ນະຄອນຫຼວງວຽງຈັນ, 24 ກໍລະກົດ 2020 ກອງປະຊຸມກາງປີ ຂອງໜ່ວຍງານຂະແໜງການຄ້າ ແລະ ພາກເອກະຊົນໄດ້ຈັດຂຶ້ນທີໂຮງແຮມ ແລນມາກ, ນະຄອນຫຼວງວຽງຈັນ, ເພື່ອປຶກສາຫາລືກ່ຽວກັບຜົນກະທົບຂອງການລະບາດ ພະຍາດອັກເສບປອດຈາກເຊື້ອຈຸລະໂລກ ສາຍພັນໃໝ່ ຫຼື ໂຄວິດ-19 ຕໍ່ກັບເສດຖະກິດຂອງ ສປປ ລາວ
ກອງປະຊຸມໄດ້ໃຫ້ກຽດເປັນປະທານໂດຍ ທ່ານ ສົມຈິດ ອິນທະມິດ, ຮອງລັດຖະມົນຕີ, ກະຊວງອຸດສະຫະກໍາ ແລະ ການຄ້າ, ແລະ ເປັນປະທານຮ່ວມໂດຍ ທ່ານ Leo Faber, ເອກອັກຄະລັດຖະທູດ ສະຫະພາບເອີຣົບ ປະຈໍາ ສປປ ລາວ ແລະ ທ່ານ Paul Stephens, ອຸປະທູດ ປະເທດອົດສະຕຣາລີ ປະຈໍາ ສປປ ລາວ, ພ້ອມດ້ວຍຜູ້ເຂົ້າຮ່ວມຫຼາຍກວ່າ 80 ທ່ານຈາກບັນດາກະຊວງທີ່ກ່ຽວຂ້ອງ, ສະຖານທູດ, ຄູ່ຮ່ວມພັດທະນາ ແລະ ພາກເອກະຊົນທັງພາຍໃນ ແລະ ຕ່າງປະເທດ.
ທ່ານ ສົມຈິດ ອິນທະມິດ, ຮອງລັດຖະມົນຕີ, ກະຊວງອຸດສະຫະກໍາ ແລະ ການຄ້າ ໄດ້ກ່າວເປີດກອງປະຊຸມພ້ອມທັງ ເນັ້ນໜັກເຖິງຫົວຂໍ້ສໍາຄັນ ກ່ຽວກັບຜົນກະທົບຂອງການລະບາດພະຍາດ ໂຄວິດ-19 ຕໍ່ກັບ ເສດຖະກິດຂອງ ສປປ ລາວ ແລະ ມາດຕະການຮັບມືຂອງລັດຖະບານ ສປປ ລາວ ຕໍ່ກັບພະຍາດລະບາດດັ່ງກ່າວ.ທ່ານ ຮອງລັດຖະມົນຕີ ຍັງໄດ້ກ່າວວ່າ ກອງປະຊຸມຂອງພວກເຮົາໄດ້ຈັດຂຶ້ນທ່າມກາງການລະບາດຂອງພະຍາດ ໂຄວິດ-19, ເຊິ່ງໄດ້ສົ່ງຜົນກະທົບທາງດ້ານສຸຂະພາບ, ຄວາມປອດໄພ ແລະ ຊີວິດການເປັນຢູ່ໂດຍລວມຂອງປະຊາຊົນທົ່ວໂລກ ກໍຄື ເສດຖະກິດໂລກ, ລວມທັງເສດຖະກິດຂອງ ສປປ ລາວ ທີ່ກໍາລັງປະເຊີນກັບບັນຫາທີ່ເປັນສິ່ງກີດຂວາງຕໍ່ການພັດທະນາ ແລະ ຄວາມຈຳກັດດ້ານງົບປະມານຂອງລັດຖະບານ – ເນື່ອງຈາກຄວາມຕ້ອງການຊົມໃຊ້ ຈາກທົ່ວໂລກຫຼຸດລົງຢ່າງກະທັນຫັນ, ການຢຸດສະຫງັດຂອງຕ່ອງໂສ້ການຜະລິດ, ລາຍຮັບຈາກຂະແໜງການທ່ອງທ່ຽວ ແລະ ການສົ່ງເງິນກັບຄືນປະເທດ ທີ່ຫຼຸດລົງຢ່າງຫຼວງຫຼາຍ. ສະຖານະການດັ່ງກ່າວນີ້ກໍຄ້າຍຄືກັນກັບຫຼາຍໆປະເທດທົ່ວໂລກ ເມື່ອການລະບາດຂອງພະຍາດ ໂຄວິດ-19 ເຮັດໃຫ້ຫົວໜ່ວຍທຸລະກິດທີ່ສໍາຄັນຕ້ອງໄດ້ປິດລົງ, ທາງລັດຖະບານຂອງພວກເຮົາກໍໄດ້ມີມາດຕະການສຸກເສີນເພື່ອປ້ອງກັນແຮງງານ ແລະ ຫົວໜ່ວຍທຸລະກິດທີ່ມີຄວາມສ່ຽງ ຈາກຜົນກະທົບທີ່ຮ້າຍແຮງທີ່ສຸດຕໍ່ກັບວຽກງານທາງເສດຖະກິດທີ່ຫຼຸດລົງຢ່າງໄວວາ.
