ຕອນບ່າຍ ເວລາ 1: 30 ໂມງ ຂອງວັນທີ 27 ກໍລະກົດ 2020 ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມໃຫຍ່ຜູ້ແທນສະຫະພັນແມ່ຍິງ ກະຊວງ ອຄ ຄັ້ງທີ V ຂຶ້ນ ທີ່ສູນຝືກອົບຮົມສະຫະພັນແມ່ຍິງລາວ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ນາງ ຈັນສຸກ ແສງພະຈັນ ປະທານສະຫະພັນແມ່ຍິງ ກະຊວງ ອຄ ເປັນກຽດເຂົ້າຮ່ວມໂດຍ ທ່ານ ນາງ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງ ອຄ, ທ່ານ ນາງ ບົວຈັນ ສີຫານາດ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ ພ້ອມດ້ວຍຄະນະບໍລິຫານງານສະຫະພັນກຳມະບານ, ເລຂາຊາວໜຸ່ມກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ທ່ານ ນາງ ຈັນສຸກ ແສງພະຈັນ ໄດ້ຂຶ້ນຜ່ານບົດລາຍງານການເມືອງຜົນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງສະຫະພັນແມ່ຍິງກະຊວງ ອຄ ໃນໄລຍະຜ່ານມາ (2011-2019) ແລະ ທິດທາງ 5 ປີຕໍ່ໜ້າ ເຊິ່ງໃຫ້ຮູ້ວ່າ: ປັດຈຸບັນສະຫະພັນແມ່ຍິງກະຊວງ ອຄ ມີທັງໝົດ 615 ທ່ານ, ມີສະມາຊິກແມ່ຍິງ 530 ທ່ານ, ໃນນີ້ຂົງເຂດບໍລິຫານລັດມີ 184 ທ່ານ, ລັດວິສາຫະກິດມີ 93 ທ່ານ, ບໍລິສັດຮ່ວມທຶນມີ 230 ທ່ານ ແລະ ສະພາການຄ້າ ແລະ ອຸດສາຫະກໍາແຫ່ງຊາດ ມີ 23 ທ່ານ. ດ້ານຜົນງານ 8 ປີຜ່ານມາ ນັບຕັ້ງແຕ່ສະຫະພັນແມ່ຍິງກະຊວງ ອຄ ພາຍໃຕ້ການນຳພາຂອງອົງຄະນະພັກກະຊວງ ແລະ ສູນກາງສະຫະພັນແມ່ຍິງລາວ ມັນໄດ້ສ້າງເງື່ອນໄຂໃຫ້ສະຫະພັນແມ່ຍິງກະຊວງ ອຄ ໄດ້ເຄື່ອນໄຫວຕາມພາລະບົດບາດ ແລະ ໜ້າທີ່ຂອງຕົນ, ເອື້ອຍນ້ອງແມ່ຍິງໄດ້ຮັບການພັດທະນາໃນທຸກດ້ານ, ໄດ້ເຂົ້າຮ່ວມການເຄື່ອນໄຫວວຽກງານຂອງພັກ-ລັດ ແລະ ສັງຄົມ ນັບມື້ນັບຫຼາຍຂຶ້ນ, ຈັດຕັ້ງປະຕິບັດຂໍ້ແຂ່ງຂັນ 3 ດີຂອງແມ່ຍິງ ແລະ ໃນໄລຍະ 3 ປີຜ່ານມາ (2017-2019) ເອື້ອຍນ້ອງແມ່ຍິງໄດ້ຮັບການເລື່ອນຕໍາແໜ່ງເປັນຮອງຫົວໜ້າກົມ 3 ທ່ານ, ເປັນຫົວໜ້າພະແນກ 10 ທ່ານ ແລະ ເປັນຮອງຫົວໜ້າພະແນກ 17 ທ່ານ, ໄດ້ຮັບການຝືກອົບຮົມ ແລະ ຍົກລະດັບດ້ານຕ່າງໆຄື: ຍົກລະດັບວິຊາສະເພາະປະລິນຍາເອກ 2 ທ່ານ, ປະລິນຍາໂທ 6 ທ່ານ, ຍົກລະດັບທິດສະດີການເມືອງຊັ້ນສູງຢູ່ພາຍໃນ ແລະ ຕ່າງປະເທດ 3 ທ່ານ, ຮຽນ 45 ວັນ 71 ທ່ານ, ພາສາຕ່າງປະເທດຢູ່ພາຍໃນ 51 ທ່ານ, ຢູ່ຕ່າງປະເທດ 2 ທ່ານ, ຝຶກອົບຮົມຢູ່ພາຍໃນ 350 ທ່ານ ແລະ ຢູ່ຕ່າງປະເທດ 540 ເທື່ອຄົນ. ພ້ອມນັ້ນ, ຍັງໄດ້ປະກອບສ່ວນໃນການສົ່ງເສີມວຽກງານ ໜຶ່ງເມືອງ ໜຶ່ງຜະລິດຕະພັນແຫ່ງຊາດ (ODOP) ສາມາດອອກໃບອະນຸຍາດການນໍາໃຊ້ກາໝາຍສິນຄ້າ ODOP ໃຫ້ແກ່ຫົວໜ່ວຍທຸລະກິດ 227 ຫົວໜ່ວຍ. ໃນນີ້ ຫົວໜ່ວຍທີ່ແມ່ຍິງເປັນເຈົ້າຂອງມີ 99 ຫົວໜ່ວຍ, ມີຜະລິດຕະພັນທັງໝົດ 824 ຊຶ່ງເປັນຜະລິດຕະພັນ ຈາກ 219 ບ້ານ ໃນ 97 ເມືອງ.
