕິເຝົ້າລະວັງນໍາກັນ; ການຈັດຕັ້ງຜັນຂະຫຍາຍມະຕິຕົກລົງ ຂອງທ່ານນາຍົກລັດຖະມົນຕີ ສະບັບເລກທີ 51/ນຍ, ລົງວັນທີ 30/8/2019, ວ່າດ້ວຍການສົ່ງເສີມການຊົມໃຊ້ຜະລິດຕະພັນທີ່ຜະລິດໄດ້ຢູ່ພາຍໃນ ແລະ ຄຸ້ມຄອງການນຳເຂົ້າສິນຄ້າອຸປະໂພກ-ບໍລິໂພກ ໃຫ້ນັບມື້ຫລຸດລົງ; ການປະຕິບັດຄໍາສັ່ງ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດ ຢູ່ສປປ ລາວ ທີ່ພົວພັນກັບຕົວຊີ້ວັດ ທີ 1 : ຕົວຊີ້ວັດການເລີ່ມຕົ້ນທຸລະກິດ; ວຽກງານການຄຸ້ມຄອງກອງທຶນສົ່ງເສີມ SMEs ວາງຄາດໝາຍໃຫ້ສາມາດປ່ອຍກູ້ແກ່ຫົວໜ່ວຍທຸລະກິດ ກ່ອນກອງປະຊຸມສະພາແຫ່ງຊາດ ຈະໄຂຂຶ້ນໃນຊຸດຕໍ່ໄປ; ວຽກງານປົກປ້ອງຜູ້ຊົມໃຊ້, ການຮັບປະກັນຄວາມເປັນທໍາໃນການແຂ່ງຂັນທຸລະກິດ ແລະ ວຽກງານການຄຸ້ມຄອງພະນັກງານ-ລັດຖະກອນ ໃຫ້ເຂັ້ມງວດໃນການກໍານົດຕໍາແໜ່ງງານຂອງ ຂະແໜງ ອຄ ເພື່ອແກ້ໄຂສະພາບພະນັກງານເຫຼືອບໍ່ພໍ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
