ໃນວັນທີ 28 ສິງຫາ 2020 ຜ່ານ​ມາ, ຢູ່ທີ່ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມທາງໄກ ເຜີຍແຜ່ຜົນການຄົ້ນຄວ້າໂຄງການຮ່ວມມືລະດັບພາກພື້ນ ໃນຫົວ​ຂໍ້: “ການ​ຄ້າ​ສິນຄ້າ​ກະສິກໍາ​ ລະຫວ່າງ ສປ ຈີນ ​ແລະ ບັນດາ​ປະ​ເທດລຸ່ມ​ແມ່ນໍ້າຂອງ: ການ​ວິ​ເຄາະ​ຕ່ອງ​ໂສ້ມູນ​ຄ່າ (Agricultural Trade between China and the GMS Countries: Value Chain Analysis) ໂດຍຮັບການສະໜັບສະໜູນຈາກສະ​ຖາ​ບັນແຫ່ງການ​ພັດທະນາ ​ຂອງປະເທດກຳປູ​ເຈຍ (CDRI) ພາຍ​ໃຕ້​ກອງ​ທຶນ​ເ​ເມ່ນໍ້າຂອງ-ແມ່ນໍ້າ​ລ້ານ​ຊ້າງ. ສໍາລັບຕາງໜ້າຄະນະຄົ້ນຄວ້າຂອງ ສປປ ລາວ ແມ່ນເປັນປະທານໂດຍ ທ່ານ ວຽງສະຫວ່າງ ທິບພະວົງ ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ແລະ ມີແຂກເຂົ້າຮ່ວມທັງໝົດ 27 ທ່ານ ທີ່ປະກອບມີນັກຄົ້ນຄວ້າຈາກສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ບັນດາກົມອ້ອມຂ້າງກະຊວງອຸດສາຫະກໍາ ແລະ ການຄ້າ, ສະພາການຄ້າ ແລະ ອຸດສາຫະກໍາ ແລະ ຜູ້ເຂົ້າຮ່ວມຈາກພາກທຸລະກິດ.

       ຈຸດປະສົງຂອງ​ກອງ​ປະຊຸມ ​ແມ່ນ ເພື່ອເຜີຍແຜ່ຜົນການຄົ້ນຄວ້າ ແລະ ສ້າງຄວາມເປັນເອກະພາບກັນລະຫວ່າງນັກຄົ້ນຄວ້າທີ່ເປັນຕົວແທນຂອງທັງ 6 ປະເທດ ຄື: ສປປ ລາວ, ກໍາປູເຈຍ, ຫວຽດນາມ, ມຽນມາ, ໄທ ແລະ ສປ ຈີນ ແລະ ເພື່ອເປັນການປຶກສາຫາລືແລກປ່ຽນຄໍາຄິດເຫັນຈາກພາກສ່ວນຕ່າງໆ ທີ່ກ່ຽວຂ້ອງ; ເນື້ອໃນລວມບົດຄົ້ນຄວ້າຂອງ 6 ປະເທດ ແມ່ນໄດ້ເນັ້ນການວິເຄາະຕ່ອງໂສ້ມູນຄ່າເພີ້ມຂອງການຄ້າສິນຄ້າກະສິກໍາ ລະຫວ່າງ ສປ ຈີນ ແລະ ບັນດາປະເທດລຸ່ມແມ່ນໍ້າຂອງ ​ເຊີ່ງ​ສິນຄ້າກະສິກໍາຖືວ່າເປັນສິນຄ້າທີ່ມີບົດບາດສໍາຄັນຫຼາຍຕໍ່ຊີວິດການເປັນຢູ່ຂອງປະຊາຊົນໃນຂົງເຂດນີ້. ສໍາລັບ ສປປ ລາວ ບົດຄົ້ນຄວ້າໄດ້ລົງເລິກສຶກສາກໍລະນີຕ່ອງໂສ້ມູນຄ່າເພີ້ມຂອງເຂົ້າ ແລະ ໝາກກ້ວຍທີ່ສົ່ງໄປ ສປ ຈີນ. ການເຂົ້າຮ່ວມ​ຄົ້ນຄວ້າ ກັບບັນດາສະຖາບັນ​ ຂອງ​ບັນດາ​ປະ​ເທດລຸ່ມແມ່ນໍ້າຂອງຄັ້ງນີ້ ໄດ້ເຮັດໃຫ້ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ຖືກຮັບຮູ້ຫຼາຍຂຶ້ນໃນວຽກງານຄົ້ນຄວ້າຢູ່ລະດັບພາກພື້ນ ແລະ ກໍຍັງເປັນ​ປະ​ໂຫຍ​ດຫຼາຍ​ໃນການນໍາໃຊ້ບົດຮຽນຈາກຜົນການຄົ້ນຄວ້າ ເພື່ອສະເໜີແນະທາງດ້ານວິຊາການໃຫ້ກະຊວງອຸດສາຫະກໍາ ແລະ ການຄ້າ ແລະ ສັງຄົມຕໍ່ວິທີການສົ່ງເສີມຜະລິດກະສິກໍາເປັນສິນຄ້າສົ່ງອອກ, ບົດຮຽນທັງດ້ານດີ, ດ້ານອ່ອນ ແລະ ສິ່ງທ້າທາຍຕໍ່ການຄ້າສິນຄ້າກະສິກໍາລະຫວ່າງ ສປປ ລາວ ແລະ ສປ ຈີນ.

