ຕອນເຊົ້າເວລາ 9: 00 ໂມງ ຂອງວັນທີ 12 /11 /2020 ທີ່ຫ້ອງປະຊຸມທາງໄກ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມເຜີຍແຜ່ດໍາລັດວ່າດ້ວຍການຄຸ້ມຄອງທຸລະກິດຍານພາຫະນະທາງບົກ ເລກທີ 470/ນຍ, ເພື່ອເຜີຍແຜ່ໃຫ້ ພະນັກງານຂອງຂະແໜງອຸດສາຫະກຳ ແລະ ການຄ້າ ພ້ອມດ້ວຍພາກທຸລະກິດ ໃນຂອບເຂດທົ່ວປະເທດ ໃຫ້ຮັບຮູ້ ແລະ ເຂົ້າໃຈແຈ້ງ ຕໍ່ເນື້ອໃນຂອງ ດຳລັດດັ່ງກ່າວກອງປະຊຸມດັ່ງກ່າວ ໄດ້ຈັດຂຶ້ນ ໃນວັນທີ 12-13 ພະຈິກ 2020 ຢູ່ທີ່ຫ້ອງປະຊຸມ ກະຊວງອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ນາງ ບານສະຕິ ເທບພະວົງ ຫົວໜ້າຫ້ອງການກະຊວງອຸດສາຫະກໍາ ແລະ ການຄ້າ.
ໃນກອງປະຊຸມ ທ່ານ ນາງ ບານສະຕິ ເທບພະວົງ ໄດ້ກ່າວເຖິງຈຸດປະສົງ ແລະ ເປົ້າໝາຍຫຼັກຂອງ ກອງປະຊຸມທາງໄກໃນຄັ້ງນີ້ 1) ສ້າງຄວາມເຂົ້າໃຈທີ່ເປັນເອກະພາບໃຫ້ແກ່ພາກລັດ ແລະ ເອກະຊົນ ໂດຍສະເພາະບັນດາຂະແໜງການກ່ຽວຂ້ອງຢູ່ຂັ້ນທ້ອງຖິ່ນໃນຂອບເຂດທົ່ວປະເທດ ກ່ຽວກັບເນື້ອໃນຈິດໃຈຂອງດຳລັດ ວ່າດ້ວຍ ການຄຸ້ມຄອງທຸລະກິດຍານພາຫະນະທາງບົກ ຊຶ່ງຈະມີຜູ້ຕາງໜ້າຈາກຫ້ອງການກະຊວງກົມການນຳເຂົ້າ ແລະ ສົ່ງອອກ ກົມການຄ້າພາຍໃນ ແລະ ກົມອຸດສາຫະກຳ ແລະ ຫັດຖະກຳ ມາບັນລະຍາຍລົງເລິກໃນແຕ່ລະປະເພດທຸລະກິດຍານພາຫະນະທາງບົກ. 2) ເອົາເວທີນີ້ເປັນເວລາລະດົມຄວາມຄິດເຫັນ ແລະ ປະກອບຄຳເຫັນໃສ່ບັນດາຮ່າງນິຕິກຳຜັນຂະຫຍາຍດຳລັດ ໂດຍສະເພາະແມ່ນ ຮ່າງຂໍ້ຕົກລົງວ່າດ້ວຍການແບ່ງຂັ້ນຄຸ້ມຄອງທຸລະກິດຍານພາຫະນະທາງບົກ ແລະ ຮ່າງຂໍ້ຕົກລົງວ່າດ້ວຍຊິ້ນສ່ວນຍານພາຫະນະ ທີ່ໄດ້ສຳເລັດຮ່າງເບື້ອງຕົ້ນແລ້ວ ພ້ອມນີ້ຍັງຈະຂໍຄຳເຫັນຈາກກອງປະຊຸມເພື່ອເປັນຂໍ້ມູນກ່ຽວກັບການສ້າງ ຮ່າງຄຳແນະນຳກ່ຽວກັບການອະນຸຍາດທຸລະກິດການນຳເຂົ້າ-ສົ່ງອອກ ແລະ ຈຳໜ່າຍຍານພາຫະນະລວມໄປເຖິງແຈ້ງການເລື່ອນເວລາການຈັດຕັ້ງປະຕິບັດການປັບປຸງເງື່ອນໄຂຂອງຫົວໜ່ວຍທຸລະກິດທີ່ມີຢູ່ໃນປະຈຸບັນເພື່ອໃຫ້ຖືກຕ້ອງຕາມເງື່ອນໄຂໃໝ່ທີ່ກຳນົດໄວ້ໃນດຳລັດ.