ນອກຈາກນີ້, ເພິ່ນຍັງໄດ້ກ່າວເຖິງຄວາມຄືບໜ້າຂອງບົດປັບປຸງບົດວິໄຈການເຊື່ອມໂຍງເຂົ້າສາກົນດ້ານການຄ້າ 2020 ໂດຍ ກະຊວງອຸດສະຫະກໍາ ແລະ ການຄ້າ ວ່າ ຄວາມຄືບໜ້າຂອງບົດປັບປຸງບົດວິໄຈດັ່ງກ່າວໄດ້ອີງໃສ່ບົດລາຍງານການທົບທວນ ທີ່ພວກເຮົາມີ, ລາຍລະອຽດຈາກການສໍາພາດຈາກບັນດາພາກສ່ວນລວມທັງພາກລັດ, ພາກເອກະຊົນ. ວຽກງານດັ່ງກ່າວ ຈະລວມເອົາການຄົ້ນຄວ້າ, ການວິໄຈ ແລະ ການປຶກສາຫາລື ເພື່ອເຂົ້າເຖິງຂໍ້ມູນຈາກຜູ້ຕາງໜ້າຈາກວິສາຫະກິດເອກະຊົນ (ໂດຍຜ່ານ ທາງໂທລະສັບ ແລະ ທາງໂທລະສັບໃນຮູບແບບວິດີໂອ) ລວມທັງທຸລະກິດດ້ານກະສິກໍາ, ໂຮງຈັກໂຮງງານ ແລະ ການທ່ອງທ່ຽວ.ຫຼັງຈາກການກ່າວເປີດກອງປະຊຸມໂດຍທ່ານຮອງລັດຖະມົນຕີ ກະຊວງອຸດສະຫະກໍາ ແລະ ການຄ້າ, ທ່ານ Paul Stephens ໄດ້ເນັ້ນໜັກເຖິງຄວາມສໍາຄັນຂອງການຮ່ວມມືລະຫວ່າງລັດຖະບານ ແລະ ບັນດາຄູ່ຮ່ວມພັດທະນາ ແລະ ພາກສ່ວນເອກະຊົນ ທັງພາຍໃນ ແລະ ຕ່າງປະເທດ ເພື່ອພ້ອມກັນຮັບມືກັບຜົນກະທົບຂອງພະຍາດລະບາດ ໂຄວິດ-19 ແລະ ການຟື້ນຟູເສດຖະກິດຂອງ ສປປ ລາວ ໃນໄລຍະຍາວ.ທ່ານ Paul Stephens ໄດ້ກ່າວໃນການເປີດກອງປະຊຸມວ່າ: ເນື່ອງຈາກການລະບາດຂອງພະຍາດ ໂຄວິດ-19 ແລະ ຜົນກະທົບຂອງພະຍາດດັ່ງກ່າວຕໍ່ກັບເສດຖະກິດ, ສຸຂະພາບ, ການເຕີບໂຕຂອງເສດຖະກິດທີ່ຍືນຍົງ ແລະ ສະຖຽນລະພາບ ທາງດ້ານເສດຖະກິດເປັນສິ່ງທີ່ສໍາຄັນທີ່ສຸດ. ໃນຂະນະທີ່ຜົນກະທົບຂອງພະຍາດດັ່ງກ່າວຕໍ່ກັບເສດຖະກິດຕົວຈິງຂອງ ສປປ ລາວ ຈະບໍ່ປະກົດເຫັນໄດ້ຢ່າງຊັດເຈນ, ພວກເຮົາຮູ້ວ່າການລະບາດພະຍາດດັ່ງກ່າວຈະສົ່ງຜົນກະທົບຢ່າງຮຸນແຮງຕໍ່ກັບທຸລະກິດ ແລະ ການຂະຫຍາຍຕົວທາງດ້ານເສດຖະກິດ. ດັ່ງນັ້ນ, ບັນດາຄູ່ຮ່ວມພັດທະນາ ຕ້ອງຮ່ວມມືກັນຢ່າງໃກ້ຊິດກັບລັດຖະບານລາວ ເພື່ອຮັບປະກັນວ່າຊັບພະຍາກອນຂອງລັດຖະບານ ແລະ ບັນດາຄູ່ຮ່ວມພັດທະນາໄດ້ຖືເປັນບູລິມະສິດເພື່ອສາມາດບັນລຸເປົ້າໝາຍການໃນການຮັບມືກັບຜົນກະທົບໃຫ້ຫຼາຍທີ່ສຸດ, ຮັກສາ ສະຖຽນລະພາບ ແລະ ເພີ່ມທະວີວຽກງານປັບປຸງໃນຂົງເຂດຕ່າງໆ ແລະ ຮັບປະກັນການຮ່ວມມືຢ່າງໃກ້ຊິດລະຫວ່າງບັນດາ ຄູ່ຮ່ວມພັດທະນາ ແລະ ພາກລັດທີ່ກ່ຽວຂ້ອງ.ກອງປະຊຸມດັ່ງກ່າວໄດ້ນຳສະເໜີຫົວຂໍ້ຕ່າງໆທີ່ສຳຄັນການ ຄື: ຜົນກະທົບທາງດ້ານເສດຖະກິດເນື່ອງຈາກການລະບາດພະຍາດ ໂຄວິດ-19 ໃນປະເທດລາວ, ວິທີຮັບມືຕໍ່ກັບຜົນກະທົບຈາກການລະບາດພະຍາດດັ່ງກ່າວ, ນະໂຍບາຍລັດຖະບານ ສປປ ລາວ ໃນການຮັບມືກັບຜົນກະທົບຂອງພະຍາດລະບາດ ໂຄວິດ-19, ການດຸ່ນດ່ຽງ ລະຫວ່າງ ມາດຕະການແກ້ໄຂຜົນກະທົບ ດ້ານສາທາລະນະສຸກ ກັບ ມາດຕະການແກ້ໄຂຜົນກະທົບດ້ານເສດຖະກິດ ຂອງພະຍາດລະບາດ ໂຄວິດ-19. ສຸດທ້າຍແມ່ນ ນໍາສະເໜີຄວາມຄືບໜ້າການຈັດຕັ້ງປະຕິບັດ ຄໍາສັ່ງນາຍົກລັດຖະມົນຕີ ເລກທີ 02/ນຍ ແລະ 03/ນຍ ແລະ ການນໍາສະເໜີການແກ້ໄຂຂໍ້ຂັດແຍ່ງທີ່ຕິດພັນກັບການລົງທຶນ ໃນ ສປປ ລາວ.ໃນຕອນທ້າຍຂອງກອງປະຊຸມ ໄດ້ມີພິທີເປີດໂຕແຜນປະຕິບັດຍຸດທະສາດດ້ານບົດບາດຍິງ-ຊາຍຂອງໂຄງການສົ່ງເສີມ ຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ ຢ່າງເປັນທາງການ.
