ຕອນບ່າຍ ເວລາ 2: 00 ໂມງ ຂອງວັນທີ 30 ມິຖຸນາ 2020 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມເພື່ອປຶກສາຫາລືແຜນໂຄງການຮ່ວມມືພາຍໃຕ້ແຜນແມ່ບົດພັດທະນາແລວທາງເສດຖະກິດ ລາວ-ຈີນ ໂດຍການເປັນປະທານ ຂອງ ທ່ານ ພູວຽງ ພົງສາ ຫົວໜ້າກົມແຜນການ ແລະ ການການຮ່ວມມື ໃນນີ້ມີຜູ້ເຂົ້າຮ່ວມຮອງຫົວໜ້າຫ້ອງການ ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກຳ ແລະ ການຄ້າ ແລະ ມີຫົວໜ້າພະແນກ ຮອງຫົວໜ້າພະແນກ ວິຊາການຕາງໜ້າຈາກ ຕົວແທນຂອງແຕ່ລະກົມຈໍານວນໜຶ່ງ ອ້ອມຂ້າງກະຊວງອຸດສາຫະກຳ ແລະ ການຄ້າ ມີຜູ້ເຂົ້າປະມານ 35 ທ່ານ.
ຈຸດປະສົງຂອງການສ້າງແຜນແມ່ບົດພັດທະນາແລວທາງເສດຖະກິດ ລາວ-ຈີນ ຫຼື ສະບັບເລກທີ 41/ນຍ, ລົງວັນທີ 5/5/2020 ຂອງຄະນະຮັບຜິດຊອບຊີ້ນຳການສ້າງແຜນແມ່ບົດພັດທະນາແລວທາງເສດຖະກິດ ລາວ-ຈີນ ແມ່ນເພື່ອຜັນຂະຫຍາຍ ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກຳ ລາວ-ຈີນ ລະຫວ່າງພັກປະຊາຊົນປະຕິວັດລາວ ແລະ ພັກຄອມມຸນິດຈີນກ່ຽວກັບການຊຸກຍູ້ກໍ່ສ້າງ ‘‘ໜຶ່ງແລວ ໜຶ່ງເສັ້ນທາງ’’ ແລະ ບົດບັນທຶກຄວາມເຂົ້າໃຈກ່ຽວກັບການຮ່ວມກັນສ້າງແລວທາງເສດຖະກິດ ລາວ-ຈີນ ຂອບການຮ່ວມມືເສດຖະກິດໃຫ້ມີໝາກຜົນເປັນຈິງ.ໃນການຄົ້ນຄ້ວາປຶກສາຫາລືຄັ້ງນີ້
ໂດຍສະເພາະຂະແໜງອຸດສາຫະກຳ ແລະ ການຄ້າ ທີ່ເປັນໜຶ່ງໃນ 10 ຂະແໜງຮ່ວມມືຂອງແຜນແມ່ບົດນີ້ຈະໄດ້ສະເໜີເພີ່ມຕື່ມຈາກກອງເລຂາຂອງຄະນະຊີ້ນໍໄດ້ສົ່ງມາເພື່ອຊາບໂດຍອີງໃສ່ບັນດາໂຄງການທີ່ແຕ່ລະກົມໄດ້ສົ່ງມາໃຫ້ກົມແຜນການ ແລະ ການຮ່ວມມື ໃນນາມເປັນກອງເລຂາຊ່ວຍວຽກຄະນະຊີ້ນຳນີ້ ທີ່ເຫັນວ່າເໝາະສົມ ແລະ ເຂົ້າກັບເນື້ອໃນຈິດໃຈຂອງສອງລັດຖະບານທີ່ຢາກຮ່ວມມືກັນ ແລະ ໃຫ້ສາມາດຈັດຕັ້ງປະຕີບັດເປັນຮູບປະທຳໄດ້ໃນຂະແໜງອຸດສາຫະກຳ ແລະ ການຄ້າ ຂອງພວກເຮົາໄດ້.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
