ຕອນ​ເຊົ້າ ​ເວ​ລາ 08:30 ມ ຂອງ​ວັນ​ທີ 26 ພະຈິກ 2020 ​ໄດ້​ເປີດກອງປະຊຸມຕົວແທນສະມາຊິກພັກ ຂອງ ອົງຄະນະພັກ ກະຊວງອຸດສາຫະກຳ ແລະ ການຄ້າ ຂຶ້ນ ທີ່​ຫ້ອງ​ປະຊຸມ​ໃຫຍ່​ຊັ້ນ 01 ຂອງ​ກະຊວງ ອຄ ​ໂດຍ​ການ​​ເປັນ​ປະທານ ຂອງສະຫາຍ ນ ​ເຂັມ​ມະນີ ພົນ​ເສນາ ກໍ​າມະ​ການ​ສູນ​ກາງ​ພັກ, ​ເລຂາ​ຄະນະບໍລິຫານ​ງານ​ພັກ​ກະຊວງ ອຄ, ລັດຖະມົນຕີ​ກະຊວງ ອຄ ​ແລະ ປະທານ​ຮ່ວມ ສະຫາຍ ສົມ​ຈິດ ອິນ​ທະ​ມິດ ຄະນະ​ປະ​ຈໍາ​ພັກ​ກະຊວງ ຮອງ​ລັດຖະມົນຕີ​ກະຊວງ ອຄ ​ແລະ ສະ​ຫາຍ ສີ​ລິ​ສໍາພັນ ວໍຣະຈິດ ຄະນະ​ປະ​ຈໍາ​ພັກ​ກະຊວງ ພ້ອມ​ດ້ວຍ​ແຂກ​ຖືກ​ເຊີນ ​ແລະ ​ຕົວ​ແທນ​ສະມາຊິກ​ພັກ​ເຂົ້າຮ່ວມ​ປະມານ 180 ທ່ານ; ໃນທ່າມກາງບັນຍາກາດ ທີ່ທົ່ວພັກ ທົ່ວລັດ ທົ່ວປວງຊົນ ພວມແຂ່ງຂັນກັນສ້າງຜົນງານ ເພື່ອຂໍ່ານັບຮັບຕ້ອນ ວັນຊາດ 2 ທັນວາ ຄົບຮອບ 45 ປີ ແລະ ວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ 100 ປີ ທີ່ໃກ້ຈະໝູນວຽນມາບັນຈົບຄົບຮອບໃນມໍ່ໆນີ້. ນອກຈາກນັ້ນ, ປະຊາຄົມໂລກ ກໍຄື ສປປ ລາວ ໄດ້ພວມດຳເນີນການຮັບມືກັບການແຜ່ລະບາດຂອງເຊື້ອພະຍາດຈຸລະໂລກໂຄວິດ-19 ໄປຄຽງຄູ່ກັນກັບການດຳເນີນນະໂຍບາຍຟື້ນຟູເສດຖະກິດ ພາຍຫຼັງທີ່ໄດ້ຮັບຜົນກະທົບຈາກການແຜ່ລະບາດດັ່ງກ່າວ ເພື່ອໃຫ້ເຂົ້າສູ່ສະພາບປົກກະຕິໂດຍໄວ.   

      ກອງປະຊຸມມື້ນີ້ ແມ່ນຢູ່ໃນໄລຍະມ້ວນທ້າຍສະໄໝການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ມະຕິ X ຂອງພັກ ຊຶ່ງຈະກາຍເປັນພື້ນຖານໃຫ້ແກ່ກອງປະຊຸມໃຫຍ່ຜູ້ແທນອົງຄະນະພັກ ກະຊວງອຸດສາຫະກຳ ແລະ ການຄ້າ ຄັ້ງທິີ V ເພື່ອກ້າວເຂົ້າສູ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ IX ແລະ ມະຕິ XI ຂອງພັກ.  ການຈັດກອງປະຊຸມຄັ້ງນີ້ ຍັງເປັນການປະຕິບັດຕາມແຈ້ງການ ຂອງ ຄະນະເລຂາທິການສູນກາງພັກ ສະບັບເລກທີ 05/ຄລສພ, ລົງວັນທີ 23 ຕຸລາ 2020 ໂດຍມີຄຳສັ່ງໃຫ້ບັນດາກະຊວງ-ອົງການຂອງພັກ-ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນຈຳນວນໜຶ່ງ ລວມທັງໝົດ 19 ພາກສ່ວນ, ໃນນັ້ນລວມມີ ກະຊວງ ອຄ ໃຫ້ເລື່ອນການຈັດກອງປະຊຸມໃຫຍ່ຜູ້ແທນອົງຄະນະພັກຂັ້ນຕົນ ແລະ ໃຫ້ຈັດໄລຍະພາຍຫຼັງສຳເລັດກອງປະຊຸມໃຫຍ່ຜູ້ແທນທົ່ວປະເທດ. ດ້ວຍເຫດນີ້, ກະຊວງອຸດສາຫະກຳ ແລະ ການຄ້າ ຈຶ່ງມີຄວາມຈຳ ເປັນຕ້ອງໄດ້ເລື່ອນການຈັດກອງປະຊຸມໃຫຍ່ຜູ້ແທນອົງຄະນະພັກ ກະຊວງອຸດສາຫະກຳ ແລະ ການຄ້າ ຄັ້ງທິີ V ໄປຈັດໃສ່ພາຍຫຼັງສຳເລັດກອງປະຊຸມໃຫຍ່ຜູ້ແທນທົ່ວປະເທດ.