ໃນບົດກ່າວປິດກອງປະຊຸມ, ທ່ານ Leo Faber ເອກອັກຄະລັດຖະທູດ ສະຫະພາບເອີຣົບປະຈຳ ສປປ ລາວ, ປະທານຮ່ວມໃນກອງປະຊຸມ, ໄດ້ເນັ້ນໜັກເຖິງການສ້າງຕັ້ງເງື່ອນໄຂທຳອິິດໃນການປັບປຸງຕະຫຼາດພາຍໃນປະເທດລາວໃນທຸກ ພາກສ່ວນ, ລວມທັງຂັ້ນຕອນການແກ້ໄຂບັນຫາຢ່າງມີປະສິດທິພາບ. ເພິ່ນຍັງໄດ້ກ່າວຕື່ມວ່າໃນຂະນະທີ່ປະເທດລາວຍັງສາມາດ ຫຼີກລ້ຽງຜົນກະທົບທາງດ້ານສຸຂະພາບຈາກວິກິດຂອງ ພະຍາດ ໂຄວິດ-19, ອຸປະສັກທີ່ເກີດຈາກພະຍາດດັ່ງກ່າວຕໍ່ກັບ ຕ່ອງໂສ້ຜູ້ຜະລິດໄດ້ສົ່ງຜົນຢ່າງຮຸນແຮງໃຫ້ກັບເສົາຄໍ້າທີ່ສໍາຄັນທາງດ້ານເສດຖະກິດ ເຊັ່ນ: ຂະແໜງການທ່ອງທ່ຽວ, ການບໍລິການ ແລະ ການສົ່ງເງິນກັບຄືນປະເທດ.ໃນບົດກ່າວປິດກອງປະຊຸມ, ທ່ານ ສົມຈິດ ອິດທະມິດ ໄດ້ເນັ້ນໜັກຕໍ່ກັບໜ້າທີ່ຮັບຜິດຊອບຂອງລັດຖະບານຕໍ່ກັບ ການຮ່ວມມືຢ່າງໃກ້ຊິດກັບບັນດາຄູ່ຮ່ວມພັດທະນາ ແລະ ພາກເອກະຊົນໃນການສະໜັບສະໜູນຈັດຕັ້ງປະຕິບັດມາດຕະການ ທີ່ສຸມໃສ່ການຮັກສາອາຊີບ ແລະ ຊີວິດການເປັນຢູ່ຂອງ ປະຊາຊົນ, ໃຫ້ບູລິມະສິດດ້ານສາທາລະນະສຸກ ແລະ ການຮັກສາຄວາມປອດໄພຂອງຜູ້ອອກແຮງງານ, ຜູ້ເຮັດວຽກຊຸມຊົນ ແລະ ພະນັກງານສາທາລະນະສຸກ, ປົກປ້ອງວິສາຫະກິດ ຂະໜາດນ້ອຍ ແລະ ຂະໜາດກາງ, ຮັບປະກັນໃຫ້ທຸລະກິດ ແລະ ຕ່ອງໂສ້ຜູ້ຜະລິດ ໃຫ້ສາມາດດໍາເນີນທຸລະກິດໄດ້, ລະດົມຄວາມອາດສາມາດ ແລະ ທຶນຮອນຂອງພາກເອກະຊົນ ແລະ ປົກປ້ອງຄວາມໝັ້ນຄົງຂອງສັງຄົມ. ສຸດທ້າຍນີ້, ທ່ານປະທານກອງປະຊຸມໄດ້ປິດກອງປະຊຸມດ້ວຍການສະແດງຄວາມຂອບໃຈ ມາຍັງ ຜູ້ບັນຍາຍ, ປະທານຮ່ວມ ແລະ ແຂກຜູ້ເຂົ້າຮ່ວມທັງໝົດ ທີ່ເຂົ້າຮ່ວມໃນກອງປະຊຸມຢ່າງຕັ້ງໜ້າ. ໜ່ວຍງານ TPSWG ແມ່ນໜຶ່ງໃນສິບໜ່ວຍງານ ພາຍໃຕ້ຂະບວນການໂຕະມົນ ແລະ ເປັນເວທີຫຼັກສໍາລັບການ ປຶກ ສາຫາລື ດ້ານນະໂຍບາຍ ລະຫວ່າງພາກລັດ ແລະ ບັນດາຄູ່ຮ່ວມພັດທະນາ. ບັນດາຜູ້ທີ່ເຂົ້າຮ່ວມ ໃນກອງປະຊຸມ ແມ່ນ ມາຈາກພາກລັດ, ຄູ່ຮ່ວມພັດທະນາ, ພາກທຸລະກິດ ແລະ ອົງການຈັດຕັ້ງສັງຄົມ. ສ່ວນໜ່ວຍງານຂະແໜງການອື່ນ ອີກ 9 ໜ່ວຍງານມີ: ສາທາ; ສຶກສາ; ການປົກຄອງ; ເສດຖະກິດມະຫາພາກ; ໂຄງລ່າງພື້ນຖານ; ການຄວບຄຸມບັນຫາ ຢາ ເສບຕິດ; ລະເບີດບໍ່ທັນແຕກ; ກະສິກຳ ແລະ ພັດທະນາຊົນນະບົດ; ແລະ ການຄຸ້ມຄອງຊັບພະຍາກອນ ທຳມະຊາດ ແລະ ສິ່ງແວດລ້ອມ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
