ຕອນບ່າຍເວລາ 13: 30 ໂມງ ຂອງວັນທີ 2 ມິຖຸນາ 2020 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ເປີດ ກອງປະຊຸມປຶກສາຫາລືໃນການຈັດຕັ້ງປະຕິບັດຜັນຂະຫຍາຍ ດຳລັດສະບັບເລກທີ 414/ລບ, ລົງວັນທີ 10 ທັນວາ 2019 ວ່າດ້ວຍນະໂຍບາຍການພັດທະນາເສດຖະກິດແຂວງໄຊສົມບູນ ໂດຍການເປັນປະທານ ຂອງ ທ່ານ ສິລິສຳພັນ ວໍຣະຈິດ ຫົວໜ້າສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ ແລະ ມີຕາງໜ້າຈາກ ຫ້ອງການ, ບັນດາຫົວໜ້າກົມ- ຮອງກົມ, ຮອງຫົວໜ້າສະຖາບັນ ແລະ ວິຊາການຈໍານວນໜຶ່ງ ອ້ອມຂ້າງກະຊວງອຸດສາຫະກຳ ແລະ ການຄ້າ ປະມານ 20 ທ່ານ.
ຈຸດປະສົງຂອງກອງປະຊຸມຄັ້ງນີ້ ເພື່ອຄົ້ນຄວ້າາປຶກສາຫາລືແລກປ່ຽນຄຳຄິດຄຳເຫັນ ໃນການຜັນຂະຫຍາຍ ແລະ ປະຕິບັດເປັນລາຍລະອຽດລົງເລິກ ແລະ ຕົວຈິງຂອງ ດຳລັດວ່າດ້ວຍນະໂຍບາຍການພັດທະນາເສດຖະກິດ ແຂວງໄຊສົມບູນ ພາຍໃນຂົງເຂດວຽກງານອຸດສາຫະກຳ ແລະ ການຄ້າ ໄດ້ເອົາໃຈໃສ່ກະກຽມຄວາມພ້ອມເພື່ອນໍາເອົາຜົນຂອງກອງປະຊຸມຄັ້ງນີ້ ໃນການກຳນົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງປະຕິບັດນະໂຍບາຍພິເສດ ເພື່ອຊຸກຍູ້ສົ່ງເສີມ ແລະ ດຶງດູດນັກລົງທຶນທັງພາຍໃນ ແລະ ຕ່າງປະເທດ, ຜູ້ປະກອບການທີ່ມີຄຸນນະພາບເຂົ້າໄປລົງທຶນຢູ່ໃນແຂວງໄຊສົມບູນເຮັດໃຫ້ມີຄຸນນະພາບ ທັງເປັນທ່າແຮງທາງດ້ານການພັດທະນາເສດຖະກິດຂອງແຂວງໄຊສົມບູນ ເປັນຕົ້ນ ດ້ານກະສິກຳ-ປ່າໄມ້, ການທ່ອງທ່ຽວ, ພະລັງງານ ແລະ ບໍ່ແຮ່ ແລະ ການບໍລິການເຊື່ອມຈອດ-ເຊື່ອມໂຍງ;
ໂດຍສະເພາະຂົງເຂດກະສິກຳ ແລະ ປ່າໄມ້ ເນັ້ນໃສ່ການລົງທຶນການຜະລິດເຕັກໂນໂລຊີສະອາດ ໃຫ້ມີຄວາມຍືນຍົງ ແລະ ຕາມທິດສີຂຽວເປັນມິດກັບສິ່ງແວດລ້ອມ ແມ່ນຈະໄດ້ຮັບນະໂຍບາຍພິເສດ ຈາກແຂວງໄຊສົມບູນ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
