ຕອນເຊົ້າ ເວລາ 9: 00 ໂມງ ຂອງວັນທີ 20 ເມສາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບຂອງ ທ່ານ ເຈດສະດາ ກະຕະເວທິນ, ເອກອັກຄະຣາຊະທູດຜູ້ມີອໍານາດເຕັມ ແຫ່ງ ຣາຊະອານາຈັກໄທ ຊຶ່ງມີສໍານັກງານສະຖານທູດທີ່ຕັ້ງຢູ່ ສປປ ລາວ ໃນໂອກາດມາດຳລົງຕຳແໜ່ງ ການປະຕິບັດໜ້າທີ່ທາງການທູດ ປະຈໍາ ຢູ່ ສປປ ລາວ, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 13 ທ່ານ.
ໃນໂອກາດນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍິນດີຕ້ອນຮັບຕໍ່ ທ່ານ ທ່ານ ເຈດສະດາ ກະຕະເວທິນ, ທີ່ມາຮັບໜ້າທີ່ທາງດ້ານການທູດ ລະຫວ່າງ ລາວ-ໄທ ຊຶ່ງສອງປະເທດໄດ້ມີມູນເຊື້ອອັນດີງາມ ມີສາຍພົວພັນເປັນເວລາ 70 ກວ່າປີ, ແບບພິເສດບ້ານໃກ້-ເຮືອນຄຽງທີ່ດີ ພາສາປາກເວົ້າຄ້າຍຄືກັນ ນັບທັງການຄ້າຂາຍໄປມາຫາສູ່ກັນ ນັບມື້ແໜ້ນແຟ້ນຍິ່ງຂຶ້ນ ທ່ານ ລັດຖະມົນຕີຂອງລາວ ກໍ່ໄດ້ຕີລາຄາສູງ ຕໍ່ການຊ່ວຍເຫຼືອໃນຫຼາຍດ້ານໃຫ້ແກ່ລາວ ເປັນຕົ້ນການຮ່ວມມືທາງດ້ານການເມືອງ, ຮີດຄອງປະເພນີ ແລະ ວັດທະນາທຳ, ການຄ້າຂາຍ, ການລົງທຶນໃນໂຄງການໃຫຍ່ຫຼາຍແຫ່ງ ລະຫວ່າງ ລາວ-ໄທ ເປັນຕົ້ນຂົວຂ້າມແມ່ນ້ຳຂອງ ທີ່ໄດ້ອຳນວຍຄວາມສະດວກ ໃນການໄປມາຫາສູ່ຄ້າຂາຍຮ່ວມກັນລຽບຕາມຊາຍແດນແມ່ນ້ຳຂອງ ລາວ-ໄທ ແລະ ໂຄງການແລກປ່ຽນອື່ນໆ ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ນອກນັ້ນຍັງເປັນຄູ່ຮ່ວມມືທີ່ດີ; ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍຮັກສາມູນເຊື້ອອັນດີງາມໃຫ້ດີຂຶ້ນ ແລະ ວຽກງານອື່ນໃນຕໍ່ໜ້າ ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ ພ້ອມນີ້, ທ່ານ ເຈດສະດາ ກະຕະເວທິນ , ໄດ້ກ່າວວ່າ ຂ້າພະເຈົ້າຮູ້ສຶກພາກພູມໃຈ ທີ່ໄດ້ມາດໍາລົງຕໍາແໜ່ງເປັນ ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈຳ ສປປ ລາວ, ຂໍສະແດງຄວາມຂອບໃຈມາຍັງທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າຂອງລາວທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃນຕໍ່ໜ້າໃຫ້ມີສາຍພົວພັນແໜ້ນແຟ້ນທີ່ດີກວ່າເກົ່າ, ອໍານວຍຄວາມສະດວກໃຫ້ແກ່ວຽກງານຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ຍັງສະເໜີໃຫ້ທ່ານເອກອັກຄະຣາຊະທູດ ໃນຕໍ່ໜ້າ ຈະເສີມສ້າງສາຍພົວພັນ ແລະ ການຮ່ວມມື ລະຫວ່າງ ສອງປະເທດ ລາວ-ໄທ ໃຫ້ເປັນພີ່ນ້ອງບ້ານໃກ້-ເຮືອນຄຽງໄປມາຫາສູ່ກັນ ຄ້າຂາຍຮ່ວມກັນຫຼາຍຂຶ້ນໄປເລື້ອຍໆ.
ຂ່າວ-ພາບ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
