ຕອນເຊົ້າເວລາ 9:00 ໂມງ ຂອງວັນທີ 08 ຕຸລາ 2020 ທີ່ຫ້ອງປະຊຸມໃຫຍ່ຊັ້ນ I ກະຊວງ ອຄ ໄດ້ຈັດພິທີ ມອບ-ຮັບ ໃບຢັ້ງຢືນ ນາມມະຍົດ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ແລະ ມີບັນດາສະຫາຍຄະນະບໍລິຫານງານພັກກະຊວງ, ບັນດາສະຫາຍຄະນະພັກຮາກຖານ, ເລຂາ, ຮອງເລຂາໜ່ວຍພັກ, ຄະນະໜ່ວຍພັກ, ບັນດາຫົວໜ້າ-ຮອງພະແນກ ສັງກັດບັນດາກົມ, ຫ້ອງການ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ບັນດາບໍລິສັດ – ລັດວິສາຫະກິດ, ທີ່ຂຶ້ນກັບຄວາມຮັບຜິດຊອບຂອງກະຊວງ ອຄ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ຄະນະຮັບຜິດຊອບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເຂົ້າຮ່ວມພິທີທັງໝົດ 60 ກວ່າທ່ານ.
ພິທີມອບ-ຮັບຄັ້ງນີ້ ໂດຍພາຍໃຕ້ການເປັນປະທານ ຂອງທ່ານ ນາງ ເຂັມມະນີ ພົນເສນາ ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ປະທານຮ່ວມ ທ ສົມຈິດ ອິນທະມິດ ຄະນະປະຈໍາພັກກະຊວງ ຮອງລັດຖະມົນຕີ ກະຊວງ ອຄ ໂດຍມີຈຸດປະສົງ ເພື່ອສະຫຼຸບການຈັດຕັ້ງປະຕິບັດວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປອດໃສ, ເຂັ້ມແຂງ, ໜັກແໜ້ນ ແລະ ທິດທາງແຜນການປີ 2020 ແລະ ພິທີມອບ-ຮັບ ໃບຢັ້ງຢືນ ນາມມະຍົດ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ໃຫ້ແກ່ 21 ໜ່ວຍພັກ.
ພ້ອມທັງການຂຶ້ນຜ່ານບົດສະຫຼຸບຫຍໍ້ຜົນການຈັດຕັ້ງປະຕິບັດວຽກງານການກໍ່ສ້າງ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ໂດຍທ່ານ ນາງ ຈັກສຸກ ແສງພະຈັນ ຄະນະບໍລິຫານພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ.
ຕອນທ້າຍ ທ່ານ ນາງ ເຂັມມະນີ ພົນເສນາ ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ການໂອ້ລົມທິດຊີ້ນໍາ ໃຫ້ແກ່ບັນດາພະນັກງານສະມາຊິກພັກ ໂດຍນໍາເອົາເນື້ອໃນຂອງການປັບປຸງກໍ່ສ້າງພັກ ກວມເອົາ 5 ເນື້ອໃນເປັນຕົ້ນ (1) ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ, (2) ທາງດ້ານແນວຄິດ, (3) ທາງດ້ານການຈັດຕັ້ງ, (4) ແບບແຜນການນໍາພາ, (5) ການນໍາພາປະຕິບັດໜ້າທີ່ການເມືອງ ເຂົ້າໃນການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ. ພ້ອມດຽວກັນນີ້ ໄດ້ຕີລາຄາຫຍໍ້ ໃນບັນດາວຽກງານຜ່ານມາທີ່ມີບາງໜ່ວຍພັກສະຫຼຸບຊັກຊ້າ ຍ້ອນສະພາບການລະບາດຂອງພະຍາດໂຄວິດ-19 ແລະ ເນັ້ນໜັກບາງຈຸດເຊັ່ນ: 1/ ຄະນະໜ່ວຍພັກຕ້ອງເອົາໃຈໃສ່ ສືບຕໍ່ສຶກສາອົບຮົມການເມືອງ- ແນວຄິດ ຕໍ່ສະມາຊິກພັກພະນັກງານ ທີ່ຢູ່ໃນຄວາມຮັບຜິດຊອບຂອງຕົນຢ່າງເລິກເຊິ່ງ, ແທດເຖິງທຸກເປົ້າໝາຍ, ເພີ່ມຄວາມເອົາໃຈໃສ່ໃນການຮ່ວມຊີວິດພັກປະຈໍາເດືອນ ແລະ ການສ່ອງແສງລາຍງານ ຄະນະພັກຂັ້ນເທິງໃຫ້ເປັນປົກກະຕິ; 2/ ໜ່ວຍພັກຕ້ອງກໍາແໜ້ນສະພາບ ແລະ ຈຸດພິເສດຂອງໜ່ວຍພັກຕົນ ເພື່ອຫັນແນວທາງນະໂຍບາຍຂອງພັກ ແລະ ມະຕິຂອງຄະນະພັກຂັ້ນເທິງເປັນແຜນການຂອງໜ່ວຍພັກ ໃຫ້ສອດຄ່ອງກັບຄວາມຮັບຜິດຊອບ ແລະ ໜ້າທີ່ການເມືອງຂອງຕົນ ພ້ອມທັງເອົາໃຈໃສ່ນໍາພາ-ຊີ້ນໍາ ການຈັດຕັ້ງປະຕິບັດໃຫ້ມີຜົນສໍາເລັດ ແລະ ມີປະສິດທິຜົນສູງ; 3/ ເອົາໃຈໃສ່ສ້າງສະມາຊິກພັກໃຫ້ມີຄຸນທາດການເມືອງໜັກແໜ້ນ ມີຄຸນສົມບັດສິນທໍາປະຕິວັດ ທີ່ຖືກຕ້ອງ, ມີຄວາມຈົ່ງຮັກພັກດີຕໍ່ອຸດົມການຂອງພັກ, ມີນ້ຳໃຈເສຍສະຫຼະຮັບໃຊ້ຊາດ ຮັບໃຊ້ປະຊາຊົນຢ່າງສຸດໃຈ, ເປັນເຈົ້າການປົກປ້ອງແນວທາງ, ອຸດົມການຂອງພັກ, ຕ້ານທຸກປະກົດການທີ່ເປັນສິ່ງຫຍໍ້ທໍ້ຕ່າງໆ ທີ່ເກີດຂຶ້ນຢູ່ພາຍໃນໜ່ວຍພັກ ແລະ ສັງຄົມ, ຖ້າມີກໍ່ໃຫ້ຮີບຮ້ອນແກ້ໄຂໃຫ້ທັນການ; 4/ ຄະນະໜ່ວຍພັກ, ສະມາຊິກພັກທຸກສະຫາຍຕ້ອງມີສະຕິເຄົາລົບ ແລະ ປະຕິບັດກົດລະບຽບຂອງພັກ, ກົດໝາຍ ແລະ ລະບຽບການຕ່າງໆ ຂອງລັດຢ່າງເຂັ້ມງວດ, ເປັນແບບຢ່າງທີ່ດີໃຫ້ແກ່ມະຫາຊົນ, ພ້ອມກັນຮັກສາຄວາມສາມັກຄີເປັນເອກະພາບ ໃນການຈັດຕັ້ງພັກຢ່າງແໜ້ນແຟ້ນ, ຕ້ານແນວຄິດຫຼາຍພັກ, ຫຼາຍເຄົ້າ, ກຸ່ມກ້ອນຢູ່ໃນການຈັດຕັ້ງພັກ; * ຕ້ອງຍຶດໝັ້ນຫຼັກການລວມສູນປະຊາທິປະໄຕຢ່າງເຂັ້ມງວດ, ນໍາພາເປັນໝູ່ຄະນະ, ແບ່ງງານໃຫ້ບຸກຄົນຮັບຜິດຊອບ *ເພີ່ມຄວາມປະສານສົມທົບຢ່າງກົມກຽວ ລະຫວ່າງການນໍາພາຂອງພັກ ກັບການເສີມຂະຫຍາຍບົດບາດໜ້າທີ່, ສິດ, ການຄຸ້ມຄອງ ຂອງອົງການປົກຄອງ ແລະ ຄວາມເປັນເຈົ້າການ ຂອງອົງການຈັດຕັ້ງມະຫາຊົນ; 5/ ເອົາໃຈໃສ່ສ້າງມະຫາຊົນເພື່ອຂະຫຍາຍເຂົ້າພັກ ບົນພື້ນຖານປະຕິບັດໃຫ້ຖືກຕ້ອງຕາມມາດຖານ, ເງື່ອນໄຂ, ບາດກ້າວ, ຂັ້ນຕອນຕາມກົດລະບຽບພັກ ກໍານົດໄວ້ຢ່າງເຂັ້ມງວດ, ສໍາຄັນແມ່ນຖືຄຸນນະພາບເປັນກົກ ບໍ່ຄວນແລ່ນນໍາປະລິມານ; 6/ ດ້ານວຽກງານວິຊາສະເພາະ : ໃຫ້ສືບຕໍ່ສູ້ຊົນປະຕິບັດແຜນການຂອງແຕ່ລະໜ່ວຍພັກວາງໄວ້, ວຽກໃດເປັນຈຸດສຸມ ຕ້ອງໄດ້ແກ້ໄຂໃຫ້ທັນກັບສະພາບການ; 7/ ຄະນະໜ່ວຍພັກ-ສະມາຊິກພັກ ທຸກສະຫາຍ ຕ້ອງເປັນເຈົ້າການໃນການຈັດຕັ້ງປະຕິບັດແຜນການໜ່ວຍພັກປອດໃສ, ເຂັ້ມແຂງ, ໜັກແໜ້ນ, ປະເມີນຜົນຕ້ອງໃຫ້ທັນກັບກໍານົດເວລາ ແລະ ໃຫ້ສອດຄ່ອງກັບມາດຖານເງື່ອນໄຂ, ຜົນຂອງການປະເມີນໃຫ້ສາມາດສ່ອງແສງ ໃຫ້ເຫັນຜົນສໍາເລັດຂອງວຽກງານແຕ່ລະດ້ານ, ສອດຄ່ອງກັບສະພາບຄວາມເປັນຈິງ, ທັງນີ້ກໍ່ເພື່ອເປັນການກະຕຸກຊຸກຍູ້ໃຫ້ຂະບວນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ມີຄວາມຟົດຟື້ນ, ມີປະສິດທິຜົນ, ມີຄຸນນະພາບດີຂຶ້ນ; ແລະ ສືບຕໍ່ຮັກສາມູນເຊື້ອນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕະຫຼອດໄປ.
ແຫຼ່ງຂ່າວ: ພະແນກພັກ ແລະ ອົງການຈັດຕັ້ງມະຫາຊົນ, ກົມຈັດຕັ້ງ ແລະ ພະນັກງານ
ພາບ-ຂ່າວໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
