ຕອນບ່າຍ ເວລາ 1: 30 ໂມງ ຂອງວັນທີ 06 ກຸມພາ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າພົບປະ ຂອງ ທ່ານ ນາງ Florence Jeanblanc-Risler, ເອກອັກຄະລັດຖະທູດ ຝຣັ່ງ ປະຈຳ ສປປ ລາວ ພາທີມງານ ກຸ່ມບໍລິສັດ ມີດເຊີລິນ ເປັນບໍລິສັດຕ່າງປະເທດ ທີ່ມາລົງທຶນຢູ່ໄທ ແລະ ລາວ, ມີຜູ້ຕາງໜ້າທັງສອງຝ່າຍເຂົ້າຮ່ວມ ປະມານ 12 ກວ່າທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບ ແລະ ຍ້ອງຍໍຊົມເຊີຍຕໍ່ ທ່ານ ນາງ Florence Jeanblanc-Risler, ເອກອັກຄະລັດຖະທູດ ຝຣັ່ງ ທີ່ໄດ້ນຳພາທີມງານ ກຸ່ມບໍລິສັດ ມີດເຊີລິນ ຕ່າງປະເທດ ເຂົ້າມາພົບປະປຶກສາຫາລື ກ່ຽວກັບດ້ານການຜະລິດອຸດສາຫະກຳຢູ່ລາວ.
ພ້ອມດຽວກັນນີ້ ແລະ ທ່ານ ຝຣັງຊົວກອກແບັງ ປະທານກຸ່ມບໍລິສັດ ໄດ້ສະເໜີໃນການຈັດຕັ້ງປະຕິບັດວຽກງານຂອງກຸ່ມບໍລິສັດຕົນ ໃນໄລຍະຜ່ານມາ ມີດ້ານດີ ແລະ ຂໍ້ຫຍຸ້ງຍາກຄົງຄ້າງໃນການດຳເນີນທຸລະກິດດ້ານອຸດສາຫະກຳພາຫະນະຢູ່ ສປປ ລາວ. ນອກຈາກນັ້ນຍັງໄດ້ປຶກສາຫາລື ຄົ້ນຄວ້າປະກອບຄຳຄິດຄຳເຫັນທັງສອງຝ່າຍຢ່າງກົງໄປກົງມາຫຼາຍດ້ານ ເພື່ອປະກອບສ່ວນ ຊອກຫາ ທາງອອກໃຫ້ແກ່ການພັດທະນາພື້ນຖານໂຄງລ່າງ ຂອງ ສປປ ລາວ, ພ້ອມທັງຍັງເປັນຄູ່ຄ້າ, ຄູ່ຮ່ວມພັດທະນານຳກັນໃນລາວ ລະຫວ່າງ ກຸ່ມບໍລິສັດ ມີດເຊີລິນ ຕ່າງປະເທດທີ່ມາລົງທຶນດ້ານອຸດສາຫະກຳໃນລາວ ແລະ ສະເໜີໃຫ້ເຈົ້າໜ້າທີ່ຂອງລັດເບື້ອງລາວ ໃຫ້ການຊຸກຍູ້ອຳນວຍຄວາມສະດວກ ດ້ານລະບຽບກົດໝາຍໃຫ້ແກ່ ກຸ່ມບໍລິສັດ ທີ່ຜະລິດອຸດສາຫະກຳດ້ານພາຫະນະເປັນສິນຄ້າເພື່ອສົ່ງອອກ ຂອງ ສປປ ລາວ. ຕອນທ້າຍ , ທ່ານລັດຖະມົນຕີ ໄດ້ມີຂໍ້ສະເໜີໃນຕໍ່ໜ້າໃຫ້ມີການຄ້າຮ່ວມກັນຫຼາຍຂຶ້ນທັງສອງຝ່າຍລະຫວ່າງ ກຸ່ມບໍລິສັດ ມີດເຊີລິນ ກັບ ພາກສ່ວນທຸລະກິດ ຂອງສປປ ລາວ; ສືບຕໍ່ຮ່ວມມືພັດທະນາເສດຖະກິດ , ການຜະລິດອຸດສາຫະກຳເປັນສິນຄ້າຂອງລາວ ເພື່ອສົ່ງອອກ ແລະ ວຽກງານອື່ນໆ ໃນຕໍ່ໜ້າ.
ທ່ານ ຝຣັງຊົວກອກແບັງ ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈ ທີ່ໄດ້ພາທີມງານກຸ່ມບໍລິສັດ ມີດເຊີລິນ ຕ່າງປະເທດ ທີ່ມາລົງທຶນເຮັດທຸລະກິດຢູ່ລາວ ສິ່ງທີ່ເປັນປະໂຫຍດເພື່ອພັດທະນາທຸລະກິດໃຫ້ແກ່ລາວ ແລະ ສະແດງຄວາມຂອບໃຈມາຍັງທ່ານລັດຖະມົນຕີ ທີ່ອໍານວຍຄວາມສະດວກໃຫ້ແກ່ທີມງານຂ້າພະເຈົ້າ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
