ວັນທີ 25 ມັງກອນ 2021 ຜ່ານມາ, ທີ່ຫ້ອງປະຊຸມທາງໄກ ກະຊວງອຸດສາຫະກຳ ແລະ ການຄ້າ ໄດ້ເປີດຊຸດຝຶກອົບຮົມພາຍໃຕ້ຫົວຂໍ້: “ການເຂົ້າໃຈດ້ານຫຼັກການ ແລະ ການນໍາໃຊ້ຂໍ້ຕົກລົງທາງການຄ້າໃນຂອບພາກພື້ນ ແລະ ສາກົນ” ຂຶ້ນຢ່າງເປັນທາງການ ໂດຍການເປັນປະທານ ຂອງທ່ານ ວຽງສະຫວ່າງ ທິບພະວົງ ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ກະຊວງອຸດສາຫະກໍາ ແລະ ການຄ້າ, ປະທານຮ່ວມ ທ່ານຟຼອງຊົວ ປຣະວົງວຽງຄຳ ຮັບຜິດຊອບວຽກງານການເມືອງ ຕາງໜ້າຄະນະຜູ້ແທນສະຫະພາບເອີຣົບ ປະຈຳລາວ ແລະ ມີຜູ້ເຂົ້າຮ່ວມຕາງໜ້າຈາກບັນດາກົມ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ກະຊວງອຄ; ມະຫາວິທະຍາໄລແຫ່ງຊາດລາວ, ສະພາການຄ້າ ແລະ ອຸດສາຫະກໍາແຫ່ງຊາດລາວ, ສະຖາບັນຄົ້ນຄວ້າເສດຖະກິດແຫ່ງຊາດ, ສະພາການຄ້າ ແລະ ອຸດສາຫະກໍາສະຫະພາບເອີຣົບປະຈຳລາວ ທັງໝົດ 25 ທ່ານ.
ທ່ານປະທານໄດ້ກ່າວເຖິງຄວາມເປັນມາ ແລະ ຈຸດປະສົງຂອງໂຄງການ ຊຶ່ງໂຄງການດັ່ງກ່າວແມ່ນໂຄງການ ARISE Plus-Lao PDR ເປັນການຈັດຕັ້ງປະຕິບັດໂຄງການ ເຊື່ອມໂຍງພາກພື້ນອາຊຽນ ຂອງສປປ ລາວ (ASEAN Regional Integration Lao PDR project – ARISE PLUS Lao PDR) ໂດຍໄດ້ຮັບທຶນສະໜັບສະໜູນ ຈາກສະຫະພາບເອີຣົບ ຜ່ານທາງສູນການຄ້າສາກົນ (International trade Center- ICT) ມີເປົ້າໝາຍເພື່ອປັບປຸງສະພາບແວດລ້ອມທາງທຸລະກິດ ແລະ ອຳນວຍຄວາມສະດວກໃນການມີສ່ວນຮ່ວມຢູ່ໃນຕ່ອງໂສ້ການຜະລິດ; ພາຍໃຕ້ໂຄງການດັ່ງກ່າວ, ICT ໄດ້ມີການຈັດຕັ້ງປະຕິບັດໂຄງການຕ່າງໆ ເພື່ອສ້າງຄວາມເຂັ້ມແຂງ ແລະ ອຳນວຍຄວາມສະດວກໃຫ້ແກ່ການເຊື່ອມໂຍງເສດຖະກິດໃນພາກພື້ນ, ເພີ່ມຄວາມເຂົ້າໃຈກ່ຽວກັບຂໍ້ຕົກລົງການຄ້າ ແລະ ລະບຽບການໃນການສົ່ງອອກໃນຂອບການຄ້າເສລີໃນຂົງເຂດພາກພື້ນ ລວມທັງທະວີເອີຣົບ, ພ້ອມນັ້ນກໍ່ເພື່ອການສົ່ງເສີມການລົງທຶນໃຫ້ຂະຫຍາຍຕົວ. 