ກອງປະຊຸມໄດ້ແນະນຳໃຫ້ຮູ້ເຖິງຄວາມເປັນມາຂອງການສ້າງ ດໍາລັດ ວ່າດ້ວຍ ການຄຸ້ມຄອງທຸລະກິດຍານພາ ຫະນະທາງບົກ ເລກທີ 470/ນບ, ລົງວັນທີ 27 /12/2019 ພ້ອມນີ້ ກໍ່ໄດ້ເນັ້ນໃຫ້ຮູ້ກ່ຽວກັບ ຈຸດປະສົງ ແລະ ເປົ້າໝາຍ ຂອງການສ້າງດຳລັດດັ່ງກ່າວ ຄື : ເພື່ອກໍານົດຫຼັກການ. ລະບຽບການ ແລະ ມາດຕະການກ່ຽວກັບການຄຸ້ມຄອງ, ຕິດຕາມກວດກາການດໍາເນີນ ທຸລະກິດຍານພະຫະນະ ຢູ່ ສປປ ລາວ ເພື່ອເຮັດໃຫ້ທຸລະກິດດັ່ງກ່າວ ດໍາເນີນຢ່າງຖືກຕ້ອງ, ສອດຄ່ອງກັບກົດ ໝາຍ ແລະ ແນ່ໃສ່ປົກປ້ອງສິດ ແລະ ຜົນປະໂຫຍດຂອງ ຜູ້ດໍາເນີນທຸລະກິດ, ຜູ້ຊົມໃຊ້ ແລະ ຜົນປະໂຫຍດ ຂອງລັດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ
ເນື້ອໃນ ຂອງດຳລັດ 470/ນຍ ມີທັງມົດ X ພາກ, 59 ມາດຕາ ເນື້ອໃນຕົ້ນຕໍ ແມ່ນໄດ້ກຳນົດກ່ຽວກັບ ຂັ້ນຕອນການສ້າງຕັ້ງ ແລະ ການເຄື່ອນ ໄຫວຂອງ ທຸລະກິດ ຍານພາຫະນະທາງບົກ ໃນແຕ່ລະປະເພດ ແລະ ມາດຕະການຕ່າງໆ ໃນການຄຸ້ມຄອງ ການເຄື່ອນໄຫວຂອງທຸລະກິດດັ່ງກ່າວ ລວມທັງການກຳນົດກ່ຽວກັບສິດ ແລະ ພັນທະຂອງຜູ້ດຳເນີນທຸລະກິດຍານພາຫະນະທາງບົກ ພ້ອມດ້ວຍຂໍ້ຫ້າມຕ່າງໆຊຶ່ງຄາດວ່າພາຍຫຼັງຈັດຕັ້ງປະຕິບັດດຳລັດ ດັ່ງກ່າວຈະເຮັດໃຫ້.
- ການສ້າງຕັ້ງ ແລະ ການເຄື່ອນໄຫວທຸລະກິດຍານພາ ຫະນະທາງບົກ ຢູ່ ສປປ ລາວ ເຂົ້າສູ່ລະບົບລະບຽບ ຖືກຕ້ອງ ຕາມກົດໝາຍ ເພື່ອປົກປ້ອງສິດ ແລະ ຜົນປະໂຫຍດອັນຊອບທໍາຂອງລັດ ຜູ້ຊົມໃຊ້ ແລະ ຜູ້ດໍາເນີນທຸລະກິດ;
- ຊ່ວຍແກ້ໄຂບັນຫາລັກລອບນຳເຂົ້າຍານພາຫະນະບໍ່ຖືກຕ້ອງຕາມກົດໝາຍ ຫຼື ລົບຫລີກການເສຍພາສີອາກອນ ແລະ ອື່ນໆ.