ນອກຈາກນີ້, ປະທານກອງປະຊຸມຍັງໄດ້ລາຍງານ, ດ້ານອ່ອນ, ຂໍ້ຄົງຄ້າງ ແລະ ວາງທິດທາງ 5 ປີຕໍ່ໜ້າ ໂດຍເນັ້ນໃຫ້ສະມາຊິກໄດ້ເຊື່ອມຊຶມຄົ້ນຄວ້ານະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ແຜນພັດທະນາແມ່ຍິງລາວໃຫ້ກວມ 85% ຂຶ້ນໄປ, ສືບຕໍ່ປະຕິບັດຂໍ້ແຂ່ງຂັນ ຂອງສະຫະພັນແມ່ຍິງລາວ ຕິດພັນກັບວຽກ 3 ສ້າງ ໃຫ້ກວມ 90% ຂຶ້ນໄປ ແລະ ບັນຈຸສັບຊ້ອນເອື້ອຍນ້ອງແມ່ຍິງເຂົ້າໃນຕໍາແໜ່ງນໍາພາ-ຄຸ້ມຄອງ ໃນແຕ່ລະຂັ້ນ.
ໃນກອງປະຊຸມຄັ້ງນີ້ ຍັງໄດ້ມີການປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງ ກະຊວງ ອຄ ຊຸດໃໝ່ ປະກອບມີຜູ້ສະໝັກຈຳນວນ 13 ທ່ານ ໂດຍເລືອກເອົາ 11 ທ່ານ ແລະ ໄດ້ເປັນເອກະສັນເລືອກເອົາຄື: 1. ທ່ານ ນາງ ສົມໝາຍ ພົມມຸນິວົງ ເປັນປະທານຄະນະບໍລິຫານງານສະຫະພັນແມ່ຍິງກະຊວງ ອຄ, 2. ທ່ານ ນາງ ກິ່ງສະດອນ ເພັດດາວເຮືອງ ເປັນຮອງປະທານ, 3. ທ່ານ ນາງ ມະນີວອນ ວົງໄຊ ເປັນຮອງປະທານ ທັງເປັນປະທານກວດກາ ນອກນັ້ນເປັນຄະນະບໍລິຫານງານສະຫະພັນແມ່ຍິງ ກະຊວງ ອຄ ຊຸດໃໝ່.
ໃນໂອກາດນີ້ ທ່ານ ນາງ ເຂັມມະນີ ພົນເສນາ ໄດ້ໂອ້ລົມພ້ອມຍ້ອງຍໍຊົມເຊີຍຕໍ່ຜົນສໍາເລັດຂອງເອື້ອຍນ້ອງແມ່ຍິງຊຸດຜ່ານມາ ແລະ ເນັ້ນໃຫ້ຄະນະບໍລິຫານງານສະຫະພັນແມ່ຍິງຊຸດໃໝ່ ເສີມຂະຫຍາຍມູນເຊື້ອທີ່ດີງາມ ແລະ ຜົນງານທີ່ພົ້ນເດັ່ນ ຂອງເອື້ອຍນ້ອງແມ່ຍິງຕະຫຼອດໄລຍະຜ່ານມາ ແລະ ສະກັດກັ້ນບາງປະກົດການຫຍໍ້ທໍ້ໃນກົງຈັກການຈັດຕັ້ງໃນຕໍ່ໜ້າຄື: 1/. ພ້ອມກັນເອົາໃຈໃສ່ນໍາພາ-ຊີ້ນຳ ອົງການຈັດຕັ້ງສະຫະພັນແມ່ຍິງກະຊວງ ອຄ ໃຫ້ມີການເຄື່ອນໄຫວຕາມພາລະບົດບາດຂອງຕົນຢ່າງເປັນຂະບວນຟົດຟື້ນ ແລະ ມີຜົນສໍາເລັດຍິ່ງໃຫຍ່ກວ່າເກົ່າ. 2/. ຄະນະຊຸດໃໝ່ ຈົ່ງໄດ້ແບ່ງຄວາມຮັບຜິດຊອບພາຍໃນຄະນະບໍລິຫານງານໃຫ້ລະອຽດ, ຈະແຈ້ງ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ. 3/. ສືບຕໍ່ສຶກສາອົບຮົມການເມືອງ-ແນວຄິດ ຕໍ່ສະມາຊິກສະຫະພັນແມ່ຍິງ ອ້ອມຂ້າງກະຊວງໃຫ້ເລິກເຊິ່ງ. 4/. ໃຫ້ເພີ່ມທະວີການປະສານສົມທົບກັບຄະນະບໍລິຫານງານຊຸດໃໝ່ໃຫ້ກົມກຽວ ເພື່ອພ້ອມກັນເຮັດໜ້າທີ່ ຂອງອົງການຈັດຕັ້ງສະຫະພັນແມ່ຍິງໃຫ້ເຂັ້ມແຂງ. 5/. ໃຫ້ເອື້ອຍນ້ອງແມ່ຍິງທັງໝົດທົ່ວກະຊວງ ອຄ ຈົ່ງໄດ້ເອົາໃຈໃສ່ ແລະ ເປັນເຈົ້າການໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ. 5/. ສືບຕໍ່ເອົາໃຈໃສ່ຕິດຕາມເກັບກໍາສະພາບຂອງສະມາຊິກ ທີ່ຢູ່ໃນຄວາມຮັບຜິດຊອບຂອງຕົນຢ່າງໃກ້ຊິດ, ກຳໃຫ້ແໜ້ນ ສະພາບການເຄື່ອນໄຫວ, ຊີວິດການເປັນຢູ່ ແລະ ແນວຄວາມຄິດ ຂອງແຕ່ລະຄົນເມື່ອເກີດມີສະພາບຈົ່ງແກ້ໄຂໃຫ້ທັນເວລາ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