       ກອງປະຊຸມ ໄດ້ຮັບຟັງການລາຍງານຫຍໍ້ຄວາມເປັນມາຂອງໂຄງການ, ການນໍາສະເໜີຜົນຂອງການຄົ້ນຄວ້າຂອງແຕ່ລະປະເທດ ຕະຫຼອດເຖິງໄດ້ຮັບຟັງການປຶກສາຫາລື ແລະ ແລກປ່ຽນຄໍາຄິດເຫັນດ້ານວິຊາການ ພ້ອມທັງຍົກປະເດັນບັນຫາທີ່ໜ້າສົນໃຈໃນການຄົ້ນຄວ້າຫົວຂໍ້ດັ່ງກ່າວຂຶ້ນມາປຶກສາຫາລື ແລະ ແລກປ່ຽນຄໍາຄິດຄໍາເຫັນຢ່າງກົງໄປກົງມາ. ຜົນທີ່ໄດ້ຮັບຈາກກອງປະຊຸມຄັ້ງນີ້ແມ່ນໄດ້ສ້າງຄວາມເຂົ້າໃຈຮ່ວມກັນກ່ຽວກັບຜົນຂອງການຄົ້ນຄວ້າ ຕະຫຼອດເຖິງການຖອດຖອນບົດຮຽນຕໍ່ບັນຫາທີ່ເກີດຂຶ້ນໃນການຄ້າສິນຄ້າກະສິກໍາຢູ່ບັນດາປະເທດລຸ່ມແມ່ນໍ້າຂອງ ເພື່ອຫາວິທີທາງແກ້ໄຂໂດຍຜ່ານການຄົ້ນຄວ້າ ແລະ ສະເໜີແນະຕໍ່ລັດຖະບານຂອງແຕ່ລະປະເທດໃນຕໍ່ໜ້າ.

​ແຫຼ່ງຂ່າວ: ສະ​ຖາ​ບັນ​ຄົ້ນຄວ້າ​ເສດຖະກິດ​ອຸດສາຫະກໍາ ​ແລະ ການ​ຄ້າ

ຮຽບຮຽງ​ໂດ​ຍ: ນ ຖື ​ແຫວນ​ວົງ​ສົດ ສູນ​ສະຖິຕິ ​ແລະ ຂໍ້​ມູນ​ຂ່າວສານ ກຜຮ