ຫຼັກສູດອົບຮົມສຳລັບນັກວິທະຍາກອນໃນອານະຄົດ “ ການສ້າງຄວາມເຂົ້າໃຈກ່ຽວກັບຫຼັກການ ແລະ ການນຳໃຊ້ຜົນໄດ້ຮັບຈາກຂໍ້ຕົກລົງການຄ້າຫລາຍຝ່າຍ ແລະ ພາກພື້ນ” (‘Understanding Principles and Utilization of Multilateral and Regional Trading Arrangements’) ມີຈຸດປະສົງ ເພື່ອສ້າງຄວາມເຂັ້ມແຂງໃຫ້ແກ່ບັນດາພາກສ່ວນກ່ຽວຂ້ອງ ຢູ່ໃນ ສປປ ລາວ. ຫລັກສູດຝຶກອົບຮົມນີ້ ແມ່ນໄດ້ແບ່ງອອກເປັນ 3 ໄລຍະ, ໄລຍະທີ 1 ແມ່ນ ຝຶກອົບຮົມ ຄູຝຶກ ແບບລົງເລິກ (in-depth training) ໄລຍະທີ 2 ແມ່ນການຝຶກອົບຮົມສະເພາະ ສຳລັບວິທະຍາກອນທີ່ຖືກຄັດເລືອກເປັນຄູຝຶກ ເພື່ອຍົກລະດັບໃນການຈັດຕັ້ງປະຕິບັດການຝຶກອົບຮົມໃຫ້ພາກສ່ວນທີ່ກ່ຽວຂ້ອງ. ໄລຍະທີ 3 ມີການຝຶກອົບຮົມໃຫ້ພະນັກງານສູນກາງ ແລະ ທ້ອງຖິ່ນ ໂດຍມີຈຸດປະສົງຫຼັກ ແມ່ນເພື່ອສ້າງຄູຝຶກສະເພາະດ້ານ ກ່ຽວກັບວຽກງານ ການນຳໃຊ້ຜົນປະໂຫຍດຈາກການເຊື່ອມໂຍງເສດຖະກິດໃນພາກພື້ນ ແລະ ສາກົນ.
ໃນການຝຶກອົບຮົມຄັ້ງນີ້ ແມ່ນດຳເນີນໄປເປັນເວລາ 07 ວັນ ນັບແຕ່ວັນທີ 25/1/2021 – 2/2/2021 ເວລາ 8:30 – 12:00ມ ສະເພາະຄາບເຊົ້າ ໂດຍຜ່ານທາງລະບົບ Zoom Cloud Meeting ຊຶ່ງບົດນໍາມາສິດສອນປະກອບມີ 07 ບົດຄື:
Session 1: ພາບລວມສະຖານະພາບຂອງ ສປປ ລາວ ພາຍໃຕ້ຂອບການຮ່ວມມືຫຼາຍຝ່າຍ
Session 2: ຮຽນຮູ້ກ່ຽວກັບບົດບັນຍັດພິເສດທີ່ມີຕໍ່ ສປປ ລາວ ໃນສະຖານະປະເທດດ້ອຍພັດທະນາໃຫ້ສາມາດສ້າງຄວາມເຂັ້ມແຂງ ໃຫ້ກັບການຄ້າ
Session 3: ການເຊື່ອມໂຍງເຂົ້າໃນສະມາຄົມເສດຖະກິດອາຊຽນ – AEC (1) ພາກທີ 1: ໂດຍສະເພາະຈະເນັ້ນໃນການຄ້າສິນຄ້າ
Session 4: ການເຊື່ອມໂຍງເຂົ້າໃນສະມາຄົມເສດຖະກິດອາຊຽນ (2) ພາກທີ 2: ເນັ້ນການເຄື່ອນຍ້າຍຂອງປັດໄຈການຜະລິດພາຍໃຕ້ຂອບ AEC ແລະ ຂໍ້ລິເລີ່ມຂອງອາຊຽນທີ່ຢາກຫຼຸດຊ່ອງວ່າງ ການພັດທະນາລະຫວ່າງກັນ
Session 5: ການເຊື່ອມໂຍງເຂົ້າໃນສະມາຄົມເສດຖະກິດອາຊຽນ (3) ພາກທີ 3: ເນັ້ນການຮ່ວມມືດ້ານການຄ້ານອກຂອບອາຊຽນ ຄື: ຂໍ້ຕົກລົງ ວ່າດ້ວຍການເປັນຮຸ້ນສ່ວນເສດຖະກິດລະດັບພາກພື້ນ ຫຼື (RCEP), ຂໍ້ຕົກລົງ ສອງຝ່າຍ ແລະ ຂອບການຮ່ວມມືອະນຸພາກພື້ນ
Session 6: ທ່າແຮງຂອງ ສປປ ລາວ ໃນການເຂົ້າເຖິງຕະຫຼາດສາກົນ ຜ່ານການໄດ້ຮັບສິດທິພິເສດທາງການຄ້າຕ່າງໆ
Session 7: ທິດທາງໃນຕໍ່ໜ້າກ່ຽວກັບ ການກຽມຄວາມພ້ອມ ເພື່ອເຂົ້າຮ່ວມການເຊື່ອມໂຍງໃນອະນາຄົດ
ແຫລ່ງຂ່າວ ແລະ ພາບໂດຍ: ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ
ຂ່າວໂດຍ: ນ ຖື ແຫວນວົງສົດ ສຸນສະຖິຕິ ແລະ ຂໍ້ມູນຂ່າວສານ ກຜຮ
