ຕອນເຊົ້າ 10: 00 ໂມງ ຂອງວັນທີ 27 ພະຈິກ 2020 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ, ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ Zhao Wenyu, ທີ່ປຶກສາທູດເສດຖະກິດ-ການຄ້າ ແຫ່ງ ສປ ຈີນ ປະຈຳ ສປປ ລາວ ຄົນໃໝ່ ພ້ອມດ້ວຍຄະນະ ເນື່ອງໃນໂອກາດມາຮັບໜ້າທີ່ທາງການທູດປະຈໍາຢູ່ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 15 ທ່ານ.
ໂອກາດນີ້ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງ ອຄ ກໍ່ແດງຄວາມຍິນດີຕໍ່ ທ່ານ Zhao Wenyu, ທີ່ໄດ້ມາດຳລົງຕຳແໜ່ງທີ່ປຶກສາທູດ ຊຶ່ງຈະເຮັດໜ້າທີ່ດ້ານການທູດໃຫ້ແກ່ ສອງປະເທດ ລະຫວ່າງ ລາວ-ຈີນ ສອງຝ່າຍໄດ້ປຶກສາຫາລື ຄວາມເຂົ້າໃຈຮ່ວມກັນ ເສີມສ້າງສາຍພົວພັນຮ່ວມມືຊຶ່ງກັນ ແລະ ກັນ; ໄລຍະຜ່ານມາທັງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືທີ່ດີ ລະຫວ່າງ ສປປ ລາວ – ສປ ຈີນ ພ້ອມທັງການສົ່ງເສີມການເພີ່ມຜະລິດຕະພາບ ອັນດີງາມໃນຂົງເຂດພາກລັດ ແລະ ພາກທຸລະກິດ ລະຫວ່າງ ສອງປະເທດ ໃຫ້ມີການຄ້າຮ່ວມກັນ ໂດຍສະເພາະ ສິນຄ້າການນໍາເຂົ້າ-ສົ່ງອອກເພີ້ມຂຶ້ນໃນອະນາຄົດ; ເຖິງຢ່າງໃດກໍ່ຕາມ ເພື່ອເຮັດໃຫ້ການຮ່ວມມືທາງດ້ານອຸດສາຫະກຳ ແລະ ການຄ້າ ຂອງສອງຝ່າຍ ໃຫ້ຂະຫຍາຍຕົວຂຶ້ນໃນອະນາຄົດ ທັງສອງຝ່າຍໄດ້ຮ່ວມກັນປຶກສາ ແລະ ແລກປ່ຽນຂໍ້ມູນ ກ່ຽວກັບສະພາບການພັດທະນາ ແລະ ດຳເນີນທຸລະກິດ ຂອງບັນດາທຸລະກິດ ຂອງສອງປະເທດ ເພື່ອໃຫ້ມີການພົວພັນທາງດ້ານທຸລະກິດຮ່ວມກັນໃຫ້ຫລາຍຂຶ້ນ; ໃນນີ້ ທ່ານ Zhao Wenyu ທີ່ປຶກສາທູດເສດຖະກິດ-ການຄ້າໄດ້ ສະແດງຄວາມຊົມເຊີຍຕໍ່ທ່ານລັດຖະມົນຕີ ໃນໄລຍະຜ່ານ ໄດ້ຊຸກຍູ້ສົ່ງເສີມ ການພັດທະນາເສດຖະກິດ-ການຄ້າ ຂອງ ສປປ ລາວ ແລະ ສປ ຈີນໃຫ້ເຕີບໃຫຍ່ຂະຫຍາຍຕົວຢ່າງໄວວາ ແລະ ໃຫ້ຄໍາໝັ້ນສັນຍາໃນຕໍ່ໜ້າຈະໃຫ້ການຮ່ວມມື, ໃຫ້ຄຳປຶກສາສິ່ງອຳນວຍຄວາມສະດວກໃນວຽກງານຫຼາຍດ້ານແກ່ ສປປ ລາວ; ພ້ອມທັງ ສະແດງທ່າທີການຮັດແໜ້ນສາຍພົວພັນທີ່ມູນເຊື້ອອັນດີງາມຕະຫຼອດມາ ແລະ ອວຍພອນໄຊໃນວັນຊາດທີ 2 ທັນວາ ຄົບຮອບ 45ປີຂອງສປປ ລາວທີ່ຈະມາເຖິງນີ້ ໃຫ້ປະເທດລາວມີຄວາມຈະເລີນຮຸ່ງເຮືອງ, ປະຊາຊົນມີຄວາມຜາສຸກ ແລະ ຂະແໜງອຸດສາຫະກໍາ ແລະ ການຄ້າເຕີບໃຫຍ່ຂະຫຍາຍຕົວໃນຕໍ່ໜ້າ.
ໃນຕອນທ້າຍ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງ ອຄ ສະແດງຄວາມຍິນດີ ຕໍ່ ທ່ານທີ່ປຶກສາທູດເສດຖະກິດ-ການຄ້າ ແຫ່ງ ສປ ຈີນ ປະຈໍາ ສປປ ລາວ ຄົນໃໝ່ ໃນການຮ່ວມມືເປັນຢ່າງດີ ແລະ ທ່ານ ທີ່ປຶກສາທູດເສດຖະກິດ-ການຄ້າ ກໍ່ສະແດງຄວາມຂອບໃຈ ມາຍັງ ທ່ານລັດຖະມົນຕີ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບທີ່ສະໜິດແໜ້ນ.
ພາບ ແລະ ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກ ຜຮ
