ຕອນເຊົ້າ ເວລາ 9:00 ໂມງ ຂອງວັນທີ 5 ກຸມພາ 2021 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມເຜີຍແຜ່ກົດໝາຍ ວ່າດ້ວຍການປະກັນສັງຄົມ(ສະບັບປັບປຸງໃໝ່) ແລະ ມີພະນັກງານ-ລັດຖະກອນອ້ອມຂ້າງກະຊວງອຸດສາຫະກໍາ ແລະ ການຄ້າ ເຂົ້າຮ່ວມຈໍານວນ 181 ທ່ານ, ຍິງ 75 ທ່ານ.
ກອງປະຊຸມຄັ້ງນີ້ ຈັດຂຶ້ນພາຍໃຕ້ການເປັນປະທານ ຂອງ ທ່ານ ນາງ ຈັນສຸກ ແສງພະຈັນ ຫົວໜ້າກົມຈັດຕັ້ງ ແລະ ພະນັກງານ ກະຊວງອຸດສາຫະກຳ ແລະ ການຄ້າ ແລະ ປະທານຮ່ວມ ຂອງ ທ່ານ ນາງ ວັນໄຊ ສຸວັນນະເມທີ ຮອງຫົວໜ້າອົງການປະກັນສັງຄົມແຫ່ງຊາດ, ຂຶ້ນນຳສະເໜີບັນຍາຍ ໂດຍ ທ່ານ ນາງ ດວງເດືອນ ຈັນທະວົງ ຫົວໜ້າພະແນກໂຄສະນາ – ປະຊາສໍາພັນ ອົງການປະກັນສັງຄົມແຫ່ງຊາດ, ກອງປະຊຸມໄດ້ນຳສະເໜີ ເນື້ອໃນຂອງກົດໝາຍວ່າດ້ວຍການປະກັນສັງຄົມ.
ຊຶ່ງຈຸດປະສົງຂອງການເຜີຍແຜ່ຄັ້ງນີ້ ເພື່ອເຮັດໃຫ້ພະນັກງານ-ລັດຖະກອນເຊື່ອມຊຶມເຂົ້າໃຈໄດ້ເຖິງກົດໝາຍ ວ່າດ້ວຍການປະກັນສັງຄົມ, ແນໃສ່ໂຄສະນາເຜີຍແຜ່ການຈັດຕັ້ງປະຕິບັດກົດໝາຍ ວ່າດ້ວຍການປະກັນສັງຄົມ ໃຫ້ໄດ້ຮັບຄວາມເປັນເອກະພາບໃນການຈັດຕັ້ງປະຕິບັດ ພ້ອມທັງເຮັດໃຫ້ພະນັກງານ – ລັດຖະກອນ ໄດ້ ຮັບຮູ້, ເຂົ້າໃຈຢ່າງເລິກເຊິ່ງ ກ່ຽວກັບນະໂຍບາຍ ແລະ ລະບຽບການ ຂອງວຽກງານປະກັນສັງຄົມ, ໂດຍສະເພາະບັນດາພັນທະ, ສິດ ແລະ ຜົນປະໂຫຍດຂອງພະນັກງານ ທີ່ໄດ້ຮັບ ການປົກປ້ອງຈາກລະບົບປະກັນສັງຄົມ.
ພາບ-ຂ່າວ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
