ຕອນບ່າຍ 15: 00 ໂມງ ຂອງວັນທີ 25 ພະຈິກ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ Orhan Isik , ເອກອັກຄະລັດຖະທູດ ແຫ່ງ ສາທາລະນະລັດ ຕວກກີ ປະຈຳ ສປປ ລາວ ຄົນໃໝ່ ເນື່ອງໃນໂອກາດມາຮັບໜ້າທີ່ທາງການທູດປະຈໍາຢູ່ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 08 ທ່ານ.
ໂອກາດນີ້ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງ ອຄ ກໍ່ແດງຄວາມຍິນດີຕໍ່ ທ່ານ Orhan Isik, ທີ່ໄດ້ມາດຳລົງຕຳແໜ່ງທາງການທູດ ຊຶ່ງຈະເຮັດໜ້າທີ່ດ້ານການທູດໃຫ້ແກ່ ສອງປະເທດ ລະຫວ່າງ ລາວ-ຕວກກີ ທັງສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນຫຼາຍດ້ານ ເປັນຕົ້ນຂະຫຍາຍສາຍພົວພັນທີ່ດີ ດ້ານການຮ່ວມມືການຄ້າ, ການລົງທຶນ, ການສຶກສາ ແລະ ການທ່ອງທ່ຽວ ຂອງລາວ. ນອກນັ້ນຍັງໄດ້ແລກປ່ຽນຄວາມຄິດເຫັນ ໃນວຽກງານການຮັບມືກັບການລະບາດ ຂອງພະຍາດໂຄວິດ-19 ຂອງສອງປະເທດ; ໃນນີ້ ທ່ານ Orhan Isik ເອກອັກຄະລັດຖະທູດ ໄດ້ສະເໜີໃນຕໍ່ໜ້າຈະໃຫ້ການຮ່ວມມື, ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ສປປ ລາວ.
ໃນຕອນທ້າຍ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງ ອຄ ສະແດງຄວາມຍິນດີ ຕໍ່ ທ່ານເອກອັກຄະລັດຖະທູດ ແຫ່ງ ຕວກກີ ປະຈໍາ ສປປ ລາວ ຄົນໃໝ່ ໃນການຮ່ວມມືເປັນຢ່າງດີ ແລະ ທ່ານ ເອກອັກຄະລັດຖະທູດ ກໍ່ສະແດງຄວາມຂອບໃຈ ມາຍັງ ທ່ານລັດຖະມົນຕີ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບທີ່ດີ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
