ຕອນບ່າຍຂອງວັນທີ 20 ມັງກອນ 2021 ກະຊວງອຸດສາຫະກຳ ແລະ ການຄ້າ ຮ່ວມກັບ ສະຫະພາບເອີຣົບ (EU) ໄດ້ຈັດກອງປະຊຸມໜ່ວຍງານການຄ້າ ລາວ-ອີຢູ ຄັ້ງທີ່ 07. ກອງປະຊຸມຄັ້ງນີ້ດຳເນີນໄປພາຍໃຕ້ການເປັນປະທານຮ່ວມຂອງ ທ່ານ ພູວຽງ ພົງສາ, ຫົວໜ້າກົມແຜນການ ແລະ ການຮວ່ມມື, ກະຊວງອຸດສາຫະກຳ ແລະ ການຄ້າ ແລະ ທ່ານ Peter Berz, ຫົວໜ້າຂະແໜງການຄ້າ ຂອງ ສະຫະພາບເອີຣົບ ປະຈຳນະຄອນຫລວງ “Brussels” ແລະ ໃຫ້ກຽດເຂົ້າຮ່ວມໂດຍທ່ານ ນາງ Ina Marciulionyte ເອກອັກຄະລັດຖະທູດອີຢູ ປະຈຳ ສປປ ລາວ ພ້ອມທັງຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສອງຝ່າຍເຂົ້າຮວ່ມ. ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອທົບທວນຄືນກ່ຽວກັບການຮ່ວມມືດ້ານການຄ້າສອງຝ່າບ ລາວ-ອີຢູ ໃນຊຸມປີທີ່ຜ່ານມາ; ການຈັດຕັ້ງປະຕິບັດວຽກງານການຄ້າ ພາຍຫຼັງການເຂົ້າເປັນສະມາຊິກຂອງອົງການການຄ້າໂລກ; ສະພາບແວດລ້ອມໃນການອຳນວຍຄວາມສະດວກທາງດ້ານການຄ້າ ແລະ ການລົງທຶນ, ບັນຫາ ແລະ ອຸປະສັກຕ່າງໆການດຳເນີນທຸລະກິດ ຂອງ ນັກລົງທຶນອີຢູ ຢູ່ ສປປ ລາວ.
ກອງປະຊຸມໄດ້ລາຍງານສະພາບການພົວພັນດ້ານການຄ້າສອງຝ່າຍ ຊຶ່ງເຫັນໄດ້ວ່າ ນັບແຕ່ປີ 2017 ເຖິງ ປະຈຸບັນ ມູນຄ່າການຄ້າສອງຝ່າຍ ແມ່ນມີທ່າອ່ຽງເພີ້ມຂື້ນດ້ວຍອັດຕາສະເລ່ຍ 2,75% ແລະ ປີ 2020 ແມ່ນມີທ່າອ່ຽງຫຼຸດລົງ ປະມານ 0,72% ເນື່ອງຈາກການແຜ່ລະບາດຂອງ COVID – 19. ການສົ່ງອອກຂອງ ສປປ ລາວ ສ່ວນໃຫຍ່ແມ່ນ ສົ່ງອອກພາຍໃຕ້ສິດທິພິເສດ(GSP) ແລະ ສປປ ລາວ ຍັງຈະສາມາດນຳໃຊ້ສິດທິພິເສດດັ່ງກ່າວ ເພື່ອສົ່ງອອກສິນຄ້າໄປຍັງ ອີຢູ ໄດ້ຈົນເຖິງປີ 2024 ເມື່ອ ສປປ ລາວ ປະກາດອອກຈາກ LDC. ກອງປະຊຸມຍັງໄດ້ລາຍງານໂດຍລວມກ່ຽວກັບ ສະພາບການແຜ່ລະຂອງພະຍາດ COVID-19 ທີ່ສົ່ງຜົນກະທົບຕໍ່ການພັດທະນາເສດຖະກິດ ແລະ ສັງຄົມ ໂດຍສະເພາະແມ່ນຂະແໜງການທ່ອງທ່ຽວ, ການບໍລິການ, ການຂົນສົ່ງສິນຄ້າ ແລະ ອື່ນໆ. ສະເພາະ ສປປ ລາວ ລັດຖະບານກໍ່ໄດ້ເອົາໃຈໃສ່ຕໍ່ບັນຫາດັ່ງກ່າວ ໂດຍສະເພາະ ຂໍ້ຕົກລົງຂອງທ່ານນາຍົກລັດຖະມົນຕີ ສະບັບ ເລກທີ 31/ນຍ ທີ່ກຳນົດ 10 ນະໂຍບາຍ ແລະ 9 ມາດຕະການ ເພື່ອຮັບມືກັບສະພາບການແຜ່ລະບາດຂອງພະຍາດດັ່ງກ່າວ.ຈາກນັ້ນ, ຝ່າຍ ລາວ ລາວ ຍັງລາຍງານໃຫ້ ອີຢູ ຊາບກ່ຽວກັບສະພາບການເຊື່ອມໂຍງເສດຖະກິດຂອງ ສປປ ລາວ ແລະ ອີຢູ, ການເຊື່ອມໂຍງເສດຖະກິດໃນຂອບການຮ່ວມມື ພາກພື້ນ ແລະ ສາກົນ ເຊັ່ນ: RCEP, ASEAN, WTO ແລະ ອື່ນໆ.
ນອກນັ້ນ, ຝ່າຍ ລາວ ຍັງໄດ້ລາຍງານໃຫ້ ອີຢູຊາບຕື່ມ ກ່ຽວກັບການປັບປຸງ ກົດໝາຍສົ່ງເສີມການລົງທຶນສະບັບໃໝ່ ຊຶ່ງກົດໝາຍສົ່ງເສີມການລົງທຶນສະບັບໃໝ່ ນີ້ແມ່ນຈະເລັ່ງໃສ່ສ້າງສິ່ງອຳນວຍຄວາມສະດວກໃຫ້ແກ່ການດຳເນີນທຸລະກິດຢູ່ ສປປ ລາວ ໃຫ້ຫລາຍຂື້ນ.
ພາບ-ຂ່າວ ໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