ຊຶ່ງໃນໄລຍະຜ່ານມາ ກະຊວງອຸດສາຫະກຳ ແລະ ການຄ້າ ໄດ້ຍົກສູງບົດບາດຄວາມສຳຄັນຂອງວຽກງານການສ້າງ ແລະ ຜັນຂະຫຍາຍການຈັດຕັ້ງປະຕິບັດ ນິຕິກຳຂອຂະແໜງການ ງການອຸດສາຫະກຳ ແລະ ການຄ້າ ໃນທຸກແຜນງານເພື່ອເປັນເຄື່ອງມືໃນການຈັດຕັ້ງປະຕິບັດວຽກງານຂອງຂະແໜງການ ອຸດສາ ຫະກຳ ແລະ ການຄ້າ ໃຫ້ຂະຫຍາຍຕົວ ແລະ ເຂັ້ມແຂງ ສາມາດຕອບສະໜອງຄວາມຮຽກຮ້ອງຕ້ອງ ການຂອງສັງຄົມ ໃນແຕ່ລະໄລຍະ. ຄຽງຄູ່ກັບການການສ້າງ ແລະ ຜັນຂະຫຍາຍນິຕິກຳກະຊວງພວກເຮົາ ຍັງໄດ້ເອົາໃຈໃສ່ການໂຄສະນາເຜີຍແຜ່ນິຕິກຳຂອງຂະແໜງການ ໂດຍຜ່ານຫຼາຍຊ່ອງທາງ ເພື່ອໃຫ້ທົ່ວສັງຄົມ ສາມາດເຂົ້າເຖິງຂໍ້ມູນ ແລະ ມີຄວາມຮູ້ຄວາມເຂົ້າໃຈຢ່າງຖືກຕ້ອງ ຕໍ່ກັບນິຕິກຳຂອງຂະແໜງການອຸດສາຫະກຳ ແລະ ການຄ້າ.
ທ່ານ ນາງ ບານສະຕິ ເທບພະວົງ ກໍຍັງໄດ້ເສີມຕື່ມວ່າ: ດັ່ງຈຸດປະສົງການສ້າງນິຕິກໍາ ແລະ ນິຕິກໍາລຸ່ມກົດໝາຍດັ່ງທີ່ກ່າວມາແລ້ວນັ້ນ, ໃນຕໍ່ໜ້າ ພວກເຮົາຈະສືບຕໍ່ເອົາໃຈໃສ່ສຸມໃສ່ ຄົ້ນຄວ້າ ແລະ ຜັນຂະຫຍາຍເນື້ອໃນຈິດໃຈດ້ານການຈັດຕັ້ງປະຕິບັດກົດໝາຍ, ນິຕິກໍາ, ນິຕິກໍາລຸ່ມກົດໝາຍ ແລະ ລະບຽບການຕ່າງໆໃຫ້ສົມບູນຍິ່ງຂຶ້ນ ທັງໃຫ້ສອດຄ່ອງກັບການພັດທະນາເສດຖະກິດ-ສັງຄົມຂອງຊາດໃຫ້ປະກົດຜົນເປັນຈິງຊຶ່ງເວົ້າລວມເວົ້າສະເພາະການຈັດກອງປະຊຸມທາງໄກ ໃນການຜັນຂະຫຍາຍ ດໍາລັດວ່າດ້ວຍ ການຄຸ້ມຄອງທຸລະກິດຍານພາຫະນະທາງບົກ ເລກທີ 470/ນບ ສະບັບນີ້ ຈະເປັນຂິດໝາຍສໍາຄັນໃຫ້ແກ່ການສ້າງຄວາມຮັບຮູ້ ແລະ ເຂົ້າໃນ ຂອງຂະແໜງການທີ່ກ່ຽວຂ້ອງ ແລະ ເປັນການສ້າງເງື່ອນໄຂດ້ານຄຸນນະພາບ ແລະ ມາດຕະຖານ ແລະ ການຄຸ້ມຄອງຍານພະຫະນະ ຢູ່ໃນ ສປປ ລາວ ສະນັ້ນ, ຂ້າພະເຈົ້າຫວັງວ່າຍິ່ງວ່າ ກອງປະຊຸມທັງສອງ ວັນນີ້ ຈະເປັນປະໂຫຍດໃຫ້ແກ່ບັນດາຂະແໜງການ ດ້ານການຈັດຕັ້ງປະຕິບັດ ແລະ ການຜັນຂະຫຍາຍເນື້ອໃນຈິດໃຈຂອງດໍາລັດສະບັບນີ້ໃຫ້ມີປະສິດຕິພາບ ແລະ ປະສິດທິຜົນ.
ຮຽບຮຽງໂດຍ: ໄພຄຳອີ ວິໄລຄຳ
ແຫຼງຂ່າວ: ຫ້ອງການກະຊວງ ອຄ.
