ຕອນເຊົ້າ ເວລາ 09: 00 ໂມງ ຂອງວັນທີ 14 ພຶດສະພາ 2021 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ; ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບພົບປະ ຂອງ ທ່ານ ນາງ Florence Jeanblanc-Risler, ເອກອັກຄະລັດຖະທູດຜູ້ມີອໍານາດເຕັມແຫ່ງ ປະເທດ ຝຣັ່ງ ຊຶ່ງມີສໍານັກງານສະຖານທູດທີ່ຕັ້ງຢູ່ ສປປ ລາວ ໃນໂອກາດການປະຕິບັດໜ້າທີ່ວຽກງານ ທີ່ມີຜົນງານຫຼາຍດ້ານທາງການທູດປະຈໍາຢູ່ ສປປ ລາວ; ການເຂົ້າຢ້ຽມຂໍ່ານັບຄັ້ງນີ້ມີຜູ້ຕາງໜ້າທັງສອງຝ່າຍເຂົ້າຮ່ວມ ປະມານ 10 ທ່ານ.
ໂອກາດນີ້ ທ່ານ ປອ ຄຳແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ນາງ Florence Jeanblanc-Risler, ໄດ້ເຮັດໃຫ້ສາຍພົວພັນຮ່ວມມືທີ່ດີ ລະຫວ່າງສອງປະເທດລະຫວ່າງ ລາວ-ຝຣັ່ງ ນັບມື້ແໜ້ນແຟ້ນຍິ່ງຂຶ້ນ ແລະ ຕີລາຄາສູງຕໍ່ການຊ່ວຍເຫຼືອຫຼາຍດ້ານໃຫ້ແກ່ລາວ ເປັນຕົ້ນການຮ່ວມມືທາງດ້ານການຄ້າ ການລົງທຶນໂຄງການໃຫຍ່ທີ່ລົງທຶນຜ່ານມາໃນປະເທດລາວ ເປັນຕົ້ນ ກຸ່ມບໍລິສັດ ມີດເຊີລິນ ຮ່ວມມືພັດທະນາເສດຖະກິດ ການຜະລິດອຸດສາຫະກຳເປັນສິນຄ້າຂອງລາວ ເພື່ອສົ່ງອອກ ແລະ ວຽກງານອື່ນໆ; ນອກນັ້ນຍັງເປັນຄູ່ຮ່ວມມືທີ່ດີ, ທັງສອງຝ່າຍໃຫ້ຄໍາໝັ້ນສັນຍາຕໍ່ກັນວ່າ: ຈະສືບຕໍ່ຜັນຂະຫຍາຍການຮ່ວມມື ພັດທະນາເສດຖະກິດ-ສັງຄົມ ແລະ ວຽກງານອື່ນໃນຕໍ່ໜ້າ.
ທ່ານ ນາງ Florence Jeanblanc-Risler, ໄດ້ກ່າວວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ດໍາລົງຕໍາແໜ່ງເປັນເອກອັກຄະລັດຖະທູດຜູ້ມີອໍານາດເຕັມແຫ່ງປະເທດ ຝຣັ່ງ ປະຈໍາຢູ່ ສປປ ລາວ ແລະ ກໍ່ສະແດງຄວາມຍິນດີ ທີ່ທ່ານ ລັດຖະມົນຕີມາຮັບຕໍາແຫນ່ງຫນ້າທີ່ໃຫມ່ ພ້ອມທັງຂອບໃຈໃນໄລຍະຜ່ານມາ ໄດ້ອໍານວຍຄວາມສະດວກໃນວຽກງານໃຫ້ແກ່ຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ກະຊວງ ອຄ ໄດ້ອວຍພອນໃຫ້ ທ່ານການທູດ ດ້ວຍສະຫວັດດີພາບ ຫວັງວ່າທ່ານຈະເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນເລື້ອຍໆ.
ຂ່າວ-ພາບ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
