ຕອນເຊົ້າເວລາ 10: 00 ໂມງ ຂອງ ວັນທີ 25 ມີນາ 2021 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດສາຫະກຳ ແລະ ການຄ້າ ໄດ້ມີພິທີມອບ-ຮັບໜ້າທີ່ລະຫວ່າງ ທ່ານ ປອ ຄໍາແພງ ໄຊສົມແພງ ກໍາມະການສູນກາງພັກ ເລຂາຄະນະບໍລິຫານງານພັກກະຊວງ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ຜູ້ໃໝ່ ແລະ ທ່ານ ນາງ ເຂັມມະນີ ພົນເສນາ ກໍາມະການສູນກາງພັກ ເລຂາຄະນະບໍລິຫານງານພັກກະຊວງ ລັດຖະມົນຕີກະຊວງ (ອຄ) ຜູ້ເກົ່າ ໂດຍແມ່ນ ທ່ານ ປອ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ເປັນປະທານ ແລະ ສັກຂີພິຍານໃນການມອບ-ຮັບໜ້າທີ່ຄັ້ງນີ້ ພ້ອມນີ້, ມີຮອງລັດຖະມົນຕີ, ຕາງໜ້າຈາກຫ້ອງວ່າການຈັດຕັ້ງສູນກາງພັກ, ບັນດາ ຫົວໜ້າ-ຮອງກົມ, ຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ ແລະ ພະນັກງານຫຼັກແຫຼ່ງທົ່ວກະຊວງ ອຄ ເຂົ້າຮ່ວມ ປະມານ 150 ທ່ານ.
ໃນພິທີຄັ້ງນີ້ ທ່ານ ນາງ ເຂັມມະນີ ພົນເສນາ ໄດ້ກ່າວລາຍງານສະພາບການນໍາພາລວມໃນຂະແໜງ ອຄ ຜ່ານມາໂດຍສັງເຂບ ເຊິ່ງໃນນັ້ນໄດ້ຍົກໃຫ້ເຫັນ ຈໍານວນລັດຖະກອນທົ່ວຂະແໜງ ອຄ ມີ 2.631 ຄົນ, ເປັນຍິງ 805 ຄົນໃນນັ້ນ ສັງກັດຢູ່ກະຊວງ 451 ຄົນ, ຢູ່ຂັ້ນແຂວງ 933 ຄົນ, ຂັ້ນເມືອງ 1.241 ຄົນ.
ແລະ ບາງບັນຫາທີ່ສະເໜີໃຫ້ ທ່ານ ລັດຖະມົນຕີກະຊວງ ອຄ ຜູ້ໃໝ່ສືບຕໍ່ນໍາພາຕາມພາລະບົດບາດ ເປັນຕົ້ນແມ່ນ ສືບຕໍ່ປະຕິບັດນະໂຍບາຍນິຕິກໍາຂອງລັດຖະບານເຊັ່ນ: ວຽກງານຄຸ້ມຄອງທຸລະກິດໄມ້, ຄຸ້ມຄອງທຸລະກິດນໍ້າມັນເຊື້ອໄຟ, ການຄຸ້ມຄອງການນໍາເຂົ້າ – ສົ່ງອອກ, ຄຸ້ມຄອງແຮງງານ, ຄຸ້ມຄອງວຽກງານເຄມີ, ວຽກງານ ປົກປ້ອງຜູ້ຊົມໃຊ້, ຄຸ້ມຄອງລາຄາສິນຄ້າ ແລະ ຄ່າບໍລິການ, ວຽກງານກວດກາການຄ້າ, ສົ່ງເສີມ ເອັສເອັມອີພ້ອມດ້ວຍກອງທຶນ, ວຽກງານສົ່ງເສີມການຜະລິດສິນຄ້າ, ວຽກງານສ້າງສະພາບແວດລ້ອມໃຫ້ແກ່ການສ້າງຕັ້ງ ແລະ ການດໍາເນີນທຸລະກິດ ຕິດພັນກັບການສ້າງບັນຍາກາດການລົງທຶນ, ວຽກງານຄຸ້ມຄອງນິຄົມອຸດສາຫະກຳ ວຽກງານປະຕິຮູບລັດວິສາຫະກິດທີ່ຂຶ້ນກັບກະຊວງ ອຄ ແລະ ການເຊື່ອມໂຍງເສດຖະກິດກັບພາກພື້ນ ແລະ ສາກົນ ໂດຍສະເພາະ ການປະຕິບັດໜ້າທີ່ຂອງ ລມຕ ເສດຖະກິດອາຊຽນ ແລະ ທັງການເສີມຂະຫຍາຍການຮ່ວມມືກັບ ສຄອ ພ້ອມນັ້ນ, ຍັງສະເໜີບາງບັນຫາທີ່ທ້າທາຍເປັນຕົ້ນແມ່ນການແກ້ໄຂຜົນກະທົບຂອງການລະບາດຂອງພະຍາດໂຄວິດ-19, ການຮັກສາສະຖຽນລະພາບຂອງເສດຖະກິດມະຫາພາກເປັນຕົ້ນແມ່ນການຮັກສາຄວາມໝັ້ນທ່ຽງຂອງລາຄາສິນຄ້າ ແລະ ຄ່າບໍລິການ ແລະ ການຂາດດູນການຄ້າກັບຕ່າງປະເທດ, ການພັດທະນາພາກທຸລະກິດໃຫ້ເຕີບໃຫຍ່ເຂັ້ມແຂງ ສາມາດແຂ່ງຂັນເຂົ້າຮ່ວມໃນຕ່ອງໂສ້ການຜະລິດຂອງພາກພື້ນ ແລະ ສາກົນ. ສະມັດຕະພາບ ຂອງການຜະລິດພາຍໃນຍັງມີຂໍ້ຈໍາກັດ ເຮັດໃຫ້ເມື່ອມີການເປີດຕະຫຼາດແລ້ວ ຍັງບໍ່ສາມາດເຂົ້າຕະຫຼາດໄດ້, ການປະສານກົມກຽວລະຫວ່າງກະຊວງ ອຄ ກັບຂະແໜງການກ່ຽວຂ້ອງໃນທ້ອງຖິ່ນ; ພ້ອມດຽວກັນນີ້
ທ່ານ ປອ ຄໍາແພງ ໄຊສົມແພງ ໄດ້ກ່າວຮັບໜ້າທີ່ ລັດຖະມົນຕີກະຊວງ ອຄ ເພື່ອເຮັດໃຫ້ຄວາມມຸ່ງມາດປາດຖະນາ, ຄວາມເຊື່ອໝັ້ນ ຈາກການຈັດຕັ້ງມອບໝາຍໃຫ້ ຂ້າພະເຈົ້າຈະຮ່ວມກັບຄະນະນໍາກະຊວງ ອຄ ແລະ ພະນັກງານຫຼັກແຫຼ່ງ ຈະພ້ອມກັນສືບຕໍ່ເຕົ້າໂຮມຄວາມສາມັກຄີຄວາມເປັນເອກະພາບພາຍໃນສຸມທຸກກໍາລັງ ແລະ ຄວາມສາມາດເຂົ້າໃນ ການຊີ້ນໍາວຽກງານອຸດສາຫະກຳ ແລະ ການຄ້າ, ວຽກງານ ອື່ນໆ ທີ່ໄດ້ຮັບມອບໝາຍໃຫ້ມີຜົນສໍາເລັດ ແລະ ມີການຫັນປ່ຽນຢ່າງຕັ້ງໜ້າ ຕະຫຼອດຮອດວິທະຍາສາດ ແລະ ເຕັກໂນໂລຊີ.
ຕອນທ້າຍນີ້ ທ່ານ ປອ ບຸນທອງ ຈິດມະນີ ໄດ້ໃຫ້ການໂອ້ລົມ ແລະ ກ່າວສະແດງຄວາມຍ້ອງຍໍຊົມເຊີຍຜົນສໍາເລັດໃນການປະຕິບັດໜ້າທີ່ ຂອງທ່ານ ລັດຖະມົນຕີກະຊວງ ອຄ ຜູ້ເກົ່າທີ່ຍາດໄດ້ໃນໄລຍະຜ່ານມາ ພ້ອມເນັ້ນໃຫ້ ທ່ານ ລັດຖະມົນຕີກະຊວງ ອຄ ຜູ້ໃໝ່ ສືບຕໍ່ເພີ່ມທະວີຄວາມເປັນເອກະພາບ ພາຍໃນພັກ, ມີຄວາມໜັກແໜ້ນສູງເປັນແກນນໍາ, ພິຈາລະນາຕົກລົງບັນຫາວຽກງານຕ່າງໆໃຫ້ມີຜົນສໍາເລັດ, ສືບຕໍ່ເອົາໃຈໃສ່ສຶກສາອົບຮົມວຽກງານການເມືອງແນວຄິດ, ຈັນຍາບັນ, ຈັນຍາທໍາ, ການດໍາລົງຊີວິດປອດໃສຂາວສະອາດ ຍົກສູງສະຕິຊາດ ບຸກບືນຕໍ່ວຽກງານຕ້ານ ແລະ ສະກັດກັ້ນການສໍ້ລາດບັງຫຼວງ ຕີຖອຍປະກົດການຫຍໍ້ທໍ້ໃນສັງຄົມ, ສົ່ງເສີມຂະບວນການຜະລິດສິນຄ້າໃຫ້ຕິດພັນກັບຕະຫຼາດ, ມີການປຸງແຕ່ງເປັນອຸດສາຫະກໍາເທື່ອລະກ້າວ ເພື່ອກ້າວໄປສູ່ການສົ່ງອອກ, ພ້ອມນັ້ນ ໃຫ້ຄົ້ນຄວ້າ ການຜະລິດຂອງທຸລະກິດວ່າມີແນວໃດ ພາກລັດຈະມີນະໂຍບາຍກະທົບໃສ່ແນວໃດ ເພື່ອສົ່ງເສີມໃຫ້ເຂົາເຈົ້າຜະລິດສິນຄ້າແທ້ ພ້ອມນັ້ນສືບຕໍ່ຄຸ້ມຄອງລາຄາສິນຄ້າ, ດັດສົມລາຄາໃນທ້ອງຕະຫຼາດ, ຕ້ອງແກ້ໄຂໃຫ້ໄດ້ ໂດຍສະເພາະໜໍ່ແໜງການຜະລິດ ຮັບປະກັນໃຫ້ມີທັງປະລິມານ ແລະ ຄຸນນະພາບ ຊ່ວຍປະຊາຊົນຊອກຕະຫຼາດ ຜະລິດມາແລ້ວໃຫ້ມີຕະຫຼາດຮອງຮັບ, ພ້ອມທັງ ສຸມໃສ່ຈັດຕັ້ງກອງປະຊຸມໃຫຍ່ຄັ້ງທີ 5 ຂອງອົງຄະນະພັກກະຊວງ ອຄ ໂດຍກະກຽມເນື້ອໃນບົດລາຍງານການເມືອງ, ກະກຽມບຸກຄະລາກອນເພື່ອຄັດເລືອກເຂົ້າຄະນະພັກຊຸດໃໝ່ ໃຫ້ມີຄຸນນະພາບ ແລະ ມາດຕະຖານ.
ພາບ-ຂ່າວ ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
