ຕອນເຊົ້າ ເວລາ 08: 30 ໂມງ ຂອງວັນທີ 18 ມີນາ 2021 ທີ່ຫ້ອງປະຊຸມໃຫຍ່ຊັ້ນ 1 ກະຊວງອຸດສາຫະກໍາ ແລະ ການຄ້າ ໄດ້ເປີດກອງປະຊຸມວິທະຍາສາດ ກ່ຽວກັບການແລກປ່ຽນປະສົບການ ແລະ ສ້າງແຮງບັນດາໃຈໃນການສ້າງເສດຖະກິດຄອບຄົວ ຂອງສະຫະພັນແມ່ຍິງກະຊວງ ອຄຂຶ້ນ, ເນື່ອງໃນວັນແມ່ຍິງສາກົນ 08 ມີນາ 2021 ຄົບຮອບ 111 ປີ ໂດຍການເປັນປະທານຂອງ ທ່ານ ນ ສົມໝາຍ ພົມມຸນິວົງ ປະທານສະຫະພັນແມ່ຍິງ ກະຊວງ ອຄ ເປັນກຽດເຂົ້າຮ່ວມໂດຍ ທ່ານ ນາງ ເຂັມມະນີ ພົນເສນາ ເລຂາຄະນະບໍລິຫານງານພັກ, ລັດຖະມົນຕີກະຊວງ ອຄ ພ້ອມດ້ວຍຄະນະບໍລິຫານງານສະຫະພັນກຳມະບານ, ເລຂາຊາວໜຸ່ມກະຊວງ, ສະຫະພັນແມ່ຍິງກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ທ່ານ ນາງ ເຂັມມະນີ ພົນເສນາ ໄດ້ກ່າວເປີດກອງປະຊຸມ ແລະ ທ ນ ສົມໝາຍ ພົມມຸນິວົງ ໄດ້ຂຶ້ນຜ່ານບົດສະຫຍໍ້ວຽກງານພົ້ນເດ່ັນປະຈໍາປີ 2020 ຂອງອົງການຈັດຕັ້ງສະຫະພັນແມ່ຍິງກະຊວງ ອຄ ຊຶ່ງເນື້ອໃນໄດ້ຕີລາຄາເຖິງການຈັດຕັ້ງປະຕິບັດວຽກງານຂອງເອື້ອຍນ້ອງສະຫະພັນແມ່ຍິງກະຊວງໃນໄລຍະ 1 ປີຜ່ານມາ ມີທັງດ້ານດີ-ດ້ານອ່ອນ, ຂໍ້ຄົງຄ້າງ ແລະ ວາງທິດທາງແຜນການ ປີຕໍ່ໜ້າ ໂດຍເນັ້ນໃຫ້ສະມາຊິກໄດ້ເຊື່ອມຊຶມຄົ້ນຄວ້ານະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ແຜນພັດທະນາແມ່ຍິງລາວ, ສືບຕໍ່ປະຕິບັດຂໍ້ແຂ່ງຂັນ ຂອງສະຫະພັນແມ່ຍິງລາວ ຕິດພັນກັບວຽກ 3 ສ້າງ ແລະ ບັນຈຸສັບຊ້ອນເອື້ອຍນ້ອງແມ່ຍິງເຂົ້າໃນຕໍາ ແໜ່ງນໍາພາ-ຄຸ້ມຄອງ ໃນແຕ່ລະຂັ້ນ. ພ້ອມດຽວກັນນີ້, ທາງຄະນະບໍລິຫານງານສະຫະພັນແມ່ຍິງກະຊວງຊຸດໃໝ່ 11 ສະຫາຍໄດ້ຂຶ້ນສະເໜີຕົວ ແລະ ແນະນໍາການແບ່ງຄວາມຮັບຜິດຊອບຂອງຕົນ.
ຕອນທ້າຍ, ຍັງໄດ້ຈັດເວທີສົນທະນາ (Panel Discussion) ໃນຫົວຂ້ໍ: ການແລກປ່ຽນປະສົບການ ແລະ ສ້າງແຮງບັນດານໃຈ ໃນການສ້າງເສດຖະກິດຄອບຄົວຂອງແມ່ຍິງກະຊວງ ອຄ ໂດຍມີຜູ້ຮ່ວມສົນທະນາ: 1/ ສະຫາຍ ນ ມະນີຈັນ ສອນຄໍາໄຊ ຕາງໜ້າກົມສົ່ງເສີມການຄ້າ (ຂາຍຂອງຂວັນຜະລິດຕະພັນລາວ) 2/ ສະຫາຍ ນ ມະນີວອນ ວົງໄຊ ກົມການນໍາເຂົ້າ ແລະ ສົ່ງອອກ(ທຸລະກິດເຮືອນໃຫ້ເຊົ່າ) 3/ ສະຫາຍ ນ ມະນີວັນ ທໍາມະໂກດ ກົມການນໍາເຂົ້າ ແລະ ສົ່ງອອກ(ຂາຍສິນຄ້າກະສິກໍາ) 4/ ສະຫາຍ ນ ຄໍາພັດ ພູນສຸກ ຫ້ອງການກະຊວງ(ຂາຍຜະລິດຕະພັນອາຫານລາວ) 5/ ສະຫາຍ ນ ພອນທິບ ພັດທະດາວົງ ກົມກວດກາ(ການຂາຍເຄື່ອງຜ່ານທາງເອເລັກໂຕຣນິກ) ແລະ ການຖາມ-ຕອບ ເພື່ອແລກປ່ຽນບົດຮຽນຊຶ່ງກັນ ແລະ ກັນ ຂອງເອື້ອຍນ້ອງແມ່ຍິງ.
ນອກຈາກນີ້, ທ່ານ ລັດຖະມົນຕີ ໄດ້ນໍາພາຄະນະທ່ຽວຊົມງານວາງສະແດງ ແລະ ຊື້-ຂາຍຜະລິດຕະພັນຫັດຖະກໍາ, ອາຫານລາວ ແລະ ເຄື່ອງດື່ມຕ່າງໆ ທີ່ທາງສະຫະພັນແມ່ຍິງກະຊວງ ອຄ ໄດ້ພ້ອມໃຈກັນຈັດ.
ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
ພາບໂດຍ: ທ ສອນໄຊ ນັກຂ່າວໜັງສືພິມເສດຖະກິດ-ການຄ້າ