     ໂດຍປະຕິບັດຕາມເນື້ອໃນຈິດໃຈ ຂອງແຈ້ງການດັ່ງກ່າວ, ກອງປະຊຸມໃນຄັ້ງນີ້ ມີຈຸດປະສົງ: 1. ຜ່ານບົດສະຫລຸບຕີລາຄາການຈັດຕັ້ງປະຕິບັດໜ້າທີ່ວຽກງານນຳພາ ຂອງອົງຄະນະພັກ ກະຊວງອຸດສາຫະກຳ ແລະ ການຄ້າ ໄລຍະ 05 ປີ ແຕ່ 2016-2020 ແລະ ທິດທາງແຜນການ 05 ຕໍ່ໜ້າ ແຕ່ 2021-2025 ຊຶ່ງບັນດາຕົວ​​ແທນ​ສະມາຊິກ​ພັກ ໄດ້ພ້ອມກັນປະກອບຄຳເຫັນ ລົງປະຊາມະຕິເພື່ອຮັບຮອງບົດລາຍງານດັ່ງກ່າວ; 

2. ປ່ອນບັດເລືອກຕັ້ງເອົາບຸກຄະລາກອນ ເພື່ອເປັນຜູ້ແທນ ຂອງ ອົງຄະນະພັກ ກະຊວງ ອຄ ໄປຮ່ວມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກ ຊຶ່ງບັນດາຕົວ​​ແທນ​ສະມາຊິກ​ພັກ​ໄດ້ທຳການປ່ອນບັດຄັດເລືອກເອົາຜູ້ທີ່ເໝາະສົມ ຈໍານວນ 08 ສະຫາຍ ຈາກ​ຜູ້​ທີ່ມີ​ຊື່ລົງ​ເລືອກ​ຕັ້ງທັງ​ໝົດ 11 ສະຫາຍ.

     ຕອນທ້າຍ, ທ່ານ​ປະທານກອງປະຊຸມ ​ໄດ້ຕາງໜ້າໃຫ້ຄະນະພັກ-ຄະນະນໍາກະຊວງອຸດສາຫະກຳ ແລະ ການຄ້າ ສະແດງຄວາມຂອບໃຈ ມາຍັງບັນດາຕົວ​ແທນ​ສະມາ​ຊິກ​ພັກ ທີ່ໄດ້ເສຍສະຫຼະເວລາອັນມີຄຸນຄ່າເຂົ້າຮ່ວມກອງປະຊຸມໃນມື້ນີ້ແຕ່ຕົ້ນຕະຫຼອດປາຍ ແລະ ຂໍຖືໂອກາດນີ້ ອວຍພອນປີໃໝ່ສາກົນ 2021 ລ່ວງໜ້າ ມາ​ຍັງບັນດາທ່ານທີ່​ເຂົ້າຮ່ວມຈົ່ງມີສຸຂະພາບແຂງແຮງ, ປະສົບຜົນສຳເລັດໃນໜ້າທີ່ວຽກງານ ມີຄວາມ​ສຸກ​ໃນຊີວິດສ່ວນຕົວ ແລະ ​ຄອບ​ຄົວ.

ພາບ ໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ ແລະ ທ ຈອນນີ້ ໜັງສືພິມເສດຖະກິດ-ການຄ້າ

ແຫຼ່ງຂ່າວ: ພະແນກພັກ ແລະ ອົງການຈັດຕັ້ງມະຫາຊົນ ກຈພງ ແລະ ພະແນກເລຂານຸການ ຫ້ອງການ ກະຊວງ ອຄ